{"collection":"Bible & Christianity","html_url":"https://unchartedknowledge.5gfusion.net/browse/bib/vul/lev019.htm","path":"bib/vul/lev019.htm","source_url":"https://sacred-texts.com/bib/vul/lev019.htm","text":"1 Locutus est Dominus ad Moysen, dicens:\n2 Loquere ad omnem c\u0153tum filiorum Isra\u00ebl, et dices ad eos: Sancti estote, quia ego sanctus sum, Dominus Deus vester.\n3 Unusquisque patrem suum, et matrem suam timeat. Sabbata mea custodite. Ego Dominus Deus vester.\n4 Nolite converti ad idola, nec deos conflatiles faciatis vobis. Ego Dominus Deus vester.\n5 Si immolaveritis hostiam pacificorum Domino, ut sit placabilis,\n6 eo die quo fuerit immolata, comedetis eam, et die altero: quidquid autem residuum fuerit in diem tertium, igne comburetis.\n7 Si quis post biduum comederit ex ea, profanus erit, et impietatis reus:\n8\u00a0portabitque iniquitatem suam, quia sanctum Domini polluit, et peribit anima illa de populo suo.\n \n9 Cumque messueris segetes terr\u00e6 tu\u00e6, non tondebis usque ad solum superficiem terr\u00e6, nec remanentes spicas colliges,\n10 neque in vinea tua racemos et grana decidentia congregabis: sed pauperibus et peregrinis carpenda dimittes. Ego Dominus Deus vester.\n11 Non facietis furtum. Non mentiemini, nec decipiet unusquisque proximum suum.\n12 Non perjurabis in nomine meo, nec pollues nomen Dei tui. Ego Dominus.\n13 Non facies calumniam proximo tuo nec vi opprimes eum. Non morabitur opus mercenarii tui apud te usque mane.\n14 Non maledices surdo, nec coram c\u00e6co pones offendiculum: sed timebis Dominum Deum tuum, quia ego sum Dominus.\n15 Non facies quod iniquum est, nec injuste judicabis. Non consideres personam pauperis, nec honores vultum potentis. Juste judica proximo tuo.\n16 Non eris criminator, nec susurro in populo. Non stabis contra sanguinem proximi tui. Ego Dominus.\n17 Non oderis fratrem tuum in corde tuo, sed publice argue eum, ne habeas super illo peccatum.\n18\u00a0Non qu\u00e6ras ultionem, nec memor eris injuri\u00e6 civium tuorum. Diliges amicum tuum sicut teipsum. Ego Dominus.\n \n19 Leges meas custodite. Jumentum tuum non facies coire cum alterius generis animantibus. Agrum tuum non seres diverso semine. Veste, qu\u00e6 ex duobus texta est, non indueris.\n20 Homo, si dormierit cum muliere coitu seminis, qu\u00e6 sit ancilla etiam nubilis, et tamen pretio non redempta, nec libertate donata: vapulabunt ambo, et non morientur, quia non fuit libera.\n21 Pro delicto autem suo offeret Domino ad ostium tabernaculi testimonii arietem:\n22 orabitque pro eo sacerdos, et pro peccato ejus coram Domino, et repropitiabitur ei, dimitteturque peccatum.\n23 Quando ingressi fueritis terram, et plantaveritis in ea ligna pomifera, auferetis pr\u00e6putia eorum: poma, qu\u00e6 germinant, immunda erunt vobis, nec edetis ex eis.\n24 Quarto autem anno omnis fructus eorum sanctificabitur, laudabilis Domino.\n25 Quinto autem anno comedetis fructus, congregantes poma, qu\u00e6 proferunt. Ego Dominus Deus vester.\n26 Non comedetis cum sanguine. Non augurabimini, nec observabitis somnia.\n27 Neque in rotundum attondebitis comam, nec radetis barbam.\n28 Et super mortuo non incidetis carnem vestram, neque figuras aliquas aut stigmata facietis vobis. Ego Dominus.\n29 Ne prostituas filiam tuam, ne contaminetur terra et impleatur piaculo.\n30 Sabbata mea custodite, et sanctuarium meum metuite. Ego Dominus.\n31 Non declinetis ad magos, nec ab ariolis aliquid sciscitemini, ut polluamini per eos. Ego Dominus Deus vester.\n32\u00a0Coram cano capite consurge, et honora personam senis: et time Dominum Deum tuum. Ego sum Dominus.\n \n33 Si habitaverit advena in terra vestra, et moratus fuerit inter vos, non exprobretis ei:\n34\u00a0sed sit inter vos quasi indigena, et diligetis eum quasi vosmetipsos: fuistis enim et vos adven\u00e6 in terra \u00c6gypti. Ego Dominus Deus vester.\n \n35 Nolite facere iniquum aliquid in judicio, in regula, in pondere, in mensura.\n36 Statera justa, et \u00e6qua sint pondera, justus modius, \u00e6quusque sextarius. Ego Dominus Deus vester, qui eduxi vos de terra \u00c6gypti.\n37 Custodite omnia pr\u00e6cepta mea, et universa judicia, et facite ea. Ego Dominus.","title":"Vulgate: Leviticus: Leviticus Chapter 19","type":"page"}