{"collection":"Bible & Christianity","html_url":"https://unchartedknowledge.5gfusion.net/browse/bib/vul/lev026.htm","path":"bib/vul/lev026.htm","source_url":"https://sacred-texts.com/bib/vul/lev026.htm","text":"1 Ego Dominus Deus vester: non facietis vobis idolum, et sculptile, nec titulos erigetis, nec insignem lapidem ponetis in terra vestra, ut adoretis eum. Ego enim sum Dominus Deus vester.\n2 Custodite sabbata mea, et pavete ad sanctuarium meum. Ego Dominus.\n3 Si in pr\u00e6ceptis meis ambulaveritis, et mandata mea custodieritis, et feceritis ea, dabo vobis pluvias temporibus suis,\n4 et terra gignet germen suum, et pomis arbores replebuntur.\n5 Apprehendet messium tritura vindemiam, et vindemia occupabit sementem: et comedetis panem vestrum in saturitate, et absque pavore habitabitis in terra vestra.\n6 Dabo pacem in finibus vestris: dormietis, et non erit qui exterreat. Auferam malas bestias, et gladius non transibit terminos vestros.\n7 Persequemini inimicos vestros, et corruent coram vobis.\n8 Persequentur quinque de vestris centum alienos, et centum de vobis decem millia: cadent inimici vestri gladio in conspectu vestro.\n9 Respiciam vos, et crescere faciam: multiplicabimini, et firmabo pactum meum vobiscum.\n10 Comedetis vetustissima veterum, et vetera novis supervenientibus projicietis.\n11 Ponam tabernaculum meum in medio vestri, et non abjiciet vos anima mea.\n12 Ambulabo inter vos, et ero Deus vester, vosque eritis populus meus.\n13\u00a0Ego Dominus Deus vester, qui eduxi vos de terra \u00c6gyptiorum, ne serviretis eis: et qui confregi catenas cervicum vestrarum, ut incederetis erecti.\n \n14 Quod si non audieritis me, nec feceritis omnia mandata mea,\n15 si spreveritis leges meas, et judicia mea contempseritis, ut non faciatis ea qu\u00e6 a me constituta sunt, et ad irritum perducatis pactum meum:\n16 ego quoque h\u00e6c faciam vobis: visitabo vos velociter in egestate, et ardore, qui conficiat oculos vestros, et consumat animas vestras. Frustra seretis sementem, qu\u00e6 ab hostibus devorabitur.\n17 Ponam faciem meam contra vos, et corruetis coram hostibus vestris, et subjiciemini his qui oderunt vos: fugietis, nemine persequente.\n18 Sin autem nec sic obedieritis mihi, addam correptiones vestras septuplum propter peccata vestra,\n19 et conteram superbiam duriti\u00e6 vestr\u00e6. Daboque vobis c\u00e6lum desuper sicut ferrum, et terram \u00e6neam.\n20 Consumetur incassum labor vester, non proferet terra germen, nec arbores poma pr\u00e6bebunt.\n21 Si ambulaveritis ex adverso mihi, nec volueritis audire me, addam plagas vestras in septuplum propter peccata vestra:\n22 immittamque in vos bestias agri, qu\u00e6 consumant vos, et pecora vestra, et ad paucitatem cuncta redigant, desert\u00e6que fiant vi\u00e6 vestr\u00e6.\n23 Quod si nec sic volueritis recipere disciplinam, sed ambulaveritis ex adverso mihi:\n24 ego quoque contra vos adversus incedam, et percutiam vos septies propter peccata vestra,\n25 inducamque super vos gladium ultorem f\u0153deris mei. Cumque confugeritis in urbes, mittam pestilentiam in medio vestri, et trademini in manibus hostium,\n26\u00a0postquam confregero baculum panis vestri: ita ut decem mulieres in uno clibano coquant panes, et reddant eos ad pondus: et comedetis, et non saturabimini.\n \n27 Sin autem nec per h\u00e6c audieritis me, sed ambulaveritis contra me:\n28 et ego incedam adversus vos in furore contrario, et corripiam vos septem plagis propter peccata vestra:\n29 ita ut comedatis carnes filiorum vestrorum et filiarum vestrarum.\n30 Destruam excelsa vestra, et simulacra confringam. Cadetis inter ruinas idolorum vestrorum, et abominabitur vos anima mea,\n31 in tantum ut urbes vestras redigam in solitudinem, et deserta faciam sanctuaria vestra, nec recipiam ultra odorem suavissimum.\n32 Disperdamque terram vestram, et stupebunt super ea inimici vestri, cum habitatores illius fuerint.\n33 Vos autem dispergam in gentes, et evaginabo post vos gladium, eritque terra vestra deserta, et civitates vestr\u00e6 dirut\u00e6.\n34 Tunc placebunt terr\u00e6 sabbata sua cunctis diebus solitudinis su\u00e6: quando fueritis\n35 in terra hostili, sabbatizabit, et requiescet in sabbatis solitudinis su\u00e6, eo quod non requieverit in sabbatis vestris quando habitabatis in ea.\n36 Et qui de vobis remanserint, dabo pavorem in cordibus eorum in regionibus hostium, terrebit eos sonitus folii volantis, et ita fugient quasi gladium: cadent, nullo persequente,\n37 et corruent singuli super fratres suos, quasi bella fugientes, nemo vestrum inimicis audebit resistere.\n38 Peribitis inter gentes, et hostilis vos terra consumet.\n39 Quod si et de iis aliqui remanserint, tabescent in iniquitatibus suis, in terra inimicorum suorum, et propter peccata patrum suorum et sua affligentur:\n40 donec confiteantur iniquitates suas, et majorum suorum, quibus pr\u00e6varicati sunt in me, et ambulaverunt ex adverso mihi.\n41\u00a0Ambulabo igitur et ego contra eos, et inducam illos in terram hostilem, donec erubescat incircumcisa mens eorum: tunc orabunt pro impietatibus suis.\n \n42 Et recordabor f\u0153deris mei, quod pepigi cum Jacob, et Isaac, et Abraham. Terr\u00e6 quoque memor ero:\n43 qu\u00e6 cum relicta fuerit ab eis, complacebit sibi in sabbatis suis, patiens solitudinem propter illos. Ipsi vero rogabunt pro peccatis suis, eo quod abjecerint judicia mea, et leges meas despexerint.\n44 Et tamen etiam cum essent in terra hostili, non penitus abjeci eos, neque sic despexi ut consumerentur, et irritum facerent pactum meum cum eis. Ego enim sum Dominus Deus eorum,\n45\u00a0et recordabor f\u0153deris mei pristini, quando eduxi eos de terra \u00c6gypti in conspectu gentium, ut essem Deus eorum. Ego Dominus.\n H\u00e6c sunt judicia atque pr\u00e6cepta et leges quas dedit Dominus inter se et filios Isra\u00ebl in monte Sinai per manum Moysi.","title":"Vulgate: Leviticus: Leviticus Chapter 26","type":"page"}