{"collection":"Bible & Christianity","html_url":"https://unchartedknowledge.5gfusion.net/browse/bib/vul/lev015.htm","path":"bib/vul/lev015.htm","source_url":"https://sacred-texts.com/bib/vul/lev015.htm","text":"1 Locutusque est Dominus ad Moysen et Aaron, dicens:\n2 Loquimini filiis Isra\u00ebl, et dicite eis: Vir, qui patitur fluxum seminis, immundus erit.\n3 Et tunc judicabitur huic vitio subjacere, cum per singula momenta adh\u00e6serit carni ejus, atque concreverit f\u0153dus humor.\n4 Omne stratum, in quo dormierit, immundum erit, et ubicumque sederit.\n5 Si quis hominum tetigerit lectum ejus, lavabit vestimenta sua, et ipse lotus aqua, immundus erit usque ad vesperum.\n6 Si sederit ubi ille sederat, et ipse lavabit vestimenta sua: et lotus aqua, immundus erit usque ad vesperum.\n7 Qui tetigerit carnem ejus, lavabit vestimenta sua: et ipse lotus aqua, immundus erit usque ad vesperum.\n8 Si salivam hujuscemodi homo jecerit super eum qui mundus est, lavabit vestimenta sua: et lotus aqua, immundus erit usque ad vesperum.\n9 Sagma, super quo sederit, immundum erit:\n10 et quidquid sub eo fuerit, qui fluxum seminis patitur, pollutum erit usque ad vesperum. Qui portaverit horum aliquid, lavabit vestimenta sua: et ipse lotus aqua, immundus erit usque ad vesperum.\n11 Omnis, quem tetigerit qui talis est, non lotis ante manibus, lavabit vestimenta sua, et lotus aqua, immundus erit usque ad vesperum.\n12\u00a0Vas fictile quod tetigerit confringetur: vas autem ligneum lavabitur aqua.\n \n13 Si sanatus fuerit qui hujuscemodi sustinet passionem, numerabit septem dies post emundationem sui, et lotis vestibus et toto corpore in aquis viventibus, erit mundus.\n14 Die autem octavo sumet duos turtures, aut duos pullos columb\u00e6, et veniet in conspectum Domini ad ostium tabernaculi testimonii, dabitque eos sacerdoti:\n15 qui faciet unum pro peccato et alterum in holocaustum: rogabitque pro eo coram Domino, ut emundetur a fluxi seminis sui.\n16 Vir de quo egreditur semen coitus, lavabit aqua omne corpus suum: et immundus erit usque ad vesperum.\n17 Vestem et pellem, quam habuerit, lavabit aqua, et immunda erit usque ad vesperum.\n18\u00a0Mulier, cum qua coierit, lavabitur aqua, et immunda erit usque ad vesperum.\n \n19 Mulier, qu\u00e6 redeunte mense patitur fluxum sanguinis, septem diebus separabitur.\n20 Omnis qui tetigerit eam, immundus erit usque ad vesperum:\n21 et in quo dormierit vel sederit diebus separationis su\u00e6, polluetur.\n22 Qui tetigerit lectum ejus, lavabit vestimenta sua: et ipse lotus aqua, immundus erit usque ad vesperum.\n23 Omne vas, super quo illa sederit, quisquis attigerit, lavabit vestimenta sua: et ipse lotus aqua, pollutus erit usque ad vesperum.\n24 Si coierit cum ea vir tempore sanguinis menstrualis, immundus erit septem diebus: et omne stratum, in quo dormierit, polluetur.\n25 Mulier, qu\u00e6 patitur multis diebus fluxum sanguinis non in tempore menstruali, vel qu\u00e6 post menstruum sanguinem fluere non cessat, quamdiu subjacet huic passioni, immunda erit quasi sit in tempore menstruo.\n26 Omne stratum, in quo dormierit, et vas in quo sederit, pollutum erit.\n27 Quicumque tetigerit ea, lavabit vestimenta sua: et ipse lotus aqua, immundus erit usque ad vesperam.\n28 Si steterit sanguis, et fluere cessaverit, numerabit septem dies purificationis su\u00e6:\n29 et die octavo offeret pro se sacerdoti duos turtures, aut duos pullos columbarum, ad ostium tabernaculi testimonii:\n30 qui unum faciet pro peccato, et alterum in holocaustum, rogabitque pro ea coram Domino, et pro fluxu immunditi\u00e6 ejus.\n31 Docebitis ergo filios Isra\u00ebl ut caveant immunditiam, et non moriantur in sordibus suis, cum polluerint tabernaculum meum quod est inter eos.\n32 Ista est lex ejus, qui patitur fluxum seminis, et qui polluitur coitu,\n33 et qu\u00e6 menstruis temporibus separatur, vel qu\u00e6 jugi fluit sanguine, et hominis qui dormierit cum ea.","title":"Vulgate: Leviticus: Leviticus Chapter 15","type":"page"}