{"collection":"Bible & Christianity","html_url":"https://unchartedknowledge.5gfusion.net/browse/bib/vul/jon003.htm","path":"bib/vul/jon003.htm","source_url":"https://sacred-texts.com/bib/vul/jon003.htm","text":"1 Et factum est verbum Domini ad Jonam secundo, dicens:\n2 Surge, et vade in Niniven, civitatem magnam, et pr\u00e6dica in ea pr\u00e6dicationem quam ego loquor ad te.\n3 Et surrexit Jonas, et abiit in Niniven juxta verbum Domini: et Ninive erat civitas magna, itinere trium dierum.\n4 Et c\u0153pit Jonas introire in civitatem itinere diei unius: et clamavit, et dixit: Adhuc quadraginta dies, et Ninive subvertetur.\n5 Et crediderunt viri Ninivit\u00e6 in Deum, et pr\u00e6dicaverunt jejunium, et vestiti sunt saccis, a majore usque ad minorem.\n6 Et pervenit verbum ad regem Ninive: et surrexit de solio suo, et abjecit vestimentum suum a se, et indutus est sacco, et sedit in cinere.\n7 Et clamavit, et dixit in Ninive ex ore regis et principum ejus, dicens: Homines, et jumenta, et boves, et pecora non gustent quidquam: nec pascantur, et aquam non bibant.\n8 Et operiantur saccis homines et jumenta, et clament ad Dominum in fortitudine: et convertatur vir a via sua mala, et ab iniquitate qu\u00e6 est in manibus eorum.\n9 Quis scit si convertatur et ignoscat Deus, et revertatur a furore ir\u00e6 su\u00e6, et non peribimus?\n10 Et vidit Deus opera eorum, quia conversi sunt de via sua mala: et misertus est Deus super malitiam quam locutus fuerat ut faceret eis, et non fecit.","title":"Vulgate: Jonah: Jonah Chapter 3","type":"page"}