{"collection":"Bible & Christianity","html_url":"https://unchartedknowledge.5gfusion.net/browse/bib/vul/lev012.htm","path":"bib/vul/lev012.htm","source_url":"https://sacred-texts.com/bib/vul/lev012.htm","text":"1 Locutusque est Dominus ad Moysen, dicens:\n2 Loquere filiis Isra\u00ebl, et dices ad eos: Mulier, si suscepto semine pepererit masculum, immunda erit septem diebus juxta dies separationis menstru\u00e6.\n3 Et die octavo circumcidetur infantulus:\n4 ipsa vero triginta tribus diebus manebit in sanguine purificationis su\u00e6. Omne sanctum non tanget, nec ingredietur in sanctuarium, donec impleantur dies purificationis su\u00e6.\n5 Sin autem feminam pepererit, immunda erit duabus hebdomadibus juxta ritum fluxus menstrui, et sexaginta sex diebus manebit in sanguine purificationis su\u00e6.\n6 Cumque expleti fuerint dies purificationis su\u00e6, pro filio sive pro filia, deferet agnum anniculum in holocaustum, et pullum columb\u00e6 sive turturem pro peccato, ad ostium tabernaculi testimonii, et tradet sacerdoti,\n7 qui offeret illa coram Domino, et orabit pro ea, et sic mundabitur a profluvio sanguinis sui: ista est lex parientis masculum aut feminam.\n8 Quod si non invenerit manus ejus, nec potuerit offerre agnum, sumet duos turtures vel duos pullos columbarum, unum in holocaustum, et alterum pro peccato: orabitque pro ea sacerdos, et sic mundabitur.","title":"Vulgate: Leviticus: Leviticus Chapter 12","type":"page"}