{"collection":"Bible & Christianity","html_url":"https://unchartedknowledge.5gfusion.net/browse/bib/vul/lev003.htm","path":"bib/vul/lev003.htm","source_url":"https://sacred-texts.com/bib/vul/lev003.htm","text":"1 Quod si hostia pacificorum fuerit ejus oblatio, et de bobus voluerit offerre, marem sive feminam, immaculata offeret coram Domino.\n2 Ponetque manum super caput victim\u00e6 su\u00e6, qu\u00e6 immolabitur in introitu tabernaculi testimonii, fundentque filii Aaron sacerdotes sanguinem per altaris circuitum.\n3 Et offerent de hostia pacificorum in oblationem Domino, adipem qui operit vitalia, et quidquid pinguedinis est intrinsecus:\n4 duos renes cum adipe quo teguntur ilia, et reticulum jecoris cum renunculis.\n5 Adolebuntque ea super altare in holocaustum, lignis igne supposito, in oblationem suavissimi odoris Domino.\n6 Si vero de ovibus fuerit ejus oblatio et pacificorum hostia, sive masculum obtulerit, sive feminam, immaculata erunt.\n7 Si agnum obtulerit coram Domino,\n8 ponet manum suam super caput victim\u00e6 su\u00e6: qu\u00e6 immolabitur in vestibulo tabernaculi testimonii: fundentque filii Aaron sanguinem ejus per circuitum altaris.\n9 Et offerent de pacificorum hostia sacrificium Domino: adipem et caudam totam\n10 cum renibus, et pinguedinem qu\u00e6 operit ventrem atque universa vitalia, et utrumque renunculum cum adipe qui est juxta ilia, reticulumque jecoris cum renunculis.\n11 Et adolebit ea sacerdos super altare in pabulum ignis et oblationis Domini.\n12 Si capra fuerit ejus oblatio, et obtulerit eam Domino,\n13 ponet manum suam super caput ejus: immolabitque eam in introitu tabernaculi testimonii, et fundent filii Aaron sanguinem ejus per altaris circuitum.\n14 Tollentque ex ea in pastum ignis dominici, adipem qui operit ventrem, et qui tegit universa vitalia:\n15 duos renunculos cum reticulo, quod est super eos juxta ilia, et arvinam jecoris cum renunculis:\n16 adolebitque ea super altare sacerdos in alimoniam ignis, et suavissimi odoris. Omnis adeps, Domini erit\n17 jure perpetuo in generationibus, et cunctis habitaculis vestris: nec sanguinem nec adipem omnino comedetis.","title":"Vulgate: Leviticus: Leviticus Chapter 3","type":"page"}