{"collection":"Bible & Christianity","html_url":"https://unchartedknowledge.5gfusion.net/browse/bib/vul/lev020.htm","path":"bib/vul/lev020.htm","source_url":"https://sacred-texts.com/bib/vul/lev020.htm","text":"1 Locutusque est Dominus ad Moysen, dicens:\n2 H\u00e6c loqueris filiis Isra\u00ebl: Homo de filiis Isra\u00ebl, et de advenis qui habitant in Isra\u00ebl, si quis dederit de semine suo idolo Moloch, morte moriatur: populus terr\u00e6 lapidabit eum.\n3 Et ego ponam faciem meam contra illum: succidamque eum de medio populi sui, eo quod dederit de semine suo Moloch, et contaminaverit sanctuarium meum, ac polluerit nomen sanctum meum.\n4 Quod si negligens populus terr\u00e6, et quasi parvipendens imperium meum, dimiserit hominem qui dedit de semine suo Moloch, nec voluerit eum occidere:\n5 ponam faciem meam super hominem illum, et super cognationem ejus, succidamque et ipsum, et omnes qui consenserunt ei ut fornicarentur cum Moloch, de medio populi sui.\n6 Anima, qu\u00e6 declinaverit ad magos et ariolos, et fornicata fuerit cum eis, ponam faciem meam contra eam, et interficiam illam de medio populi sui.\n7 Sanctificamini et estote sancti, quia ego sum Dominus Deus vester.\n8 Custodite pr\u00e6cepta mea, et facite ea: ego Dominus qui sanctifico vos.\n9\u00a0Qui maledixerit patri suo, aut matri, morte moriatur: patri matrique maledixit: sanguis ejus sit super eum.\n \n10 Si m\u0153chatus quis fuerit cum uxore alterius, et adulterium perpetraverit cum conjuge proximi sui, morte moriantur et m\u0153chus et adultera.\n11 Qui dormierit cum noverca sua, et revelaverit ignominiam patris sui, morte moriantur ambo: sanguis eorum sit super eos.\n12 Si quis dormierit cum nuru sua, uterque moriatur, quia scelus operati sunt: sanguis eorum sit super eos.\n13 Qui dormierit cum masculo coitu femineo, uterque operatus est nefas: morte moriantur: sit sanguis eorum super eos.\n14 Qui supra uxorem filiam, duxerit matrem ejus, scelus operatus est: vivus ardebit cum eis, nec permanebit tantum nefas in medio vestri.\n15 Qui cum jumento et pecore coierit, morte moriatur: pecus quoque occidite.\n16 Mulier, qu\u00e6 succubuerit cuilibet jumento, simul interficietur cum eo: sanguis eorum sit super eos.\n17 Qui acceperit sororem suam filiam patris sui, vel filiam matris su\u00e6, et viderit turpitudinem ejus, illaque conspexerit fratris ignominiam, nefariam rem operati sunt: occidentur in conspectu populi sui, eo quod turpitudinem suam mutuo revelaverint, et portabunt iniquitatem suam.\n18 Qui coierit cum muliere in fluxu menstruo, et revelaverit turpitudinem ejus, ipsaque aperuerit fontem sanguinis sui, interficientur ambo de medio populi sui.\n19 Turpitudinem materter\u00e6 et amit\u00e6 tu\u00e6 non discooperies: qui hoc fecerit, ignominiam carnis su\u00e6 nudavit; portabunt ambo iniquitatem suam.\n20 Qui coierit cum uxore patrui vel avunculi sui, et revelaverit ignominiam cognationis su\u00e6, portabunt ambo peccatum suum: absque liberis morientur.\n21\u00a0Qui duxerit uxorem fratris sui, rem facit illicitam: turpitudinem fratris sui revelavit: absque liberis erunt.\n \n22 Custodite leges meas, atque judicia, et facite ea: ne et vos evomat terra quam intraturi estis et habitaturi.\n23 Nolite ambulare in legitimis nationum, quas ego expulsurus sum ante vos. Omnia enim h\u00e6c fecerunt, et abominatus sum eas.\n24 Vobis autem loquor. Possidete terram eorum, quam dabo vobis in h\u00e6reditatem, terram fluentem lacte et melle. Ego Dominus Deus vester, qui separavi vos a ceteris populis.\n25 Separate ergo et vos jumentum mundum ab immundo, et avem mundam ab immunda: ne polluatis animas vestras in pecore, et avibus, et cunctis qu\u00e6 moventur in terra, et qu\u00e6 vobis ostendi esse polluta.\n26 Eritis mihi sancti, quia sanctus sum ego Dominus, et separavi vos a ceteris populis, ut essetis mei.\n27 Vir, sive mulier, in quibus pythonicus, vel divinationis fuerit spiritus, morte moriantur: lapidibus obruent eos: sanguis eorum sit super illos.","title":"Vulgate: Leviticus: Leviticus Chapter 20","type":"page"}