{"collection":"Bible & Christianity","html_url":"https://unchartedknowledge.5gfusion.net/browse/bib/vul/lam003.htm","path":"bib/vul/lam003.htm","source_url":"https://sacred-texts.com/bib/vul/lam003.htm","text":"Sacred Texts\u00a0\n Bible\u00a0\n Index\u00a0\n \n \n Polyglot\u00a0\n KJV\u00a0\n Sep\u00a0\n Tan\u00a0\n \n \n \nLamentations Index\n \u00a0\n Previous\u00a0\n Next\u00a0\n \n \n \n Vulgate (Latin): Lamentations Chapter 3\n1\u00a0[Ego vir videns paupertatem meam\n in virga indignationis ejus.\n 2\u00a0Me minavit, et adduxit in tenebras,\n et non in lucem.\n 3\u00a0Tantum in me vertit et convertit\n manum suam tota die.\n 4\u00a0Vetustam fecit pellem meam et carnem meam;\n contrivit ossa mea.\n 5\u00a0\u00c6dificavit in gyro meo, et circumdedit me\n felle et labore.\n 6\u00a0In tenebrosis collocavit me,\n quasi mortuos sempiternos.\n 7\u00a0Circum\u00e6dificavit adversum me, ut non egrediar;\n aggravavit compedem meum.\n 8\u00a0Sed et cum clamavero, et rogavero,\n exclusit orationem meam.\n 9\u00a0Conclusit vias meas lapidibus quadris;\n semitas meas subvertit.\n 10\u00a0Ursus insidians factus est mihi,\n leo in absconditis.\n 11\u00a0Semitas meas subvertit, et confregit me;\n posuit me desolatam.\n 12\u00a0Tetendit arcum suum, et posuit me\n quasi signum ad sagittam.\n 13\u00a0Misit in renibus meis\n filias pharetr\u00e6 su\u00e6.\n 14\u00a0Factus sum in derisum omni populo meo,\n canticum eorum tota die.\n 15\u00a0Replevit me amaritudinibus;\n inebriavit me absinthio.\n 16\u00a0Et fregit ad numerum dentes meos;\n cibavit me cinere.\n 17\u00a0Et repulsa est a pace anima mea;\n oblitus sum bonorum.\n 18\u00a0Et dixi: Periit finis meus,\n et spes mea a Domino.\n 19\u00a0Recordare paupertatis, et transgressionis me\u00e6,\n absinthii et fellis.\n 20\u00a0Memoria memor ero, et tabescet\n in me anima mea.\n 21\u00a0H\u00e6c recolens in corde meo,\n ideo sperabo.\n 22\u00a0Misericordi\u00e6 Domini, quia non sumus consumpti;\n quia non defecerunt miserationes ejus.\n 23\u00a0Novi diluculo,\n multa est fides tua.\n 24\u00a0Pars mea Dominus, dixit anima mea;\n propterea exspectabo eum.\n 25\u00a0Bonus est Dominus sperantibus in eum,\n anim\u00e6 qu\u00e6renti illum.\n 26\u00a0Bonum est pr\u00e6stolari cum silentio\n salutare Dei.\n 27\u00a0Bonum est viro cum portaverit jugum\n ab adolescentia sua.\n 28\u00a0Sedebit solitarius, et tacebit,\n quia levavit super se.\n 29\u00a0Ponet in pulvere os suum,\n si forte sit spes.\n 30\u00a0Dabit percutienti se maxillam:\n saturabitur opprobriis.\n 31\u00a0Quia non repellet\n in sempiternum Dominus.\n 32\u00a0Quia si abjecit, et miserebitur,\n secundum multitudinem misericordiarum suarum.\n 33\u00a0Non enim humiliavit ex corde suo\n et abjecit filios hominum.\n 34\u00a0Ut conteret sub pedibus suis\n omnes vinctos terr\u00e6.\n 35\u00a0Ut declinaret judicium viri\n in conspectu vultus Altissimi.\n 36\u00a0Ut perverteret hominem in judicio suo;\n Dominus ignoravit.\n 37\u00a0Quis est iste qui dixit ut fieret,\n Domino non jubente?\n 38\u00a0Ex ore Altissimi non egredientur\n nec mala nec bona?\n 39\u00a0Quid murmuravit homo vivens,\n vir pro peccatis suis?\n 40\u00a0Scrutemur vias nostras, et qu\u00e6ramus,\n et revertamur ad Dominum.\n 41\u00a0Levemus corda nostra cum manibus\n ad Dominum in c\u00e6los.\n 42\u00a0Nos inique egimus, et ad iracundiam provocavimus;\n idcirco tu inexorabilis es.\n 43\u00a0Operuisti in furore, et percussisti nos;\n occidisti, nec pepercisti.\n 44\u00a0Opposuisti nubem tibi,\n ne transeat oratio.\n 45\u00a0Eradicationem et abjectionem posuisti me\n in medio populorum.\n 46\u00a0Aperuerunt super nos os suum\n omnes inimici.\n 47\u00a0Formido et laqueus facta est nobis\n vaticinatio, et contritio.\n 48\u00a0Divisiones aquarum deduxit oculus meus,\n in contritione fili\u00e6 populi mei.\n 49\u00a0Oculus meus afflictus est, nec tacuit,\n eo quod non esset requies.\n 50\u00a0Donec respiceret et videret\n Dominus de c\u00e6lis.\n 51\u00a0Oculus meus depr\u00e6datus est animam meam\n in cunctis filiabus urbis me\u00e6.\n 52\u00a0Venatione ceperunt me quasi avem\n inimici mei gratis.\n 53\u00a0Lapsa est in lacum vita mea,\n et posuerunt lapidem super me.\n 54\u00a0Inundaverunt aqu\u00e6 super caput meum;\n dixi: Perii.\n 55\u00a0Invocavi nomen tuum, Domine,\n de lacu novissimo.\n 56\u00a0Vocem meam audisti; ne avertas aurem tuam\n a singultu meo et clamoribus.\n 57\u00a0Appropinquasti in die quando invocavi te;\n dixisti: Ne timeas.\n 58\u00a0Judicasti, Domine, causam anim\u00e6 me\u00e6,\n redemptor vit\u00e6 me\u00e6.\n 59\u00a0Vidisti, Domine, iniquitatem illorum adversum me:\n judica judicium meum.\n 60\u00a0Vidisti omnem furorem,\n universas cogitationes eorum adversum me.\n 61\u00a0Audisti opprobrium eorum, Domine,\n omnes cogitationes eorum adversum me.\n 62\u00a0Labia insurgentium mihi, et meditationes eorum\n adversum me tota die.\n 63\u00a0Sessionem eorum et resurrectionem eorum vide;\n ego sum psalmus eorum.\n 64\u00a0Redes eis vicem, Domine,\n juxta opera manuum suarum.\n 65\u00a0Dabis eis scutum cordis,\n laborem tuum.\n 66\u00a0Persequeris in furore, et conteres eos\n sub c\u00e6lis, Domine.]\n \n \n Next: Lamentations Chapter 4","title":"Vulgate: Lamentations: Lamentations Chapter 3","type":"page"}