{"collection":"Bible & Christianity","html_url":"https://unchartedknowledge.5gfusion.net/browse/bib/vul/kg1007.htm","path":"bib/vul/kg1007.htm","source_url":"https://sacred-texts.com/bib/vul/kg1007.htm","text":"1 Domum autem suam \u00e6dificavit Salomon tredecim annis, et ad perfectum usque perduxit.\n2 \u00c6dificavit quoque domum saltus Libani centum cubitorum longitudinis, et quinquaginta cubitorum latitudinis, et triginta cubitorum altitudinis: et quatuor deambulacra inter columnas cedrinas: ligna quippe cedrina exciderat in columnas.\n3 Et tabulatis cedrinis vestivit totam cameram, qu\u00e6 quadraginta quinque columnis sustentabatur. Unus autem ordo habebat columnas quindecim\n4 contra se invicem positas,\n5 et e regione se respicientes, \u00e6quali spatio inter columnas, et super columnas quadrangulata ligna in cunctis \u00e6qualia.\n6 Et porticum columnarum fecit quinquaginta cubitorum longitudinis, et triginta cubitorum latitudinis: et alteram porticum in facie majoris porticus: et columnas, et epistylia super columnas.\n7 Porticum quoque solii, in qua tribunal est, fecit: et texit lignis cedrinis a pavimento usque ad summitatem.\n8 Et domuncula, in qua sedebatur ad judicandum, erat in media porticu simili opere. Domum quoque fecit fili\u00e6 Pharaonis (quam uxorem duxerat Salomon) tali opere, quali et hanc porticum.\n9 Omnia lapidibus pretiosis, qui ad normam quamdam atque mensuram tam intrinsecus quam extrinsecus serrati erant: a fundamento usque ad summitatem parietum, et extrinsecus usque ad atrium majus.\n10 Fundamenta autem de lapidibus pretiosis, lapidibus magnis, decem sive octo cubitorum.\n11 Et desuper lapides pretiosi \u00e6qualis mensur\u00e6 secti erant, similiterque de cedro.\n12\u00a0Et atrium majus rotundum trium ordinum de lapidibus sectis, et unius ordinis de dolata cedro: necnon et in atrio domus Domini interiori, et in porticu domus.\n \n13 Misit quoque rex Salomon, et tulit Hiram de Tyro,\n14 filium mulieris vidu\u00e6 de tribu Nephthali, patre Tyrio, artificem \u00e6rarium, et plenum sapientia, et intelligentia, et doctrina, ad faciendum omne opus ex \u00e6re. Qui cum venisset ad regem Salomonem, fecit omne opus ejus.\n15 Et finxit duas columnas \u00e6reas, decem et octo cubitorum altitudinis columnam unam: et linea duodecim cubitorum ambiebat columnam utramque.\n16 Duo quoque capitella fecit, qu\u00e6 ponerentur super capita columnarum, fusilia ex \u00e6re: quinque cubitorum altitudinis capitellum unum, et quinque cubitorum altitudinis capitellum alterum:\n17 et quasi in modum retis, et catenarum sibi invicem miro opere contextarum. Utrumque capitellum columnarum fusile erat: septena versuum retiacula in capitello uno, et septena retiacula in capitello altero.\n18 Et perfecit columnas, et duos ordines per circuitum retiaculorum singulorum, ut tegerent capitella qu\u00e6 erant super summitatem, malogranatorum: eodem modo fecit et capitello secundo.\n19 Capitella autem qu\u00e6 erant super capita columnarum, quasi opere lilii fabricata erant in porticu quatuor cubitorum.\n20 Et rursum alia capitella in summitate columnarum desuper juxta mensuram column\u00e6 contra retiacula: malogranatorum autem ducenti ordines erant in circuitu capitelli secundi.\n21 Et statuit duas columnas in porticu templi: cumque statuisset columnam dexteram, vocavit eam nomine Jachin: similiter erexit columnam secundam, et vocavit nomen ejus Booz.\n22 Et super capita columnarum opus in modum lilii posuit: perfectumque est opus columnarum.\n23 Fecit quoque mare fusile decem cubitorum a labio usque ad labium, rotundum in circuitu: quinque cubitorum altitudo ejus, et resticula triginta cubitorum cingebat illud per circuitum.\n24 Et sculptura subter labium circuibat illud decem cubitis ambiens mare: duo ordines sculpturarum striatarum erant fusiles.\n25 Et stabat super duodecim boves, e quibus tres respiciebant ad aquilonem, et tres ad occidentem, et tres ad meridiem, et tres ad orientem: et mare super eos desuper erat: quorum posteriora universa intrinsecus latitabant.\n26 Grossitudo autem luteris, trium unciarum erat: labiumque ejus quasi labium calicis, et folium repandi lilii: duo millia batos capiebat.\n27 Et fecit decem bases \u00e6neas, quatuor cubitorum longitudinis bases singulas, et quatuor cubitorum latitudinis, et trium cubitorum altitudinis.\n28 Et ipsum opus basium, interrasile erat: et sculptur\u00e6 inter juncturas.\n29 Et inter coronulas et plectas, leones et boves et cherubim, et in juncturis similiter desuper: et subter leones et boves, quasi lora ex \u00e6re dependentia.\n30 Et quatuor rot\u00e6 per bases singulas, et axes \u00e6rei: et per quatuor partes quasi humeruli subter luterem fusiles, contra se invicem respectantes.\n31 Os quoque luteris intrinsecus erat in capitis summitate: et quod forinsecus apparebat, unius cubiti erat totum rotundum, pariterque habebat unum cubitum et dimidium: in angulis autem columnarum vari\u00e6 c\u00e6latur\u00e6 erant: et media intercolumnia, quadrata non rotunda.\n32 Quatuor quoque rot\u00e6 qu\u00e6 per quatuor angulos basis erant, coh\u00e6rebant sibi subter basim: una rota habebat altitudinis cubitum et semis.\n33 Tales autem rot\u00e6 erant quales solent in curru fieri: et axes earum, et radii, et canthi, et modioli, omnia fusilia.\n34 Nam et humeruli illi quatuor per singulos angulos basis unius, ex ipsa basi fusiles et conjuncti erant.\n35 In summitate autem basis erat qu\u00e6dam rotunditas dimidii cubiti, ita fabrefacta ut luter desuper posset imponi, habens c\u00e6laturas suas, variasque sculpturas ex semetipsa.\n36 Sculpsit quoque in tabulatis illis qu\u00e6 erant ex \u00e6re, et in angulis, cherubim, et leones, et palmas, quasi in similitudinem hominis stantis, ut non c\u00e6lata, sed apposita per circuitum viderentur.\n37 In hunc modum fecit decem bases, fusura una, et mensura, sculpturaque consimili.\n38 Fecit quoque decem luteres \u00e6neos: quadraginta batos capiebat luter unus, eratque quatuor cubitorum: singulos quoque luteres per singulas, id est, decem bases, posuit.\n39 Et constituit decem bases, quinque ad dexteram partem templi, et quinque ad sinistram: mare autem posuit ad dexteram partem templi contra orientem ad meridiem.\n40 Fecit ergo Hiram lebetes, et scutras, et hamulas, et perfecit omne opus regis Salomonis in templo Domini.\n41 Columnas duas, et funiculos capitellorum super capitella columnarum duos: et retiacula duo, ut operirent duos funiculos qui erant super capita columnarum.\n42 Et malogranata quadringenta in duobus retiaculis: duos versus malogranatorum in retiaculis singulis, ad operiendos funiculos capitellorum qui erant super capita columnarum.\n43 Et bases decem, et luteres decem super bases.\n44 Et mare unum, et boves duodecim subter mare.\n45 Et lebetes, et scutras, et hamulas, omnia vasa qu\u00e6 fecit Hiram regi Salomoni in domo Domini, de auricalco erant.\n46 In campestri regione Jordanis fudit ea rex in argillosa terra, inter Sochoth et Sarthan.\n47\u00a0Et posuit Salomon omnia vasa: propter multitudinem autem nimiam non erat pondus \u00e6ris.\n \n48 Fecitque Salomon omnia vasa in domo Domini: altare aureum, et mensam super quam ponerentur panes propositionis, auream:\n49 et candelabra aurea, quinque ad dexteram, et quinque ad sinistram contra oraculum, ex auro puro: et quasi lilii flores, et lucernas desuper aureas: et forcipes aureos,\n50 et hydrias, et fuscinulas, et phialas, et mortariola, et thuribula, de auro purissimo: et cardines ostiorum domus interioris Sancti sanctorum, et ostiorum domus templi, ex auro erant.\n51 Et perfecit omne opus quod faciebat Salomon in domo Domini, et intulit qu\u00e6 sanctificaverat David pater suus, argentum, et aurum, et vasa, reposuitque in thesauris domus Domini.","title":"Vulgate: 1 Kings: 1 Kings Chapter 7","type":"page"}