{"collection":"Bible & Christianity","html_url":"https://unchartedknowledge.5gfusion.net/browse/bib/vul/luk008.htm","path":"bib/vul/luk008.htm","source_url":"https://sacred-texts.com/bib/vul/luk008.htm","text":"1 Et factum est deinceps, et ipse iter faciebat per civitates, et castella pr\u00e6dicans, et evangelizans regnum Dei: et duodecim cum illo,\n2 et mulieres aliqu\u00e6, qu\u00e6 erant curat\u00e6 a spiritibus malignis et infirmatibus: Maria, qu\u00e6 vocatur Magdalene, de qua septem d\u00e6monia exierant,\n3\u00a0et Joanna uxor Chus\u00e6 procuratoris Herodis, et Susanna, et ali\u00e6 mult\u00e6, qu\u00e6 ministrabant ei de facultatibus suis.\n \n4 Cum autem turba plurima convenirent, et de civitatibus properarent ad eum, dixit per similitudinem:\n5 Exiit qui seminat, seminare semen suum. Et dum seminat, aliud cecidit secus viam, et conculcatum est, et volucres c\u00e6li comederunt illud.\n6 Et aliud cecidit supra petram: et natum aruit, quia non habebat humorem.\n7 Et aliud cecidit inter spinas, et simul exort\u00e6 spin\u00e6 suffocaverunt illud.\n8\u00a0Et aliud cecidit in terram bonam: et ortum fecit fructum centuplum. H\u00e6c dicens clamabat: Qui habet aures audiendi, audiat.\n \n9 Interrogabant autem eum discipuli ejus, qu\u00e6 esset h\u00e6c parabola.\n10\u00a0Quibus ipse dixit: Vobis datum est nosse mysterium regni Dei, ceteris autem in parabolis: ut videntes non videant, et audientes non intelligant.\n \n11 Est autem h\u00e6c parabola: Semen est verbum Domini.\n12 Qui autem secus viam, hi sunt qui audiunt: deinde venit diabolus, et tollit verbum de corde eorum, ne credentes salvi fiant.\n13 Nam qui supra petram, qui cum audierint, cum gaudio suscipiunt verbum: et hi radices non habent: qui ad tempus credunt, et in tempore tentationis recedunt.\n14 Quod autem in spinas cecidit: hi sunt qui audierunt, et a sollicitudinibus, et divitiis, et voluptatibus vit\u00e6 euntes, suffocantur, et non referunt fructum.\n15\u00a0Quod autem in bonam terram: hi sunt qui in corde bono et optimo audientes verbum retinent, et fructum afferunt in patientia.\n \n16 Nemo autem lucernam accendens, operit eam vase, aut subtus lectum ponit: sed supra candelabrum ponit, ut intrantes videant lumen.\n17 Non est enim occultum, quod non manifestetur: nec absconditum, quod non cognoscatur, et in palam veniat.\n18\u00a0Videte ergo quomodo audiatis? Qui enim habet, dabitur illi: et quicumque non habet, etiam quod putat se habere, auferetur ab illo.\n \n19 Venerunt autem ad illum mater et fratres ejus, et non poterant adire eum pr\u00e6 turba.\n20 Et nuntiatum est illi: Mater tua et fratres tui stant foris, volentes te videre.\n21\u00a0Qui respondens, dixit ad eos: Mater mea et fratres mei hi sunt, qui verbum Dei audiunt et faciunt.\n \n22 Factum est autem in una dierum: et ipse ascendit in naviculam, et discipuli ejus, et ait ad illos: Transfretemus trans stagnum. Et ascenderunt.\n23 Et navigantibus illis, obdormivit, et descendit procella venti in stagnum, et complebantur, et periclitabantur.\n24 Accedentes autem suscitaverunt eum, dicentes: Pr\u00e6ceptor, perimus. At ille surgens, increpavit ventum, et tempestatem aqu\u00e6, et cessavit: et facta est tranquillitas.\n25\u00a0Dixit autem illis: Ubi est fides vestra? Qui timentes, mirati sunt ad invicem, dicentes: Quis putas hic est, quia et ventis, et mari imperat, et obediunt ei?\n \n26 Et navigaverunt ad regionem Gerasenorum, qu\u00e6 est contra Galil\u00e6am.\n27 Et cum egressus esset ad terram, occurrit illi vir quidam, qui habebat d\u00e6monium jam temporibus multis, et vestimento non induebatur, neque in domo manebat, sed in monumentis.\n28 Is, ut vidit Jesum, procidit ante illum: et exclamans voce magna, dixit: Quid mihi et tibi est, Jesu Fili Dei Altissimi? obsecro te, ne me torqueas.\n29 Pr\u00e6cipiebat enim spiritui immundo ut exiret ab homine. Multis enim temporibus arripiebat illum, et vinciebatur catenis, et compedibus custoditus. Et ruptis vinculis agebatur a d\u00e6monio in deserta.\n30 Interrogavit autem illum Jesus, dicens: Quod tibi nomen est? At ille dixit: Legio: quia intraverant d\u00e6monia multa in eum.\n31 Et rogabant illum ne imperaret illis ut in abyssum irent.\n32 Erat autem ibi grex porcorum multorum pascentium in monte: et rogabant eum, ut permitteret eis in illos ingredi. Et permisit illis.\n33 Exierunt ergo d\u00e6monia ab homine, et intraverunt in porcos: et impetu abiit grex per pr\u00e6ceps in stagnum, et suffocatus est.\n34 Quod ut viderunt factum qui pascebant, fugerunt, et nuntiaverunt in civitatem et in villas.\n35 Exierunt autem videre quod factum est, et venerunt ad Jesum, et invenerunt hominem sedentem, a quo d\u00e6monia exierant, vestitum ac sana mente, ad pedes ejus, et timuerunt.\n36 Nuntiaverunt autem illis et qui viderant, quomodo sanus factus esset a legione:\n37 et rogaverunt illum omnis multitudo regionis Gerasenorum ut discederet ab ipsis: quia magno timore tenebantur. Ipse autem ascendens navim, reversus est.\n38 Et rogabat illum vir, a quo d\u00e6monia exierant, ut cum eo esset. Dimisit autem eum Jesus, dicens:\n39\u00a0Redi in domum tuam, et narra quanta tibi fecit Deus. Et abiit per universam civitatem, pr\u00e6dicans quanta illi fecisset Jesus.\n \n40 Factum est autem cum rediisset Jesus, excepit illum turba: erunt enim omnes exspectantes eum.\n41 Et ecce venit vir, cui nomen Jairus, et ipse princeps synagog\u00e6 erat: et cecidit ad pedes Jesu, rogans eum ut intraret in domum ejus,\n42 quia unica filia erat ei fere annorum duodecim, et h\u00e6c moriebatur. Et contigit, dum iret, a turba comprimebatur.\n43 Et mulier qu\u00e6dam erat in fluxu sanguinis ab annis duodecim, qu\u00e6 in medicos erogaverat omnem substantiam suam, nec ab ullo potuit curari:\n44 accessit retro, et tetigit fimbriam vestimenti ejus: et confestim stetit fluxus sanguinis ejus.\n45 Et ait Jesus: Quis est, qui me tetigit? Negantibus autem omnibus, dixit Petrus, et qui cum illo erant: Pr\u00e6ceptor, turb\u00e6 te comprimunt, et affligunt, et dicis: Quis me tetigit?\n46 Et dicit Jesus: Tetigit me aliquis: nam ego novi virtutem de me exiisse.\n47 Videns autem mulier, quia non latuit, tremens venit, et procidit ante pedes ejus: et ob quam causam tetigerit eum, indicavit coram omni populo: et quemadmodum confestim sanata sit.\n48 At ipse dixit ei: Filia, fides tua salvam te fecit: vade in pace.\n49 Adhuc illo loquente, venit quidam ad principem synagog\u00e6, dicens ei: Quia mortua est filia tua, noli vexare illum.\n50 Jesus autem, audito hoc verbo, respondit patri puell\u00e6: Noli timere, crede tantum, et salva erit.\n51 Et cum venisset domum, non permisit intrare secum quemquam, nisi Petrum, et Jacobum, et Joannem, et patrem, et matrem puell\u00e6.\n52 Flebant autem omnes, et plangebant illam. At ille dixit: Nolite flere: non est mortua puella, sed dormit.\n53 Et deridebant eum, scientes quod mortua esset.\n54 Ipse autem tenens manum ejus clamavit, dicens: Puella, surge.\n55 Et reversus est spiritus ejus, et surrexit continuo. Et jussit illi dari manducare.\n56 Et stupuerunt parentes ejus, quibus pr\u00e6cepit ne alicui dicerent quod factum erat.","title":"Vulgate: Luke: Luke Chapter 8","type":"page"}