{"collection":"Bible & Christianity","html_url":"https://unchartedknowledge.5gfusion.net/browse/bib/vul/jon002.htm","path":"bib/vul/jon002.htm","source_url":"https://sacred-texts.com/bib/vul/jon002.htm","text":"1 Et pr\u00e6paravit Dominus piscem grandem ut deglutiret Jonam: et erat Jonas in ventre piscis tribus diebus et tribus noctibus.\n2 Et oravit Jonas ad Dominum Deum suum de ventre piscis,\n3\u00a0et dixit: [Clamavi de tribulatione mea ad Dominum,\n et exaudivit me;\n de ventre inferi clamavi,\n et exaudisti vocem meam.\n4\u00a0Et projecisti me in profundum in corde maris,\n et flumen circumdedit me:\n omnes gurgites tui, et fluctus tui super me transierunt.\n5\u00a0Et ego dixi:\n Abjectus sum a conspectu oculorum tuorum;\n verumtamen rursus videbo templum sanctum tuum.\n6\u00a0Circumdederunt me aqu\u00e6 usque ad animam:\n abyssus vallavit me,\n pelagus operuit caput meum.\n7\u00a0Ad extrema montium descendi;\n terr\u00e6 vectes concluserunt me in \u00e6ternum:\n et sublevabis de corruptione vitam meam, Domine Deus meus.\n8\u00a0Cum angustiaretur in me anima mea,\n Domini recordatus sum:\n ut veniat ad te oratio mea,\n ad templum sanctum tuum.\n9\u00a0Qui custodiunt vanitates frustra,\n misericordiam suam derelinquunt.\n10\u00a0Ego autem in voce laudis immolabo tibi:\n qu\u00e6cumque vovi, reddam pro salute Domino.]\n11 Et dixit Dominus pisci, et evomuit Jonam in aridam.","title":"Vulgate: Jonah: Jonah Chapter 2","type":"page"}