{"collection":"Bible & Christianity","html_url":"https://unchartedknowledge.5gfusion.net/browse/bib/vul/jon004.htm","path":"bib/vul/jon004.htm","source_url":"https://sacred-texts.com/bib/vul/jon004.htm","text":"1 Et afflictus est Jonas afflictione magna, et iratus est:\n2 et oravit ad Dominum, et dixit: Obsecro, Domine, numquid non hoc est verbum meum cum adhuc essem in terra mea? propter hoc pr\u00e6occupavi ut fugerem in Tharsis: scio enim quia tu Deus clemens et misericors es, patiens et mult\u00e6 miserationis, et ignoscens super malitia.\n3 Et nunc, Domine, tolle, qu\u00e6so, animam meam a me, quia melior est mihi mors quam vita.\n4 Et dixit Dominus: Putasne bene irasceris tu?\n5 Et egressus est Jonas de civitate, et sedit contra orientem civitatis: et fecit sibimet umbraculum ibi, et sedebat subter illud in umbra, donec videret quid accideret civitati.\n6 Et pr\u00e6paravit Dominus Deus hederam, et ascendit super caput Jon\u00e6, ut esset umbra super caput ejus, et protegeret eum (laboraverat enim): et l\u00e6tatus est Jonas super hedera l\u00e6titia magna.\n7 Et paravit Deus vermen ascensu diluculi in crastinum: et percussit hederam, et exaruit.\n8 Et cum ortus fuisset sol, pr\u00e6cepit Dominus vento calido et urenti: et percussit sol super caput Jon\u00e6, et \u00e6stuabat: et petivit anim\u00e6 su\u00e6 ut moreretur, et dixit: Melius est mihi mori quam vivere.\n9 Et dixit Dominus ad Jonam: Putasne bene irasceris tu super hedera? Et dixit: Bene irascor ego usque ad mortem.\n10 Et dixit Dominus: Tu doles super hederam in qua non laborasti, neque fecisti ut cresceret; qu\u00e6 sub una nocte nata est, et sub una nocte periit:\n11 et ego non parcam Ninive, civitati magn\u00e6, in qua sunt plus quam centum viginti millia hominum qui nesciunt quid sit inter dexteram et sinistram suam, et jumenta multa?","title":"Vulgate: Jonah: Jonah Chapter 4","type":"page"}