{"collection":"Bible & Christianity","html_url":"https://unchartedknowledge.5gfusion.net/browse/bib/vul/jos016.htm","path":"bib/vul/jos016.htm","source_url":"https://sacred-texts.com/bib/vul/jos016.htm","text":"1 Cecidit quoque sors filiorum Joseph ab Jordane contra Jericho et aquas ejus ab oriente: solitudo qu\u00e6 ascendit de Jericho ad montem Bethel:\n2 et egreditur de Bethel Luza: transitque terminum Archi, Ataroth:\n3 et descendit ad occidentem juxta terminum Jephleti, usque ad terminos Beth-horon inferioris, et Gazer: finiunturque regiones ejus mari magno:\n4\u00a0possederuntque filii Joseph, Manasses et Ephraim.\n \n5 Et factus est terminus filiorum Ephraim per cognationes suas: et possessio eorum contra orientem Ataroth Addar usque Beth-horon superiorem.\n6 Egrediunturque confinia in mare: Machmethath vero aquilonem respicit, et circuit terminos contra orientem in Thanathselo: et pertransit ab oriente Jano\u00eb.\n7 Descenditque de Jano\u00eb in Ataroth et Naaratha: et pervenit in Jericho, egrediturque ad Jordanem.\n8 De Taphua pertransit contra mare in vallem arundineti, suntque egressus ejus in mare salsissimum. H\u00e6c est possessio tribus filiorum Ephraim per familias suas.\n9 Urbesque separat\u00e6 sunt filiis Ephraim in medio possessionis filiorum Manasse, et vill\u00e6 earum.\n10 Et non interfecerunt filii Ephraim Chanan\u00e6um, qui habitabat in Gazer: habitavitque Chanan\u00e6us in medio Ephraim usque in diem hanc tributarius.","title":"Vulgate: Joshua: Joshua Chapter 16","type":"page"}