{"collection":"Bible & Christianity","html_url":"https://unchartedknowledge.5gfusion.net/browse/bib/vul/lev018.htm","path":"bib/vul/lev018.htm","source_url":"https://sacred-texts.com/bib/vul/lev018.htm","text":"1 Locutus est Dominus ad Moysen, dicens:\n2 Loquere filiis Isra\u00ebl, et dices ad eos: Ego Dominus Deus vester:\n3 juxta consuetudinem terr\u00e6 \u00c6gypti, in qua habitastis, non facietis: et juxta morem regionis Chanaan, ad quam ego introducturus sum vos, non agetis, nec in legitimis eorum ambulabitis.\n4 Facietis judicia mea, et pr\u00e6cepta mea servabitis, et ambulabitis in eis. Ego Dominus Deus vester.\n5 Custodite leges meas atque judicia, qu\u00e6 faciens homo, vivet in eis. Ego Dominus.\n6 Omnis homo ad proximam sanguinis sui non accedet, ut revelet turpitudinem ejus. Ego Dominus.\n7 Turpitudinem patris tui et turpitudinem matris tu\u00e6 non discooperies: mater tua est: non revelabis turpitudinem ejus.\n8 Turpitudinem uxoris patris tui non discooperies: turpitudo enim patris tui est.\n9 Turpitudinem sororis tu\u00e6 ex patre sive ex matre, qu\u00e6 domi vel foris genita est, non revelabis.\n10 Turpitudinem fili\u00e6 filii tui vel neptis ex filia non revelabis: quia turpitudo tua est.\n11 Turpitudinem fili\u00e6 uxoris patris tui, quam peperit patri tuo, et est soror tua, non revelabis.\n12 Turpitudinem sororis patris tui non discooperies: quia caro est patris tui.\n13 Turpitudinem sororis matris tu\u00e6 non revelabis, eo quod caro sit matris tu\u00e6.\n14 Turpitudinem patrui tui non revelabis, nec accedes ad uxorem ejus, qu\u00e6 tibi affinitate conjungitur.\n15 Turpitudinem nurus tu\u00e6 non revelabis, quia uxor filii tui est: nec discooperies ignominiam ejus.\n16 Turpitudinem uxoris fratris tui non revelabis: quia turpitudo fratris tui est.\n17 Turpitudinem uxoris tu\u00e6 et fili\u00e6 ejus non revelabis. Filiam filii ejus, et filiam fili\u00e6 illius non sumes, ut reveles ignominiam ejus: quia caro illius sunt, et talis coitus incestus est.\n18\u00a0Sororem uxoris tu\u00e6 in pellicatum illius non accipies, nec revelabis turpitudinem ejus adhuc illa vivente.\n \n19 Ad mulierem qu\u00e6 patitur menstrua non accedes, nec revelabis f\u0153ditatem ejus.\n20 Cum uxore proximi tui non coibis, nec seminis commistione maculaberis.\n21 De semine tuo non dabis ut consecretur idolo Moloch, nec pollues nomen Dei tui. Ego Dominus.\n22 Cum masculo non commiscearis coitu femineo, quia abominatio est.\n23 Cum omni pecore non coibis, nec maculaberis cum eo. Mulier non succumbet jumento, nec miscebitur ei, quia scelus est.\n24 Nec polluamini in omnibus his quibus contaminat\u00e6 sunt univers\u00e6 gentes, quas ego ejiciam ante conspectum vestrum,\n25 et quibus polluta est terra: cujus ego scelera visitabo, ut evomat habitatores suos.\n26 Custodite legitima mea atque judicia, et non faciatis ex omnibus abominationibus istis, tam indigena quam colonus qui peregrinantur apud vos.\n27 Omnes enim execrationes istas fecerunt accol\u00e6 terr\u00e6 qui fuerunt ante vos, et polluerunt eam.\n28 Cavete ergo ne et vos similiter evomat, cum paria feceritis, sicut evomuit gentem, qu\u00e6 fuit ante vos.\n29 Omnis anima, qu\u00e6 fecerit de abominationibus his quippiam, peribit de medio populi sui.\n30 Custodite mandata mea. Nolite facere qu\u00e6 fecerunt hi qui fuerunt ante vos, et ne polluamini in eis. Ego Dominus Deus vester.","title":"Vulgate: Leviticus: Leviticus Chapter 18","type":"page"}