{"collection":"Bible & Christianity","html_url":"https://unchartedknowledge.5gfusion.net/browse/bib/vul/lev005.htm","path":"bib/vul/lev005.htm","source_url":"https://sacred-texts.com/bib/vul/lev005.htm","text":"1 Si peccaverit anima, et audierit vocem jurantis, testisque fuerit quod aut ipse vidit, aut conscius est: nisi indicaverit, portabit iniquitatem suam.\n2 Anima qu\u00e6 tetigerit aliquid immundum, sive quod occisum a bestia est, aut per se mortuum, aut quodlibet aliud reptile: et oblita fuerit immunditi\u00e6 su\u00e6, rea est, et deliquit:\n3\u00a0et si tetigerit quidquam de immunditia hominis juxta omnem impuritatem, qua pollui solet, oblitaque cognoverit postea, subjacebit delicto.\n \n4 Anima, qu\u00e6 juraverit, et protulerit labiis suis, ut vel male quid faceret, vel bene, et idipsum juramento et sermone firmaverit, oblitaque postea intellexerit delictum suum,\n5 agat p\u0153nitentiam pro peccato,\n6 et offerat de gregibus agnam sive capram, orabitque pro ea sacerdos et pro peccato ejus.\n7 Sin autem non potuerit offerre pecus, offerat duos turtures, vel duos pullos columbarum Domino, unum pro peccato, et alterum in holocaustum,\n8 dabitque eos sacerdoti: qui primum offerens pro peccato, retorquebit caput ejus ad pennulas, ita ut collo h\u00e6reat, et non penitus abrumpatur.\n9 Et asperget de sanguine ejus parietem altaris; quidquid autem reliquum fuerit, faciet distillare ad fundamentum ejus, quia pro peccato est.\n10 Alterum vero adolebit in holocaustum, ut fieri solet: rogabitque pro eo sacerdos et pro peccato ejus, et dimittetur ei.\n11 Quod si non quiverit manus ejus duos offerre turtures, aut duos pullos columbarum, offeret pro peccato suo simil\u00e6 partem ephi decimam: non mittet in eam oleum, nec thuris aliquid imponet, quia pro peccato est.\n12 Tradetque eam sacerdoti: qui plenum ex ea pugillum hauriens, cremabit super altare in monimentum ejus qui obtulerit,\n13\u00a0rogans pro illo et expians: reliquam vero partem ipse habebit in munere.\n \n14 Locutusque est Dominus ad Moysen, dicens:\n15 Anima si pr\u00e6varicans c\u00e6remonias, per errorem, in his qu\u00e6 Domino sunt sanctificata, peccaverit, offeret pro delicto suo arietem immaculatum de gregibus, qui emi potest duobus siclis, juxta pondus sanctuarii:\n16 ipsumque quod intulit damni restituet, et quintam partem ponet supra, tradens sacerdoti, qui rogabit pro eo offerens arietem, et dimittetur ei.\n17 Anima si peccaverit per ignorantiam, feceritque unum ex his qu\u00e6 Domini lege prohibentur, et peccati rea intellexerit iniquitatem suam,\n18 offeret arietem immaculatum de gregibus sacerdoti, juxta mensuram \u00e6stimationemque peccati: qui orabit pro eo, quia nesciens fecerit: et dimittetur ei,\n19 quia per errorem deliquit in Dominum.","title":"Vulgate: Leviticus: Leviticus Chapter 5","type":"page"}