{"collection":"Bible & Christianity","html_url":"https://unchartedknowledge.5gfusion.net/browse/bib/vul/kg1004.htm","path":"bib/vul/kg1004.htm","source_url":"https://sacred-texts.com/bib/vul/kg1004.htm","text":"1 Erat autem rex Salomon regnans super omnem Isra\u00ebl:\n2 et hi principes quos habebat: Azarias filius Sadoc sacerdotis:\n3 Elihoreph et Ahia filii Sisa scrib\u00e6: Josaphat filius Ahilud a commentariis:\n4 Banaias filius Jojad\u00e6 super exercitum: Sadoc autem et Abiathar sacerdotes:\n5 Azarias filius Nathan super eos qui assistebant regi: Zabud filius Nathan sacerdos, amicus regis:\n6 et Ahisar pr\u00e6positus domus: et Adoniram filius Abda super tributa.\n7 Habebat autem Salomon duodecim pr\u00e6fectos super omnem Isra\u00ebl, qui pr\u00e6bebant annonam regi et domui ejus: per singulos enim menses in anno, singuli necessaria ministrabant.\n8 Et h\u00e6c nomina eorum: Benhur in monte Ephraim.\n9 Bendecar in Macces, et in Salebim, et in Bethsames, et in Elon, et in Bethanan.\n10 Benhesed in Aruboth: ipsius erat Socho, et omnis terra Epher.\n11 Benabinadab, cujus omnis Nephath Dor: Tapheth filiam Salomonis habebat uxorem.\n12 Bana filius Ahilud regebat Thanac et Mageddo, et universam Bethsan, qu\u00e6 est juxta Sarthana subter Jezrahel, a Bethsan usque Abelmehula e regione Jecmaan.\n13 Bengaber in Ramoth Galaad: habebat Avothjair filii Manasse in Galaad: ipse pr\u00e6erat in omni regione Argob, qu\u00e6 est in Basan, sexaginta civitatibus magnis atque muratis qu\u00e6 habebant seras \u00e6reas.\n14 Ahinadab filius Addo pr\u00e6erat in Manaim.\n15 Achimaas in Nephthali: sed et ipse habebat Basemath filiam Salomonis in conjugio.\n16 Baana filius Husi in Aser, et in Baloth.\n17 Josaphat filius Pharue in Issachar.\n18 Semei filius Ela in Benjamin.\n19\u00a0Gaber filius Uri in terra Galaad, in terra Sehon regis Amorrh\u00e6i et Og regis Basan, super omnia qu\u00e6 erant in illa terra.\n \n20 Juda et Isra\u00ebl innumerabiles, sicut arena maris in multitudine: comedentes, et bibentes, atque l\u00e6tantes.\n21 Salomon autem erat in ditione sua, habens omnia regna a flumine terr\u00e6 Philisthiim usque ad terminum \u00c6gypti: offerentium sibi munera, et servientium ei cunctis diebus vit\u00e6 ejus.\n22 Erat autem cibus Salomonis per dies singulos triginta cori simil\u00e6, et sexaginta cori farin\u00e6,\n23 decem boves pingues, et viginti boves pascuales, et centum arietes, excepta venatione cervorum, caprearum, atque bubalorum, et avium altilium.\n24 Ipse enim obtinebat omnem regionem qu\u00e6 erat trans flumen, a Thaphsa usque ad Gazan, et cunctos reges illarum regionum: et habebat pacem ex omni parte in circuitu.\n25 Habitabatque Juda et Isra\u00ebl absque timore ullo, unusquisque sub vite sua et sub ficu sua, a Dan usque Bersabee, cunctis diebus Salomonis.\n26 Et habebat Salomon quadraginta millia pr\u00e6sepia equorum currilium, et duodecim millia equestrium.\n27 Nutriebantque eos supradicti regis pr\u00e6fecti: sed et necessaria mens\u00e6 regis Salomonis cum ingenti cura pr\u00e6bebant in tempore suo.\n28\u00a0Hordeum quoque, et paleas equorum et jumentorum, deferebant in locum ubi erat rex, juxta constitutum sibi.\n \n29 Dedit quoque Deus sapientiam Salomoni, et prudentiam multam nimis, et latitudinem cordis quasi arenam qu\u00e6 est in littore maris.\n30 Et pr\u00e6cedebat sapientia Salomonis sapientiam omnium Orientalium et \u00c6gyptiorum,\n31 et erat sapientior cunctis hominibus: sapientior Ethan Ezrahita, et Heman, et Chalcol, et Dorda filiis Mahol: et erat nominatus in universis gentibus per circuitum.\n32 Locutus est quoque Salomon tria millia parabolas: et fuerunt carmina ejus quinque et mille.\n33 Et disputavit super lignis a cedro qu\u00e6 est in Libano, usque ad hyssopum qu\u00e6 egreditur de pariete: et disseruit de jumentis, et volucribus, et reptilibus, et piscibus.\n34 Et veniebant de cunctis populis ad audiendam sapientiam Salomonis, et ab universis regibus terr\u00e6 qui audiebant sapientiam ejus.","title":"Vulgate: 1 Kings: 1 Kings Chapter 4","type":"page"}