{"collection":"Bible & Christianity","html_url":"https://unchartedknowledge.5gfusion.net/browse/bib/vul/kg2011.htm","path":"bib/vul/kg2011.htm","source_url":"https://sacred-texts.com/bib/vul/kg2011.htm","text":"1 Athalia vero mater Ochozi\u00e6, videns mortuum filium suum, surrexit, et interfecit omne semen regium.\n2 Tollens autem Josaba filia regis Joram, soror Ochozi\u00e6, Joas filium Ochozi\u00e6, furata est eum de medio filiorum regis qui interficiebantur, et nutricem ejus de triclinio: et abscondit eum a facie Athali\u00e6 ut non interficeretur.\n3\u00a0Eratque cum ea sex annis clam in domo Domini: porro Athalia regnavit super terram.\n \n4 Anno autem septimo misit Jojada, et assumens centuriones et milites, introduxit ad se in templum Domini, pepigitque cum eis f\u0153dus: et adjurans eos in domo Domini, ostendit eis filium regis:\n5 et pr\u00e6cepit illis, dicens: Iste est sermo, quem facere debetis:\n6 tertia pars vestrum intro\u00ebat sabbato, et observet excubias domus regis. Tertia autem pars sit ad portam Sur, et tertia pars sit ad portam qu\u00e6 est post habitaculum scutariorum: et custodietis excubias domus Messa.\n7 Du\u00e6 vero partes e vobis, omnes egredientes sabbato, custodiant excubias domus Domini circa regem.\n8 Et vallabitis eum, habentes arma in manibus vestris: si quis autem ingressus fuerit septum templi, interficiatur: eritisque cum rege intro\u00ebunte et egrediente.\n9 Et fecerunt centuriones juxta omnia qu\u00e6 pr\u00e6ceperat eis Jojada sacerdos: et assumentes singuli viros suos qui ingrediebantur sabbato, cum his qui egrediebantur sabbato, venerunt ad Jojadam sacerdotem.\n10 Qui dedit eis hastas et arma regis David, qu\u00e6 erant in domo Domini.\n11 Et steterunt singuli habentes arma in manu sua, a parte templi dextera usque ad partem sinistram altaris et \u00e6dis, circum regem.\n12 Produxitque filium regis, et posuit super eum diadema et testimonium: feceruntque eum regem, et unxerunt: et plaudentes manu, dixerunt: Vivat rex.\n13 Audivit autem Athalia vocem populi currentis: et ingressa ad turbas in templum Domini,\n14 vidit regem stantem super tribunal juxta morem, et cantores, et tubas prope eum, omnemque populum terr\u00e6 l\u00e6tantem, et canentem tubis: et scidit vestimenta sua, clamavitque: Conjuratio, conjuratio.\n15 Pr\u00e6cepit autem Jojada centurionibus qui erant super exercitum, et ait eis: Educite eam extra septa templi, et quicumque eam secutus fuerit, feriatur gladio. Dixerat enim sacerdos: Non occidatur in templo Domini.\n16 Imposueruntque ei manus, et impegerunt eam per viam introitus equorum, juxta palatium, et interfecta est ibi.\n17 Pepigit ergo Jojada f\u0153dus inter Dominum, et inter regem, et inter populum, ut esset populus Domini: et inter regem et populum.\n18 Ingressusque est omnis populus terr\u00e6 templum Baal, et destruxerunt aras ejus, et imagines contriverunt valide: Mathan quoque sacerdotem Baal occiderunt coram altari. Et posuit sacerdos custodias in domo Domini.\n19 Tulitque centuriones, et Cerethi et Phelethi legiones, et omnem populum terr\u00e6, deduxeruntque regem de domo Domini: et venerunt per viam port\u00e6 scutariorum in palatium, et sedit super thronum regum.\n20 L\u00e6tatusque est omnis populus terr\u00e6, et civitas conquievit: Athalia autem occisa est gladio in domo regis.\n21 Septemque annorum erat Joas, cum regnare c\u0153pisset.","title":"Vulgate: 2 Kings: 2 Kings Chapter 11","type":"page"}