{"collection":"Bible & Christianity","html_url":"https://unchartedknowledge.5gfusion.net/browse/bib/vul/luk014.htm","path":"bib/vul/luk014.htm","source_url":"https://sacred-texts.com/bib/vul/luk014.htm","text":"1 Et factum est cum intraret Jesus in domum cujusdam principis pharis\u00e6orum sabbato manducare panem, et ipsi observabant eum.\n2 Et ecce homo quidam hydropicus erat ante illum.\n3 Et respondens Jesus dixit ad legisperitos et pharis\u00e6os, dicens: Si licet sabbato curare?\n4 At illi tacuerunt. Ipse vero apprehensum sanavit eum, ac dimisit.\n5 Et respondens ad illos dixit: Cujus vestrum asinus, aut bos in puteum cadet, et non continuo extrahet illum die sabbati?\n6\u00a0Et non poterant ad h\u00e6c respondere illi.\n \n7 Dicebat autem et ad invitatos parabolam, intendens quomodo primos accubitus eligerent, dicens ad illos:\n8 Cum invitatus fueris ad nuptias, non discumbas in primo loco, ne forte honoratior te sit invitatus ab illo.\n9 Et veniens is, qui te et illum vocavit, dicat tibi: Da huic locum: et tunc incipias cum rubore novissimum locum tenere.\n10 Sed cum vocatus fueris, vade, recumbe in novissimo loco: ut, cum venerit qui te invitavit, dicat tibi: Amice, ascende superius. Tunc erit tibi gloria coram simul discumbentibus:\n11\u00a0quia omnis, qui se exaltat, humiliabitur: et qui se humiliat, exaltabitur.\n \n12 Dicebat autem et ei, qui invitaverat: Cum facis prandium, aut c\u0153nam, noli vocare amicos tuos, neque fratres tuos, neque cognatos, neque vicinos divites: ne forte te et ipsi reinvitent, et fiat tibi retributio;\n13 sed cum facis convivium, voca pauperes, debiles, claudos, et c\u00e6cos:\n14\u00a0et beatus eris, quia non habent retribuere tibi: retribuetur enim tibi in resurrectione justorum.\n \n15 H\u00e6c cum audisset quidam de simul discumbentibus, dixit illi: Beatus qui manducabit panem in regno Dei.\n16 At ipse dixit ei: Homo quidam fecit c\u0153nam magnam, et vocavit multos.\n17 Et misit servum suum hora c\u0153n\u00e6 dicere invitatis ut venirent, quia jam parata sunt omnia.\n18 Et c\u0153perunt simul omnes excusare. Primus dixit ei: Villam emi, et necesse habeo exire, et videre illam: rogo te, habe me excusatum.\n19 Et alter dixit: Juga boum emi quinque, et eo probare illa: rogo te, habe me excusatum.\n20 Et alius dixit: Uxorem duxi, et ideo non possum venire.\n21 Et reversus servus nuntiavit h\u00e6c domino suo. Tunc iratus paterfamilias, dixit servo suo: Exi cito in plateas et vicos civitatis: et pauperes, ac debiles, et c\u00e6cos, et claudos introduc huc.\n22 Et ait servus: Domine, factum est ut imperasti, et adhuc locus est.\n23 Et ait dominus servo: Exi in vias, et s\u00e6pes: et compelle intrare, ut impleatur domus mea.\n24\u00a0Dico autem vobis quod nemo virorum illorum qui vocati sunt, gustabit c\u0153nam meam.\n \n25 Ibant autem turb\u00e6 mult\u00e6 cum eo: et conversus dixit ad illos:\n26 Si quis venit ad me, et non odit patrem suum, et matrem, et uxorem, et filios, et fratres, et sorores, adhuc autem et animam suam, non potest meus esse discipulus.\n27 Et qui non bajulat crucem suam, et venit post me, non potest meus esse discipulus.\n28 Quis enim ex vobis volens turrim \u00e6dificare, non prius sedens computat sumptus, qui necessarii sunt, si habeat ad perficiendum,\n29 ne, posteaquam posuerit fundamentum, et non potuerit perficere, omnes qui vident, incipiant illudere ei,\n30 dicentes: Quia hic homo c\u0153pit \u00e6dificare, et non potuit consummare?\n31 Aut quis rex iturus committere bellum adversus alium regem, non sedens prius cogitat, si possit cum decem millibus occurrere ei, qui cum viginti millibus venit ad se?\n32 Alioquin adhuc illo longe agente, legationem mittens rogat ea qu\u00e6 pacis sunt.\n33 Sic ergo omnis ex vobis, qui non renuntiat omnibus qu\u00e6 possidet, non potest meus esse discipulus.\n34 Bonum est sal: si autem sal evanuerit, in quo condietur?\n35 Neque in terram, neque in sterquilinium utile est, sed foras mittetur. Qui habet aures audiendi, audiat.","title":"Vulgate: Luke: Luke Chapter 14","type":"page"}