{"collection":"Bible & Christianity","html_url":"https://unchartedknowledge.5gfusion.net/browse/bib/vul/kg2022.htm","path":"bib/vul/kg2022.htm","source_url":"https://sacred-texts.com/bib/vul/kg2022.htm","text":"1 Octo annorum erat Josias cum regnare c\u0153pisset: triginta et uno anno regnavit in Jerusalem: nomen matris ejus Idida filia Hadaia de Besecath.\n2 Fecitque quod placitum erat coram Domino, et ambulavit per omnes vias David patris sui: non declinavit ad dexteram, sive ad sinistram.\n3 Anno autem octavodecimo regis Josi\u00e6, misit rex Saphan filium Aslia filii Messulam scribam templi Domini, dicens ei:\n4 Vade ad Helciam sacerdotem magnum, ut confletur pecunia qu\u00e6 illata est in templum Domini, quam collegerunt janitores templi a populo:\n5 deturque fabris per pr\u00e6positos domus Domini, qui et distribuant eam his qui operantur in templo Domini, ad instauranda sartatecta templi:\n6 tignariis videlicet et c\u00e6mentariis, et iis qui interrupta componunt: et ut emantur ligna, et lapides de lapicidinis, ad instaurandum templum Domini.\n7\u00a0Verumtamen non supputetur eis argentum quod accipiunt, sed in potestate habeant, et in fide.\n \n8 Dixit autem Helcias pontifex ad Saphan scribam: Librum legis reperi in domo Domini. Deditque Helcias volumen Saphan, qui et legit illud.\n9 Venit quoque Saphan scriba ad regem, et renuntiavit ei quod pr\u00e6ceperat, et ait: Conflaverunt servi tui pecuniam qu\u00e6 reperta est in domo Domini, et dederunt ut distribueretur fabris a pr\u00e6fectis operum templi Domini.\n10 Narravit quoque Saphan scriba regi, dicens: Librum dedit mihi Helcias sacerdos. Quem cum legisset Saphan coram rege,\n11 et audisset rex verba libri legis Domini, scidit vestimenta sua.\n12 Et pr\u00e6cepit Helci\u00e6 sacerdoti, et Ahicam filio Saphan, et Achobor filio Micha, et Saphan scrib\u00e6, et Asai\u00e6 servo regis, dicens:\n13 Ite et consulite Dominum super me, et super populo, et super omni Juda, de verbis voluminis istius, quod inventum est: magna enim ira Domini succensa est contra nos, quia non audierunt patres nostri verba libri hujus, ut facerent omne quod scriptum est nobis.\n14 Ierunt itaque Helcias sacerdos, et Ahicam, et Achobor, et Sapham, et Asaia, ad Holdam prophetidem, uxorem Sellum filii Thecu\u00e6 filii Araas custodis vestium, qu\u00e6 habitabat in Jerusalem in Secunda: locutique sunt ad eam.\n15 Et illa respondit eis: H\u00e6c dicit Dominus Deus Isra\u00ebl: Dicite viro qui misit vos ad me:\n16 H\u00e6c dicit Dominus: Ecce ego adducam mala super locum istum, et super habitatores ejus, omnia verba legis qu\u00e6 legit rex Juda:\n17 quia dereliquerunt me, et sacrificaverunt diis alienis, irritantes me in cunctis operibus manuum suarum: et succendetur indignatio mea in loco hoc, et non extinguetur.\n18 Regi autem Juda, qui misit vos ut consuleretis Dominum, sic dicetis: H\u00e6c dicit Dominus Deus Isra\u00ebl: Pro eo quod audisti verba voluminis,\n19 et perterritum est cor tuum, et humiliatus es coram Domino, auditis sermonibus contra locum istum et habitatores ejus, quod videlicet fierent in stuporem et in maledictum: et scidisti vestimenta tua, et flevisti coram me, et ego audivi, ait Dominus:\n20 idcirco colligam te ad patres tuos, et colligeris ad sepulchrum tuum in pace, ut non videant oculi tui omnia mala qu\u00e6 inducturus sum super locum istum.","title":"Vulgate: 2 Kings: 2 Kings Chapter 22","type":"page"}