{"collection":"Bible & Christianity","html_url":"https://unchartedknowledge.5gfusion.net/browse/bib/vul/lam005.htm","path":"bib/vul/lam005.htm","source_url":"https://sacred-texts.com/bib/vul/lam005.htm","text":"1\u00a0[Recordare, Domine, quid acciderit nobis;\n intuere et respice opprobrium nostrum.\n2\u00a0H\u00e6reditas nostra versa est ad alienos,\n domus nostr\u00e6 ad extraneos.\n3\u00a0Pupilli facti sumus absque patre,\n matres nostr\u00e6 quasi vidu\u00e6.\n4\u00a0Aquam nostram pecunia bibimus;\n ligna nostra pretio comparavimus.\n5\u00a0Cervicibus nostris minabamur,\n lassis non dabatur requies.\n6\u00a0\u00c6gypto dedimus manum et Assyriis,\n ut saturaremur pane.\n7\u00a0Patres nostri peccaverunt, et non sunt:\n et nos iniquitates eorum portavimus.\n8\u00a0Servi dominati sunt nostri:\n non fuit qui redimeret de manu eorum.\n9\u00a0In animabus nostris afferebamus panem nobis,\n a facie gladii in deserto.\n10\u00a0Pellis nostra quasi clibanus exusta est,\n a facie tempestatum famis.\n11\u00a0Mulieres in Sion humiliaverunt,\n et virgines in civitatibus Juda.\n12\u00a0Principes manu suspensi sunt;\n facies senum non erubuerunt.\n13\u00a0Adolescentibus impudice abusi sunt,\n et pueri in ligno corruerunt.\n14\u00a0Senes defecerunt de portis,\n juvenes de choro psallentium.\n15\u00a0Defecit gaudium cordis nostri;\n versus est in luctum chorus noster.\n16\u00a0Cecidit corona capitis nostri:\n v\u00e6 nobis, quia peccavimus!\n17\u00a0Propterea m\u0153stum factum est cor nostrum;\n ideo contenebrati sunt oculi nostri,\n18\u00a0propter montem Sion quia disperiit;\n vulpes ambulaverunt in eo.\n19\u00a0Tu autem, Domine, in \u00e6ternum permanebis,\n solium tuum in generationem et generationem.\n20\u00a0Quare in perpetuum oblivisceris nostri,\n derelinques nos in longitudine dierum?\n21\u00a0Converte nos, Domine, ad te, et convertemur;\n innova dies nostros, sicut a principio.\n22\u00a0Sed projiciens repulisti nos:\n iratus es contra nos vehementer.]","title":"Vulgate: Lamentations: Lamentations Chapter 5","type":"page"}