{"collection":"Bible & Christianity","html_url":"https://unchartedknowledge.5gfusion.net/browse/bib/vul/kg2009.htm","path":"bib/vul/kg2009.htm","source_url":"https://sacred-texts.com/bib/vul/kg2009.htm","text":"1 Eliseus autem prophetes vocavit unum de filiis prophetarum, et ait illi: Accinge lumbos tuos, et tolle lenticulam olei hanc in manu tua, et vade in Ramoth Galaad.\n2 Cumque veneris illuc, videbis Jehu filium Josaphat filii Namsi: et ingressus suscitabis eum de medio fratrum suorum, et introduces in interius cubiculum.\n3 Tenensque lenticulam olei, fundes super caput ejus, et dices: H\u00e6c dicit Dominus: Unxi te regem super Isra\u00ebl. Aperiesque ostium, et fugies, et non ibi subsistes.\n4 Abiit ergo adolescens puer prophet\u00e6 in Ramoth Galaad,\n5 et ingressus est illuc: ecce autem principes exercitus sedebant: et ait: Verbum mihi ad te, o princeps. Dixitque Jehu: Ad quem ex omnibus nobis? At ille dixit: Ad te, o princeps.\n6 Et surrexit, et ingressus est cubiculum: at ille fudit oleum super caput ejus, et ait: H\u00e6c dicit Dominus Deus Isra\u00ebl: Unxi te regem super populum Domini Isra\u00ebl,\n7 et percuties domum Achab domini tui, et ulciscar sanguinem servorum meorum prophetarum, et sanguinem omnium servorum Domini de manu Jezabel.\n8 Perdamque omnem domum Achab: et interficiam de Achab mingentem ad parietem, et clausum et novissimum in Isra\u00ebl.\n9 Et dabo domum Achab sicut domum Jeroboam filii Nabat, et sicut domum Baasa filii Ahia.\n10 Jezabel quoque comedent canes in agro Jezrahel, nec erit qui sepeliat eam. Aperuitque ostium, et fugit.\n11 Jehu autem egressus est ad servos domini sui: qui dixerunt ei: Rectene sunt omnia? quid venit insanus iste ad te? Qui ait eis: Nostis hominem, et quid locutus sit.\n12 At ille responderunt: Falsum est, sed magis narra nobis. Qui ait eis: H\u00e6c et h\u00e6c locutus est mihi, et ait: H\u00e6c dicit Dominus: Unxi te regem super Isra\u00ebl.\n13\u00a0Festinaverunt itaque, et unusquisque tollens pallium suum posuerunt sub pedibus ejus in similitudinem tribunalis, et cecinerunt tuba, atque dixerunt: Regnavit Jehu.\n \n14 Conjuravit ergo Jehu filius Josaphat filii Namsi contra Joram: porro Joram obsederat Ramoth Galaad, ipse et omnis Isra\u00ebl contra Haza\u00ebl regem Syri\u00e6:\n15 et reversus fuerat ut curaretur in Jezrahel propter vulnera, quia percusserant eum Syri pr\u00e6liantem contra Haza\u00ebl regem Syri\u00e6. Dixitque Jehu: Si placet vobis, nemo egrediatur profugus de civitate, ne vadat, et nuntiet in Jezrahel.\n16 Et ascendit, et profectus est in Jezrahel: Joram enim \u00e6grotabat ibi, et Ochozias rex Juda descenderat ad visitandum Joram.\n17 Igitur speculator qui stabat super turrim Jezrahel, vidit globum Jehu venientis, et ait: Video ego globum. Dixitque Joram: Tolle currum, et mitte in occursum eorum, et dicat vadens: Rectene sunt omnia?\n18 Abiit ergo qui ascenderat currum, in occursum ejus, et ait: H\u00e6c dicit rex: Pacatane sunt omnia? Dixitque Jehu: Quid tibi et paci? transi, et sequere me. Nuntiavit quoque speculator, dicens: Venit nuntius ad eos, et non revertitur.\n19 Misit etiam currum equorum secundum: venitque ad eos, et ait: H\u00e6c dicit rex: Numquid pax est? Et ait Jehu: Quid tibi et paci? transi, et sequere me.\n20 Nuntiavit autem speculator, dicens: Venit usque ad eos, et non revertitur: est autem incessus quasi incessus Jehu filii Namsi, pr\u00e6ceps enim graditur.\n21 Et ait Joram: Junge currum. Junxeruntque currum ejus, et egressus est Joram rex Isra\u00ebl, et Ochozias rex Juda, singuli in curribus suis, egressique sunt in occursum Jehu, et invenerunt eum in agro Naboth Jezrahelit\u00e6.\n22 Cumque vidisset Joram Jehu, dixit: Pax est, Jehu? At ille respondit: Qu\u00e6 pax? adhuc fornicationes Jezabel matris tu\u00e6, et veneficia ejus multa, vigent.\n23 Convertit autem Joram manum suam, et fugiens ait ad Ochoziam: Insidi\u00e6, Ochozia.\n24 Porro Jehu tetendit arcum manu, et percussit Joram inter scapulas: et egressa est sagitta per cor ejus, statimque corruit in curru suo.\n25 Dixitque Jehu ad Badacer ducem: Tolle, projice eum in agro Naboth Jezrahelit\u00e6: memini enim quando ego et tu sedentes in curru sequebamur Achab patrem hujus, quod Dominus onus hoc levaverit super eum, dicens:\n26\u00a0Si non pro sanguine Naboth, et pro sanguine filiorum ejus, quem vidi heri, ait Dominus, reddam tibi in agro isto, dicit Dominus. Nunc ergo tolle, et projice eum in agrum juxta verbum Domini.\n \n27 Ochozias autem rex Juda videns hoc, fugit per viam domus horti: persecutusque est eum Jehu, et ait: Etiam hunc percutite in curru suo. Et percusserunt eum in ascensu Gaver, qui est juxta Jeblaam: qui fugit in Mageddo, et mortuus est ibi.\n28\u00a0Et imposuerunt eum servi ejus super currum suum, et tulerunt in Jerusalem: sepelieruntque eum in sepulchro cum patribus suis in civitate David.\n \n29 Anno undecimo Joram filii Achab, regnavit Ochozias super Judam,\n30 venitque Jehu in Jezrahel. Porro Jezabel, introitu ejus audito, depinxit oculos suos stibio, et ornavit caput suum, et respexit per fenestram\n31 ingredientem Jehu per portam, et ait: Numquid pax potest esse Zambri, qui interfecit dominum suum?\n32 Levavitque Jehu faciem suam ad fenestram, et ait: Qu\u00e6 est ista? et inclinaverunt se ad eum duo vel tres eunuchi.\n33 At ille dixit eis: Pr\u00e6cipitate eam deorsum: et pr\u00e6cipitaverunt eam, aspersusque est sanguine paries, et equorum ungul\u00e6 conculcaverunt eam.\n34 Cumque introgressus esset ut comederet biberetque, ait: Ite, et videte maledictam illam, et sepelite eam: quia filia regis est.\n35 Cumque issent ut sepelirent eam, non invenerunt nisi calvariam, et pedes, et summas manus.\n36 Reversique nuntiaverunt ei. Et ait Jehu: Sermo Domini est, quem locutus est per servum suum Eliam Thesbiten, dicens: In agro Jezrahel comedent canes carnes Jezabel,\n37 et erunt carnes Jezabel sicut stercus super faciem terr\u00e6 in agro Jezrahel, ita ut pr\u00e6tereuntes dicant: H\u00e6ccine est illa Jezabel?","title":"Vulgate: 2 Kings: 2 Kings Chapter 9","type":"page"}