{"collection":"Bible & Christianity","html_url":"https://unchartedknowledge.5gfusion.net/browse/bib/vul/jos021.htm","path":"bib/vul/jos021.htm","source_url":"https://sacred-texts.com/bib/vul/jos021.htm","text":"1 Accesseruntque principes familiarum Levi ad Eleazarum sacerdotem, et Josue filium Nun, et ad duces cognationum per singulas tribus filiorum Isra\u00ebl:\n2 locutique sunt ad eos in Silo terr\u00e6 Chanaan, atque dixerunt: Dominus pr\u00e6cepit per manum Moysi, ut darentur nobis urbes ad habitandum, et suburbana earum ad alenda jumenta.\n3 Dederuntque filii Isra\u00ebl de possessionibus suis juxta imperium Domini, civitates et suburbana earum.\n4 Egressaque est sors in familiam Caath filiorum Aaron sacerdotis, de tribubus Juda, et Simeon, et Benjamin, civitates tredecim:\n5 et reliquis filiorum Caath, id est Levitis, qui superfuerant, de tribubus Ephraim, et Dan, et dimidia tribu Manasse, civitates decem.\n6 Porro filii Gerson egressa est sors, ut acciperent de tribubus Issachar et Aser et Nephthali, dimidiaque tribu Manasse in Basan, civitates numero tredecim.\n7 Et filiis Merari per cognationes suas de tribubus Ruben et Gad et Zabulon urbes duodecim.\n8 Dederuntque filii Isra\u00ebl Levitis civitates et suburbana earum, sicut pr\u00e6cepit Dominus per manum Moysi, singulis sorte tribuentes.\n9 De tribubus filiorum Juda et Simeon dedit Josue civitates, quarum ista sunt nomina,\n10 filiis Aaron per familias Caath Levitici generis (prima enim sors illis egressa est),\n11 Cariatharbe patris Enac, qu\u00e6 vocatur Hebron, in monte Juda, et suburbana ejus per circuitum.\n12 Agros vero et villas ejus dederat Caleb filio Jephone ad possidendum.\n13 Dedit ergo filiis Aaron sacerdotis Hebron confugii civitatem, ac suburbana ejus: et Lobnam cum suburbanis suis:\n14 et Jether, et Esthemo,\n15 et Holon, et Dabir,\n16 et Ain, et Jeta, et Bethsames, cum suburbanis suis: civitates novem de tribubus, ut dictum est, duabus.\n17 De tribu autem filiorum Benjamin, Gabaon, et Gab\u00e6,\n18 et Anathoth et Almon, cum suburbanis suis: civitates quatuor.\n19 Omnes simul civitates filiorum Aaron sacerdotis, tredecim, cum suburbanis suis.\n20 Reliquis vero per familias filiorum Caath Levitici generis, h\u00e6c est data possessio.\n21 De tribu Ephraim urbes confugii, Sichem cum suburbanis suis in monte Ephraim, et Gazer\n22 et Cibsaim et Beth-horon, cum suburbanis suis, civitates quatuor.\n23 De tribu quoque Dan, Eltheco et Gabathon,\n24 et Ajalon et Gethremmon, cum suburbanis suis, civitates quatuor.\n25 Porro de dimidia tribu Manasse, Thanach et Gethremmon, cum suburbanis suis, civitates du\u00e6.\n26 Omnes civitates decem, et suburbana earum, dat\u00e6 sunt filiis Caath inferioris gradus.\n27 Filiis quoque Gerson Levitici generis dedit de dimidia tribu Manasse confugii civitates, Gaulon in Basan, et Bosram, cum suburbanis suis, civitates duas.\n28 Porro de tribu Issachar, Cesion, et Dabereth,\n29 et Jaramoth, et Engannim, cum suburbanis suis, civitates quatuor.\n30 De tribu autem Aser, Masal et Abdon,\n31 et Helcath, et Rohob, cum suburbanis suis, civitates quatuor.\n32 De tribu quoque Nephthali civitates confugii, Cedes in Galil\u00e6a, et Hammoth Dor, et Carthan, cum suburbanis suis, civitates tres.\n33 Omnes urbes familiarum Gerson, tredecim, cum suburbanis suis.\n34 Filiis autem Merari Levitis inferioris gradus per familias suas data est de tribu Zabulon, Jecnam, et Cartha\n35 et Damna et Naalol, civitates quatuor cum suburbanis suis.\n36 De tribu Ruben ultra Jordanem contra Jericho civitates refugii, Bosor in solitudine, Misor et Jaser et Jethson et Mephaath, civitates quatuor cum suburbanis suis.\n37 De tribu Gad civitates confugii, Ramoth in Galaad, et Manaim et Hesebon et Jazer, civitates quatuor cum suburbanis suis.\n38 Omnes urbes filiorum Merari per familias et cognationes suas, duodecim.\n39 Itaque civitates univers\u00e6 Levitarum in medio possessionis filiorum Isra\u00ebl fuerunt quadraginta octo\n40\u00a0cum suburbanis suis, singul\u00e6 per familias distribut\u00e6.\n \n41 Deditque Dominus Deus Isra\u00ebli omnem terram, quam traditurum se patribus eorum juraverat: et possederunt illam, atque habitaverunt in ea.\n42 Dataque est ab eo pax in omnes per circuitum nationes: nullusque eis hostium resistere ausus est, sed cuncti in eorum ditionem redacti sunt.\n43 Ne unum quidem verbum, quod illis pr\u00e6stiturum se esse promiserat, irritum fuit, sed rebus expleta sunt omnia.","title":"Vulgate: Joshua: Joshua Chapter 21","type":"page"}