{"collection":"Bible & Christianity","html_url":"https://unchartedknowledge.5gfusion.net/browse/bib/vul/kg1018.htm","path":"bib/vul/kg1018.htm","source_url":"https://sacred-texts.com/bib/vul/kg1018.htm","text":"1 Post dies multos factum est verbum Domini ad Eliam, in anno tertio, dicens: Vade, et ostende te Achab, ut dem pluviam super faciem terr\u00e6.\n2 Ivit ergo Elias, ut ostenderet se Achab: erat autem fames vehemens in Samaria.\n3 Vocavitque Achab Abdiam dispensatorem domus su\u00e6: Abdias autem timebat Dominum valde.\n4 Nam cum interficeret Jezabel prophetas Domini, tulit ille centum prophetas, et abscondit eos quinquagenos et quinquagenos in speluncis, et pavit eos pane et aqua.\n5 Dixit ergo Achab ad Abdiam: Vade in terram ad universos fontes aquarum, et in cunctas valles, si forte possimus invenire herbam, et salvare equos et mulos, et non penitus jumenta intereant.\n6 Diviseruntque sibi regiones ut circuirent eas: Achab ibat per viam unam, et Abdias per viam alteram seorsum.\n7 Cumque esset Abdias in via, Elias occurrit ei: qui cum cognovisset eum, cecidit super faciem suam, et ait: Num tu es, domine mi, Elias?\n8 Cui ille respondit: Ego. Vade, et dic domino tuo: Adest Elias.\n9 Et ille: Quid peccavi, inquit, quoniam tradis me servum tuum in manu Achab, ut interficiat me?\n10 Vivit Dominus Deus tuus, quia non est gens aut regnum quo non miserit dominus meus te requirens: et respondentibus cunctis: Non est hic: adjuravit regna singula et gentes, eo quod minime reperireris.\n11 Et nunc tu dicis mihi: Vade, et dic domino tuo: Adest Elias.\n12 Cumque recessero a te, spiritus Domini asportabit te in locum quem ego ignoro: et ingressus nuntiabo Achab, et non inveniens te, interficiet me: servus autem tuus timet Dominum ab infantia sua.\n13 Numquid non indicatum est tibi domino meo quid fecerim cum interficeret Jezabel prophetas Domini, quod absconderim de prophetis Domini centum viros, quinquagenos et quinquagenos, in speluncis, et paverim eos pane et aqua?\n14 et nunc tu dicis: Vade, et dic domino tuo: Adest Elias: ut interficiat me?\n15 Et dixit Elias: Vivit Dominus exercituum, ante cujus vultum sto, quia hodie apparebo ei.\n16 Abiit ergo Abdias in occursum Achab, et indicavit ei: venitque Achab in occursum Eli\u00e6.\n17 Et cum vidisset eum, ait: Tune es ille, qui conturbas Isra\u00ebl?\n18\u00a0Et ille ait: Non ego turbavi Isra\u00ebl, sed tu, et domus patris tui, qui dereliquistis mandata Domini, et secuti estis Baalim.\n \n19 Verumtamen nunc mitte, et congrega ad me universum Isra\u00ebl in monte Carmeli, et prophetas Baal quadringentos quinquaginta, prophetasque lucorum quadringentos, qui comedunt de mensa Jezabel.\n20 Misit Achab ad omnes filios Isra\u00ebl, et congregavit prophetas in monte Carmeli.\n21 Accedens autem Elias ad omnem populum, ait: Usquequo claudicatis in duas partes? si Dominus est Deus, sequimini eum: si autem Baal, sequimini illum. Et non respondit ei populus verbum.\n22 Et ait rursus Elias ad populum: Ego remansi propheta Domini solus: prophet\u00e6 autem Baal quadringenti et quinquaginta viri sunt.\n23 Dentur nobis duo boves, et illi eligant sibi bovem unum, et in frustra c\u00e6dentes ponant super ligna, ignem autem non supponant: et ego faciam bovem alterum, et imponam super ligna, ignem autem non supponam.\n24 Invocate nomina deorum vestrorum, et ego invocabo nomen Domini mei: et Deus qui exaudierit per ignem, ipse sit Deus. Respondens omnis populus ait: Optima propositio.\n25 Dixit ergo Elias prophetis Baal: Eligite vobis bovem unum, et facite primi, quia vos plures estis: et invocate nomina deorum vestrorum, ignemque non supponatis.\n26 Qui cum tulissent bovem quem dederat eis, fecerunt: et invocabant nomen Baal de mane usque ad meridiem, dicentes: Baal, exaudi nos. Et non erat vox, nec qui responderet: transiliebantque altare quod fecerant.\n27 Cumque esset jam meridies, illudebat illis Elias, dicens: Clamate voce majore: deus enim est, et forsitan loquitur, aut in diversorio est, aut in itinere, aut certe dormit, ut excitetur.\n28 Clamabant ergo voce magna, et incidebant se juxta ritum suum cultris et lanceolis, donec perfunderentur sanguine.\n29 Postquam autem transiit meridies, et illis prophetantibus venerat tempus quo sacrificium offerri solet, nec audiebatur vox, nec aliquis respondebat, nec attendebat orantes,\n30\u00a0dixit Elias omni populo: Venite ad me.\n Et accedente ad se populo, curavit altare Domini quod destructum fuerat.\n31 Et tulit duodecim lapides juxta numerum tribuum filiorum Jacob, ad quem factus est sermo Domini, dicens: Isra\u00ebl erit nomen tuum.\n32 Et \u00e6dificavit de lapidibus altare in nomine Domini: fecitque aqu\u00e6ductum, quasi per duas aratiunculas in circuitu altaris,\n33 et composuit ligna: divisitque per membra bovem, et posuit super ligna,\n34 et ait: Implete quatuor hydrias aqua, et fundite super holocaustum et super ligna. Rursumque dixit: Etiam secundo hoc facite. Qui cum fecissent secundo, ait: Etiam tertio idipsum facite. Feceruntque tertio,\n35 et currebant aqu\u00e6 circum altare, et fossa aqu\u00e6ductus repleta est.\n36 Cumque jam tempus esset ut offerretur holocaustum, accedens Elias propheta ait: Domine Deus Abraham, et Isaac, et Isra\u00ebl, ostende hodie quia tu es Deus Isra\u00ebl, et ego servus tuus, et juxta pr\u00e6ceptum tuum feci omnia verba h\u00e6c.\n37 Exaudi me, Domine, exaudi me: ut discat populus iste quia tu es Dominus Deus, et tu convertisti cor eorum iterum.\n38 Cecidit autem ignis Domini, et voravit holocaustum, et ligna, et lapides, pulverem quoque, et aquam qu\u00e6 erat in aqu\u00e6ductu lambens.\n39 Quod cum vidisset omnis populus, cecidit in faciem suam, et ait: Dominus ipse est Deus, Dominus ipse est Deus.\n40\u00a0Dixitque Elias ad eos: Apprehendite prophetas Baal, et ne unus quidem effugiat ex eis. Quos cum apprehendissent, duxit eos Elias ad torrentem Cison, et interfecit eos ibi.\n \n41 Et ait Elias ad Achab: Ascende, comede, et bibe, quia sonus mult\u00e6 pluvi\u00e6 est.\n42 Ascendit Achab ut comederet et biberet: Elias autem ascendit in verticem Carmeli, et pronus in terram posuit faciem suam inter genua sua,\n43 et dixit ad puerum suum: Ascende, et prospice contra mare. Qui cum ascendisset, et contemplatus esset, ait: Non est quidquam. Et rursum ait illi: Revertere septem vicibus.\n44 In septima autem vice, ecce nubecula parva quasi vestigium hominis ascendebat de mari. Qui ait: Ascende, et dic Achab: Junge currum tuum et descende, ne occupet te pluvia.\n45 Cumque se verteret huc atque illuc, ecce c\u00e6li contenebrati sunt, et nubes, et ventus, et facta est pluvia grandis. Ascendens itaque Achab, abiit in Jezrahel:\n46 et manus Domini facta est super Eliam, accinctisque lumbis currebat ante Achab, donec veniret in Jezrahel.","title":"Vulgate: 1 Kings: 1 Kings Chapter 18","type":"page"}