{"collection":"Bible & Christianity","html_url":"https://unchartedknowledge.5gfusion.net/browse/bib/vul/lev027.htm","path":"bib/vul/lev027.htm","source_url":"https://sacred-texts.com/bib/vul/lev027.htm","text":"1 Locutusque est Dominus ad Moysen, dicens:\n2 Loquere filiis Isra\u00ebl, et dices ad eos: Homo qui votum fecerit, et spoponderit Deo animam suam, sub \u00e6stimatione dabit pretium.\n3 Si fuerit masculus a vigesimo anno usque ad sexagesimum annum, dabit quinquaginta siclos argenti ad mensuram sanctuarii:\n4 si mulier, triginta.\n5 A quinto autem anno usque ad vigesimum, masculus dabit viginti siclos: femina, decem.\n6 Ab uno mense usque ad annum quintum, pro masculo dabuntur quinque sicli: pro femina, tres.\n7 Sexagenarius et ultra masculus dabit quindecim siclos: femina, decem.\n8\u00a0Si pauper fuerit, et \u00e6stimationem reddere non valebit, stabit coram sacerdote: et quantum ille \u00e6stimaverit, et viderit eum posse reddere, tantum dabit.\n \n9 Animal autem, quod immolari potest Domino, si quis voverit, sanctum erit,\n10 et mutari non poterit, id est, nec melius malo, nec pejus bono: quod si mutaverit, et ipsum quod mutatum est, et illud pro quo mutatum est, consecratum erit Domino.\n11 Animal immundum, quod immolari Domino non potest, si quis voverit, adducetur ante sacerdotem:\n12 qui judicans utrum bonum an malum sit, statuet pretium.\n13\u00a0Quod si dare voluerit is qui offert, addet supra \u00e6stimationem quintam partem.\n \n14 Homo si voverit domum suam, et sanctificaverit Domino, considerabit eam sacerdos utrum bona an mala sit, et juxta pretium, quod ab eo fuerit constitutum, venundabitur:\n15 sin autem ille qui voverat, voluerit redimere eam, dabit quintam partem \u00e6stimationis supra, et habebit domum.\n16 Quod si agrum possessionis su\u00e6 voverit, et consecraverit Domino, juxta mensuram sementis \u00e6stimabitur pretium: si triginta modiis hordei seritur terra, quinquaginta siclis venundetur argenti.\n17 Si statim ab anno incipientis jubil\u00e6i voverit agrum, quanto valere potest, tanto \u00e6stimabitur.\n18 Sin autem post aliquantum temporis, supputabit sacerdos pecuniam juxta annorum, qui reliqui sunt, numerum usque ad jubil\u00e6um, et detrahetur ex pretio.\n19 Quod si voluerit redimere agrum ille qui voverat, addet quintam partem \u00e6stimat\u00e6 pecuni\u00e6, et possidebit eum.\n20 Sin autem noluerit redimere, sed alteri cuilibet fuerit venundatus, ultra eum qui voverat redimere non poterit.\n21 Quia cum jubil\u00e6i venerit dies, sanctificatus erit Domino, et possessio consecrata ad jus pertinet sacerdotum.\n22 Si ager emptus est, et non de possessione majorum sanctificatus fuerit Domino,\n23 supputabit sacerdos juxta annorum numerum usque ad jubil\u00e6um, pretium: et dabit ille qui voverat eum, Domino.\n24 In jubil\u00e6o autem revertetur ad priorem dominum, qui vendiderat eum, et habuerat in sorte possessionis su\u00e6.\n25\u00a0Omnis \u00e6stimatio siclo sanctuarii ponderabitur. Siclus viginti obolos habet.\n \n26 Primogenita, qu\u00e6 ad Dominum pertinent, nemo sanctificare poterit et vovere: sive bos, sive ovis fuerit, Domini sunt.\n27 Quod si immundum est animal, redimet qui obtulit, juxta \u00e6stimationem tuam, et addet quintam partem pretii: si redimere noluerit, vendetur alteri quantocumque a te fuerit \u00e6stimatum.\n28 Omne quod Domino consecratur, sive homo fuerit, sive animal, sive ager, non vendetur, nec redimi poterit. Quidquid semel fuerit consecratum, Sanctum sanctorum erit Domino:\n29\u00a0et omnis consecratio, qu\u00e6 offertur ab homine, non redimetur, sed morte morietur.\n \n30 Omnes decim\u00e6 terr\u00e6, sive de frugibus, sive de pomis arborum, Domini sunt, et illi sanctificantur.\n31 Si quis autem voluerit redimere decimas suas, addet quintam partem earum.\n32 Omnium decimarum bovis et ovis et capr\u00e6, qu\u00e6 sub pastoris virga transeunt, quidquid decimum venerit, sanctificabitur Domino.\n33\u00a0Non eligetur nec bonum nec malum, nec altero commutabitur, si quis mutaverit: et quod mutatum est, et pro quo mutatum est, sanctificabitur Domino, et non redimetur.\n \n34 H\u00e6c sunt pr\u00e6cepta, qu\u00e6 mandavit Dominus Moysi ad filios Isra\u00ebl in monte Sinai.","title":"Vulgate: Leviticus: Leviticus Chapter 27","type":"page"}