{"collection":"Bible & Christianity","html_url":"https://unchartedknowledge.5gfusion.net/browse/bib/vul/luk003.htm","path":"bib/vul/luk003.htm","source_url":"https://sacred-texts.com/bib/vul/luk003.htm","text":"1 Anno autem quintodecimo imperii Tiberii C\u00e6saris, procurante Pontio Pilato Jud\u00e6am, tetrarcha autem Gali\u00e6\u00e6 Herode, Philippo autem fratre ejus tetrarcha Itur\u00e6\u00e6, et Trachonitidis regionis, et Lysania Abilin\u00e6 tetrarcha,\n2 sub principibus sacerdotum Anna et Caipha: factum est verbum Domini super Joannem, Zachari\u00e6 filium, in deserto.\n3 Et venit in omnem regionem Jordanis, pr\u00e6dicans baptismum p\u0153nitenti\u00e6 in remissionem peccatorum,\n4\u00a0sicut scriptum est in libro sermonum Isai\u00e6 prophet\u00e6: [Vox clamantis in deserto:\n Parate viam Domini; rectas facite semitas ejus:\n5\u00a0omnis vallis implebitur,\n et omnis mons, et collis humiliabitur:\n et erunt prava in directa, et aspera in vias planas:\n6 et videbit omnis caro salutare Dei.]\n7 Dicebat ergo ad turbas qu\u00e6 exibant ut baptizarentur ab ipso: Genimina viperarum, quis ostendit vobis fugere a ventura ira?\n8 Facite ergo fructus dignos p\u0153nitenti\u00e6, et ne c\u0153peritis dicere: Patrem habemus Abraham. Dico enim vobis quia potens est Deus de lapidibus istis suscitare filios Abrah\u00e6.\n9 Jam enim securis ad radicem arborum posita est. Omnis ergo arbor non faciens fructum bonum, excidetur, et in ignem mittetur.\n10 Et interrogabant eum turb\u00e6, dicentes: Quid ergo faciemus?\n11 Respondens autem dicebat illis: Qui habet duas tunicas, det non habenti: et qui habet escas, similiter faciat.\n12 Venerunt autem et publicani ut baptizarentur, et dixerunt ad illum: Magister, quid faciemus?\n13 At ille dixit ad eos: Nihil amplius, quam quod constitutum est vobis, faciatis.\n14 Interrogabant autem eum et milites, dicentes: Quid faciemus et nos? Et ait illis: Neminem concutiatis, neque calumniam faciatis: et contenti estote stipendiis vestris.\n15 Existimante autem populo, et cogitantibus omnibus in cordibus suis de Joanne, ne forte ipse esset Christus,\n16 respondit Joannes, dicens omnibus: Ego quidem aqua baptizo vos: veniet autem fortior me, cujus non sum dignus solvere corrigiam calceamentorum ejus: ipse vos baptizabit in Spiritu Sancto et igni:\n17 cujus ventilabrum in manu ejus, et purgabit aream suam, et congregabit triticum in horreum suum, paleas autem comburet igni inextinguibili.\n18\u00a0Multa quidem et alia exhortans evangelizabat populo.\n \n19 Herodes autem tetrarcha cum corriperetur ab illo de Herodiade uxore fratris sui, et de omnibus malis qu\u00e6 fecit Herodes,\n20\u00a0adjecit et hoc super omnia, et inclusit Joannem in carcere.\n \n21 Factum est autem cum baptizaretur omnis populus, et Jesu baptizato, et orante, apertum est c\u00e6lum:\n22 et descendit Spiritus Sanctus corporali specie sicut columba in ipsum: et vox de c\u00e6lo facta est: Tu es filius meus dilectus, in te complacui mihi.\n23 Et ipse Jesus erat incipiens quasi annorum triginta, ut putabatur, filius Joseph, qui fuit Heli, qui fuit Mathat,\n24 qui fuit Levi, qui fuit Melchi, qui fuit Janne, qui fuit Joseph,\n25 qui fuit Mathathi\u00e6, qui fuit Amos, qui fuit Nahum, qui fuit Hesli, qui fuit Nagge,\n26 qui fuit Mahath, qui fuit Mathathi\u00e6, qui fuit Semei, qui fuit Joseph, qui fuit Juda,\n27 qui fuit Joanna, qui fuit Resa, qui fuit Zorobabel, qui fuit Salatheil, qui fuit Neri,\n28 qui fuit Melchi, qui fuit Addi, qui fuit Cosan, qui fuit Elmadan, qui fuit Her,\n29 qui fuit Jesu, qui fuit Eliezer, qui fuit Jorim, qui fuit Mathat, qui fuit Levi,\n30 qui fuit Simeon, qui fuit Juda, qui fuit Joseph, qui fuit Jona, qui fuit Eliakim,\n31 qui fuit Melea, qui fuit Menna, qui fuit Mathatha, qui fuit Natham, qui fuit David,\n32 qui fuit Jesse, qui fuit Obed, qui fuit Booz, qui fuit Salmon, qui fuit Naasson,\n33 qui fuit Aminadab, qui fuit Aram, qui fuit Esron, qui fuit Phares, qui fuit Jud\u00e6,\n34 qui fuit Jacob, qui fuit Isaac, qui fuit Abrah\u00e6, qui fuit Thare, qui fuit Nachor,\n35 qui fuit Sarug, qui fuit Ragau, qui fuit Phaleg, qui fuit Heber, qui fuit Sale,\n36 qui fuit Cainan, qui fuit Arphaxad, qui fuit Sem, qui fuit No\u00eb, qui fuit Lamech,\n37 qui fuit Methusale, qui fuit Henoch, qui fuit Jared, qui fuit Malaleel, qui fuit Cainan,\n38 qui fuit Henos, qui fuit Seth, qui fuit Adam, qui fuit Dei.","title":"Vulgate: Luke: Luke Chapter 3","type":"page"}