{"collection":"Bible & Christianity","html_url":"https://unchartedknowledge.5gfusion.net/browse/bib/vul/ma1001.htm","path":"bib/vul/ma1001.htm","source_url":"https://sacred-texts.com/bib/vul/ma1001.htm","text":"1 Et factum est, postquam percussit Alexander Philippi Macedo, qui primus regnavit in Gr\u00e6cia, egressus de terra Cethim, Darium regem Persarum et Medorum:\n2 constituit pr\u00e6lia multa, et obtinuit omnium munitiones, et interfecit reges terr\u00e6,\n3 et pertransiit usque ad fines terr\u00e6: et accepit spolia multitudinis gentium, et siluit terra in conspectu ejus.\n4 Et congregavit virtutem, et exercitum fortem nimis: et exaltatum est, et elevatum cor ejus:\n5 et obtinuit regiones gentium, et tyrannos: et facti sunt illi in tributum.\n6 Et post h\u00e6c decidit in lectum, et cognovit quia moreretur.\n7 Et vocavit pueros suos nobiles, qui secum erant nutriti a juventute: et divisit illis regnum suum, cum adhuc viveret.\n8 Et regnavit Alexander annis duodecim, et mortuus est.\n9 Et obtinuerunt pueri ejus regnum, unusquisque in loco suo:\n10\u00a0et imposuerunt omnes sibi diademata post mortem ejus, et filii eorum post eos annis multis, et multiplicata sunt mala in terra.\n \n11 Et exiit ex eis radix peccatrix, Antiochus illustris, filius Antiochi regis, qui fuerat Rom\u00e6 obses: et regnavit in anno centesimo trigesimo septimo regni Gr\u00e6corum.\n12 In diebus illis, exierunt ex Isra\u00ebl filii iniqui, et suaserunt multis, dicentes: Eamus, et disponamus testamentum cum gentibus, qu\u00e6 circa nos sunt: quia ex quo recessimus ab eis, invenerunt nos multa mala.\n13 Et bonus visus est sermo in oculis eorum.\n14 Et destinaverunt aliqui de populo, et abierunt ad regem: et dedit illis potestatem ut facerent justitiam gentium.\n15 Et \u00e6dificaverunt gymnasium in Jerosolymis secundum leges nationum:\n16 et fecerunt sibi pr\u00e6putia, et recesserunt a testamento sancto, et juncti sunt nationibus, et venundati sunt ut facerent malum.\n17 Et paratum est regnum in conspectu Antiochi, et c\u0153pit regnare in terra \u00c6gypti ut regnaret super duo regna.\n18 Et intravit in \u00c6gyptum in multitudine gravi, in curribus, et elephantis, et equitibus, et copiosa navium multitudine:\n19 et constituit bellum adversus Ptolem\u00e6um regem \u00c6gypti, et veritus est Ptolem\u00e6us a facie ejus, et fugit, et ceciderunt vulnerati multi.\n20\u00a0Et comprehendit civitates munitas in terra \u00c6gypti, et accepit spolia terr\u00e6 \u00c6gypti.\n \n21 Et convertit Antiochus, postquam percussit \u00c6gyptum in centesimo et quadragesimo tertio anno: et ascendit ad Isra\u00ebl,\n22 et ascendit Jerosolymam in multitudine gravi.\n23 Et intravit in sanctificationem cum superbia, et accepit altare aureum, et candelabrum luminis, et universa vasa ejus, et mensam propositionis, et libatoria, et phialas, et mortariola aurea, et velum, et coronas, et ornamentum aureum, quod in facie templi erat: et comminuit omnia.\n24 Et accepit argentum, et aurum, et vasa concupiscibilia: et accepit thesauros occultos, quos invenit: et sublatis omnibus, abiit in terram suam.\n25 Et fecit c\u00e6dem hominum, et locutus est in superbia magna.\n26 Et factus est planctus magnus in Isra\u00ebl, et in omni loco eorum:\n27 et ingemuerunt principes et seniores; virgines et juvenes infirmati sunt: et speciositas mulierum immutata est.\n28 Omnis maritus sumpsit lamentum, et qu\u00e6 sedebant in thoro maritali, lugebant:\n29\u00a0et commota est terra super habitantes in ea, et universa domus Jacob induit confusionem.\n \n30 Et post duos annos dierum, misit rex principem tributorum in civitates Juda, et venit Jerusalem cum turba magna.\n31 Et locutus est ad eos verba pacifica in dolo: et crediderunt ei.\n32 Et irruit super civitatem repente, et percussit eam plaga magna, et perdidit populum multum ex Isra\u00ebl.\n33 Et accepit spolia civitatis: et succendit eam igni, et destruxit domos ejus, et muros ejus in circuitu:\n34 et captivas duxerunt mulieres, et natos et pecora possederunt.\n35 Et \u00e6dificaverunt civitatem David muro magno et firmo, et turribus firmis, et facta est illis in arcem:\n36 et posuerunt illic gentem peccatricem viros iniquos, et convaluerunt in ea: et posuerunt arma, et escas, et congregaverunt spolia Jerusalem:\n37 et reposuerunt illic: et facti sunt in laqueum magnum.\n38 Et factum est hoc ad insidias sanctificationi, et in diabolum malum in Isra\u00ebl:\n39 et effuderunt sanguinem innocentem per circuitum sanctificationis, et contaminaverunt sanctificationem.\n40 Et fugerunt habitatores Jerusalem propter eos, et facta est habitatio exterorum, et facta est extera semini suo, et nati ejus reliquerunt eam.\n41 Sanctificatio ejus desolata est sicut solitudo; dies festi ejus conversi sunt in luctum, sabbata ejus in opprobrium, honores ejus in nihilum.\n42\u00a0Secundum gloriam ejus multiplicata est ignominia ejus, et sublimitas ejus conversa est in luctum.\n \n43 Et scripsit rex Antiochus omni regno suo ut esset omnis populus unus: et relinqueret unusquisque legem suam.\n44 Et consenserunt omnes gentes secundum verbum regis Antiochi:\n45 et multi ex Isra\u00ebl consenserunt servituti ejus, et sacrificaverunt idolis, et coinquinaverunt sabbatum.\n46 Et misit rex libros per manus nuntiorum in Jerusalem, et in omnes civitates Juda, ut sequerentur leges gentium terr\u00e6,\n47 et prohiberent holocausta et sacrificia, et placationes fieri in templo Dei,\n48 et prohiberent celebrari sabbatum, et dies solemnes:\n49 et jussit coinquinari sancta, et sanctum populum Isra\u00ebl.\n50 Et jussit \u00e6dificari aras, et templa, et idola, et immolari carnes suillas, et pecora communia,\n51 et relinquere filios suos incircumcisos, et coinquinari animas eorum in omnibus immundis, et abominationibus, ita ut obliviscerentur legem, et immutarent omnes justificationes Dei:\n52 et quicumque non fecissent secundum verbum regis Antiochi, morerentur.\n53 Secundum omnia verba h\u00e6c scripsit omni regno suo: et pr\u00e6posuit principes populo, qui h\u00e6c fieri cogerent.\n54 Et jusserunt civitatibus Juda sacrificare.\n55 Et congregati sunt multi de populo ad eos qui dereliquerant legem Domini, et fecerunt mala super terram:\n56\u00a0et effugaverunt populum Isra\u00ebl in abditis, et in absconditis fugitivorum locis.\n \n57 Die quintadecima mensis Casleu, quinto et quadragesimo et centesimo anno, \u00e6dificavit rex Antiochus abominandum idolum desolationis super altare Dei, et per universas civitates Juda in circuitu \u00e6dificaverunt aras:\n58 et ante januas domorum et in plateis incendebant thura, et sacrificabant:\n59 et libros legis Dei combusserunt igni, scindentes eos:\n60 et apud quemcumque inveniebantur libri testamenti Domini, et quicumque observabat legem Domini, secundum edictum regis trucidabant eum.\n61 In virtute sua faciebant h\u00e6c populo Isra\u00ebl, qui inveniebatur in omni mense et mense in civitatibus.\n62 Et quinta et vigesima die mensis sacrificabant super aram, qu\u00e6 erat contra altare.\n63 Et mulieres, qu\u00e6 circumcidebant filios suos, trucidabantur secundum jussum regis Antiochi,\n64 et suspendebant pueros a cervicibus per universas domos eorum: et eos, qui circumciderant illos, trucidabant.\n65 Et multi de populo Isra\u00ebl definierunt apud se, ut non manducarent immunda: et elegerunt magis mori, quam cibis coinquinari immundis:\n66 et noluerunt infringere legem Dei sanctam, et trucidati sunt:\n67 et facta est ira magna super populum valde.","title":"Vulgate: 1 Macabees: 1 Macabees Chapter 1","type":"page"}