{"collection":"Bible & Christianity","html_url":"https://unchartedknowledge.5gfusion.net/browse/bib/vul/kg1013.htm","path":"bib/vul/kg1013.htm","source_url":"https://sacred-texts.com/bib/vul/kg1013.htm","text":"1 Et ecce vir Dei venit de Juda in sermone Domini in Bethel, Jeroboam stante super altare, et thus jaciente.\n2 Et exclamavit contra altare in sermone Domini, et ait: Altare, altare, h\u00e6c dicit Dominus: Ecce filius nascetur domui David, Josias nomine, et immolabit super te sacerdotes excelsorum, qui nunc in te thura succendunt: et ossa hominum super te incendet.\n3 Deditque in illa die signum, dicens: Hoc erit signum quod locutus est Dominus: ecce altare scindetur, et effundetur cinis qui in eo est.\n4 Cumque audisset rex sermonem hominis Dei quem inclamaverat contra altare in Bethel, extendit manum suam de altari, dicens: Apprehendite eum. Et exaruit manus ejus quam extenderat contra eum, nec valuit retrahere eam ad se.\n5 Altare quoque scissum est, et effusus est cinis de altari, juxta signum quod pr\u00e6dixerat vir Dei in sermone Domini.\n6 Et ait rex ad virum Dei: Deprecare faciem Domini Dei tui, et ora pro me, ut restituatur manus mea mihi. Oravitque vir Dei faciem Domini, et reversa est manus regis ad eum, et facta est sicut prius fuerat.\n7 Locutus est autem rex ad virum Dei: Veni mecum domum ut prandeas, et dabo tibi munera.\n8 Responditque vir Dei ad regem: Si dederis mihi mediam partem domus tu\u00e6, non veniam tecum, nec comedam panem, neque bibam aquam in loco isto:\n9 sic enim mandatum est mihi in sermone Domini pr\u00e6cipientis: Non comedes panem, neque bibes aquam, nec reverteris per viam qua venisti.\n10\u00a0Abiit ergo per aliam viam, et non est reversus per iter quo venerat in Bethel.\n \n11 Prophetes autem quidam senex habitabat in Bethel: ad quem venerunt filii sui, et narraverunt ei omnia opera qu\u00e6 fecerat vir Dei illa die in Bethel: et verba qu\u00e6 locutus fuerat ad regem, narraverunt patri suo.\n12 Et dixit eis pater eorum: Per quam viam abiit? Ostenderunt ei filii sui viam per quam abierat vir Dei, qui venerat de Juda.\n13 Et ait filiis suis: Sternite mihi asinum. Qui cum stravissent, ascendit,\n14 et abiit post virum Dei, et invenit eum sedentem subtus terebinthum: et ait illi: Tune es vir Dei qui venisti de Juda? Respondit ille: Ego sum.\n15 Dixitque ad eum: Veni mecum domum, ut comedas panem.\n16 Qui ait: Non possum reverti, neque venire tecum: nec comedam panem, neque bibam aquam in loco isto,\n17 quia locutus est Dominus ad me in sermone Domini, dicens: Non comedes panem, et non bibes aquam ibi, nec reverteris per viam qua ieris.\n18 Qui ait illi: Et ego propheta sum similis tui: et angelus locutus est mihi in sermone Domini, dicens: Reduc eum tecum in domum tuam, ut comedat panem, et bibat aquam. Fefellit eum,\n19 et reduxit secum: comedit ergo panem in domo ejus, et bibit aquam.\n20 Cumque sederent ad mensam, factus est sermo Domini ad prophetam qui reduxerat eum.\n21 Et exclamavit ad virum Dei qui venerat de Juda, dicens: H\u00e6c dicit Dominus: Quia non obediens fuisti ori Domini, et non custodisti mandatum quod pr\u00e6cepit tibi Dominus Deus tuus,\n22\u00a0et reversus es, et comedisti panem, et bibisti aquam in loco in quo pr\u00e6cepit tibi ne comederes panem neque biberes aquam, non inferetur cadaver tuum in sepulchrum patrum tuorum.\n \n23 Cumque comedisset et bibisset, stravit asinum suum prophet\u00e6 quem reduxerat.\n24 Qui cum abiisset, invenit eum leo in via, et occidit, et erat cadaver ejus projectum in itinere: asinus autem stabat juxta illum, et leo stabat juxta cadaver.\n25 Et ecce viri transeuntes viderunt cadaver projectum in via, et leonem stantem juxta cadaver. Et venerunt, et divulgaverunt in civitate in qua prophetes ille senex habitabat.\n26 Quod cum audisset propheta ille qui reduxerat eum, ait: Vir Dei est, qui inobediens fuit ori Domini, et tradidit eum Dominus leoni, et confregit eum, et occidit juxta verbum Domini quod locutus est ei.\n27 Dixitque ad filios suos: Sternite mihi asinum. Qui cum stravissent,\n28 et ille abiisset, invenit cadaver ejus projectum in via, et asinum et leonem stantes juxta cadaver: non comedit leo de cadavere, nec l\u00e6sit asinum.\n29 Tulit ergo prophetes cadaver viri Dei, et posuit illud super asinum, et reversus intulit in civitatem prophet\u00e6 senis ut plangeret eum.\n30 Et posuit cadaver ejus in sepulchro suo, et planxerunt eum: Heu, heu mi frater!\n31 Cumque planxissent eum, dixit ad filios suos: Cum mortuus fuero, sepelite me in sepulchro in quo vir Dei sepultus est: juxta ossa ejus ponite ossa mea.\n32\u00a0Profecto enim veniet sermo quem pr\u00e6dixit in sermone Domini contra altare quod est in Bethel, et contra omnia fana excelsorum qu\u00e6 sunt in urbibus Samari\u00e6.\n \n33 Post verba h\u00e6c non est reversus Jeroboam de via sua pessima, sed e contrario fecit de novissimis populi sacerdotes excelsorum: quicumque volebat, implebat manum suam, et fiebat sacerdos excelsorum.\n34 Et propter hanc causam peccavit domus Jeroboam, et eversa est, et deleta de superficie terr\u00e6.","title":"Vulgate: 1 Kings: 1 Kings Chapter 13","type":"page"}