{"collection":"Bible & Christianity","html_url":"https://unchartedknowledge.5gfusion.net/browse/bib/vul/kg2020.htm","path":"bib/vul/kg2020.htm","source_url":"https://sacred-texts.com/bib/vul/kg2020.htm","text":"1 In diebus illis \u00e6grotavit Ezechias usque ad mortem: et venit ad eum Isaias filius Amos propheta, dixitque ei: H\u00e6c dicit Dominus Deus: Pr\u00e6cipe domui tu\u00e6: morieris enim tu, et non vives.\n2 Qui convertit faciem suam ad parietem, et oravit Dominum, dicens:\n3 Obsecro, Domine: memento, qu\u00e6so, quomodo ambulaverim coram te in veritate, et in corde perfecto, et quod placitum est coram te fecerim. Flevit itaque Ezechias fletu magno.\n4 Et antequam egrederetur Isaias mediam partem atrii, factus est sermo Domini ad eum, dicens:\n5 Revertere, et dic Ezechi\u00e6 duci populi mei: H\u00e6c dicit Dominus Deus David patris tui: Audivi orationem tuam, et vidi lacrimas tuas, et ecce sanavi te: die tertio ascendes templum Domini.\n6 Et addam diebus tuis quindecim annos: sed et de manu regis Assyriorum liberabo te, et civitatem hanc: et protegam urbem istam propter me, et propter David servum meum.\n7 Dixitque Isaias: Afferte massam ficorum. Quam cum attulissent, et posuissent super ulcus ejus, curatus est.\n8 Dixerat autem Ezechias ad Isaiam: Quod erit signum, quia Dominus me sanabit, et quia ascensurus sum die tertia templum Domini?\n9 Cui ait Isaias: Hoc erit signum a Domino quod facturus sit Dominus sermonem quem locutus est: vis ut ascendat umbra decem lineis, an ut revertatur totidem gradibus?\n10 Et ait Ezechias: Facile est umbram crescere decem lineis: nec hoc volo ut fiat, sed ut revertatur retrorsum decem gradibus.\n11\u00a0Invocavit itaque Isaias propheta Dominum, et reduxit umbram per lineas quibus jam descenderat in horologio Achaz, retrorsum decem gradibus.\n \n12 In tempore illo misit Berodach Baladan, filius Baladan, rex Babyloniorum, litteras et munera ad Ezechiam: audierat enim quod \u00e6grotasset Ezechias.\n13 L\u00e6tatus est autem in adventu eorum Ezechias, et ostendit eis domum aromatum, et aurum et argentum, et pigmenta varia, unguenta quoque, et domum vasorum suorum, et omnia qu\u00e6 habere poterat in thesauris suis. Non fuit quod non monstraret eis Ezechias in domo sua, et in omni potestate sua.\n14 Venit autem Isaias propheta ad regem Ezechiam, dixitque ei: Quid dixerunt viri isti? aut unde venerunt ad te? Cui ait Ezechias: De terra longinqua venerunt ad me, de Babylone.\n15 At ille respondit: Quid viderunt in domo tua? Ait Ezechias: Omnia qu\u00e6cumque sunt in domo mea, viderunt: nihil est quod non monstraverim eis in thesauris meis.\n16 Dixit itaque Isaias Ezechi\u00e6: Audi sermonem Domini:\n17 Ecce dies venient, et auferentur omnia qu\u00e6 sunt in domo tua, et qu\u00e6 condiderunt patres tui usque in diem hanc, in Babylonem: non remanebit quidquam, ait Dominus.\n18 Sed et de filiis tuis qui egredientur ex te, quos generabis, tollentur, et erunt eunuchi in palatio regis Babylonis.\n19\u00a0Dixit Ezechias ad Isaiam: Bonus sermo Domini quem locutus es: sit pax et veritas in diebus meis.\n \n20 Reliqua autem sermonum Ezechi\u00e6, et omnis fortitudo ejus, et quomodo fecerit piscinam et aqu\u00e6ductum, et introduxerit aquas in civitatem, nonne h\u00e6c scripta sunt in libro sermonum dierum regum Juda?\n21 Dormivitque Ezechias cum patribus suis, et regnavit Manasses filius ejus pro eo.","title":"Vulgate: 2 Kings: 2 Kings Chapter 20","type":"page"}