{"collection":"Bible & Christianity","html_url":"https://unchartedknowledge.5gfusion.net/browse/bib/vul/ma1002.htm","path":"bib/vul/ma1002.htm","source_url":"https://sacred-texts.com/bib/vul/ma1002.htm","text":"1 In diebus illis surrexit Mathathias filius Joannis filii Simeonis, sacerdos ex filiis Joarib, ab Jerusalem, et consedit in monte Modin:\n2 et habebat filios quinque, Joannem, qui cognominabatur Gaddis:\n3 et Simonem, qui cognominabatur Thasi:\n4 et Judam, qui vocabatur Machab\u00e6us:\n5 et Eleazarum, qui cognominabatur Abaron: et Jonathan, qui cognominabatur Apphus:\n6 hi viderunt mala, qu\u00e6 fiebant in populo Juda, et in Jerusalem.\n7 Et dixit Mathathias: V\u00e6 mihi! ut quid natus sum videre contritionem populi mei, et contritionem civitatis sanct\u00e6, et sedere illic, cum datur in manibus inimicorum?\n8 Sancta in manu extraneorum facta sunt: templum ejus sicut homo ignobilis.\n9 Vasa glori\u00e6 ejus captiva abducta sunt: trucidati sunt senes ejus in plateis, et juvenes ejus ceciderunt in gladio inimicorum.\n10 Qu\u00e6 gens non h\u00e6reditavit regnum ejus et non obtinuit spolia ejus?\n11 Omnis compositio ejus ablata est. Qu\u00e6 erat libera, facta est ancilla.\n12 Et ecce sancta nostra, et pulchritudo nostra, et claritas nostra desolata est, et coinquinaverunt ea gentes.\n13 Quo ergo nobis adhuc vivere?\n14\u00a0Et scidit vestimenta sua Mathathias, et filii ejus: et operuerunt se ciliciis, et planxerunt valde.\n \n15 Et venerunt illuc qui missi erant a rege Antiocho, ut cogerent eos, qui confugerant in civitatem Modin, immolare, et accendere thura, et a lege Dei discedere.\n16 Et multi de populo Isra\u00ebl consentientes accesserunt ad eos: sed Mathathias et filii ejus constanter steterunt.\n17 Et respondentes qui missi erant ab Antiocho, dixerunt Mathathi\u00e6: Princeps, et clarissimus et magnus es in hac civitate, et ornatus filiis et fratribus:\n18 ergo accede prior, et fac jussum regis, sicut fecerunt omnes gentes, et viri Juda, et qui remanserunt in Jerusalem: et eris tu, et filii tui, inter amicos regis, et amplificatus auro, et argento, et muneribus multis.\n19 Et respondit Mathathias, et dixit magna voce: Etsi omnes gentes regi Antiocho obediunt, ut discedat unusquisque a servitute legis patrum suorum, et consentiat mandatis ejus:\n20 ego et filii mei, et fratres mei, obediemus legi patrum nostrorum:\n21 propitius sit nobis Deus: non est nobis utile relinquere legem, et justitias Dei:\n22 non audiemus verba regis Antiochi, nec sacrificabimus transgredientes legis nostr\u00e6 mandata, ut eamus altera via.\n23 Et ut cessavit loqui verba h\u00e6c, accessit quidam Jud\u00e6us in omnium oculis sacrificare idolis super aram in civitate Modin, secundum jussum regis:\n24 et vidit Mathathias, et doluit, et contremuerunt renes ejus, et accensus est furor ejus secundum judicium legis, et insiliens trucidavit eum super aram:\n25 sed et virum, quem rex Antiochus miserat, qui cogebat immolare, occidit in ipso tempore, et aram destruxit:\n26 et zelatus est legem, sicut fecit Phinees Zamri filio Salomi.\n27 Et exclamavit Mathathias voce magna in civitate, dicens: Omnis qui zelum habet legis, statuens testamentum, exeat post me.\n28\u00a0Et fugit ipse, et filii ejus in montes, et reliquerunt qu\u00e6cumque habebant in civitate.\n \n29 Tunc descenderunt multi qu\u00e6rentes judicium, et justitiam, in desertum:\n30 et sederunt ibi ipsi, et filii eorum, et mulieres eorum, et pecora eorum: quoniam inundaverunt super eos mala.\n31 Et renuntiatum est viris regis, et exercitui qui erat in Jerusalem civitate David, quoniam discessissent viri quidam, qui dissipaverunt mandatum regis, in loca occulta in deserto, et abiissent post illos multi.\n32 Et statim perrexerunt ad eos, et constituerunt adversus eos pr\u00e6lium in die sabbatorum,\n33 et dixerunt ad eos: Resistitis et nunc adhuc? exite, et facite secundum verbum regis Antiochi, et vivetis.\n34 Et dixerunt: Non exibimus, neque faciemus verbum regis, ut polluamus diem sabbatorum.\n35 Et concitaverunt adversus eos pr\u00e6lium.\n36 Et non responderunt eis, nec lapidem miserunt in eos, nec oppilaverunt loca occulta,\n37 dicentes: Moriamur omnes in simplicitate nostra: et testes erunt super nos c\u00e6lum et terra, quod injuste perditis nos.\n38 Et intulerunt illis bellum sabbatis: et mortui sunt ipsi, et uxores eorum, et filii eorum, et pecora eorum usque ad mille animas hominum.\n39 Et cognovit Mathathias et amici ejus, et luctum habuerunt super eos valde.\n40 Et dixit vir proximo suo: Si omnes fecerimus sicut fratres nostri fecerunt, et non pugnaverimus adversus gentes pro animabus nostris et justificationibus nostris, nunc citius disperdent nos a terra.\n41\u00a0Et cogitaverunt in die illa, dicentes: Omnis homo, quicumque venerit ad nos in bello die sabbatorum, pugnemus adversus eum: et non moriemur omnes, sicut mortui sunt fratres nostri in occultis.\n \n42 Tunc congregata est ad eos synagoga Assid\u00e6orum fortis viribus ex Isra\u00ebl, omnis voluntarius in lege:\n43 et omnes, qui fugiebant a malis, additi sunt ad eos, et facti sunt illis ad firmamentum.\n44 Et collegerunt exercitum, et percusserunt peccatores in ira sua, et viros iniquos in indignatione sua: et ceteri fugerunt ad nationes, ut evaderent.\n45 Et circuivit Mathathias et amici ejus, et destruxerunt aras:\n46 et circumciderunt pueros incircumcisos quotquot invenerunt in finibus Isra\u00ebl: et in fortitudine.\n47 Et persecuti sunt filios superbi\u00e6, et prosperatum est opus in manibus eorum:\n48\u00a0et obtinuerunt legem de manibus gentium, et de manibus regum, et non dederant cornu peccatori.\n \n49 Et appropinquaverunt dies Mathathi\u00e6 moriendi, et dixit filiis suis: Nunc confortata est superbia, et castigatio, et tempus eversionis, et ira indignationis.\n50 Nunc ergo, o filii, \u00e6mulatores estote legis, et date animas vestras pro testamento patrum vestrorum,\n51 et mementote operum patrum, qu\u00e6 fecerunt in generationibus suis: et accipietis gloriam magnam, et nomen \u00e6ternum.\n52 Abraham nonne in tentatione inventus est fidelis, et reputatum est ei ad justitiam?\n53 Joseph in tempore angusti\u00e6 su\u00e6 custodivit mandatum, et factus est dominus \u00c6gypti.\n54 Phinees pater noster, zelando zelum Dei, accepit testamentum sacerdotii \u00e6terni.\n55 Jesus dum implevit verbum, factus est dux in Isra\u00ebl.\n56 Caleb dum testificatur in ecclesia, accepit h\u00e6reditatem.\n57 David in sua misericordia consecutus est sedem regni in s\u00e6cula.\n58 Elias, dum zelat zelum legis, receptus est in c\u00e6lum.\n59 Ananias et Azarias et Misa\u00ebl credentes, liberati sunt de flamma.\n60 Daniel in sua simplicitate liberatus est de ore leonum.\n61 Et ita cogitate per generationem et generationem: quia omnes qui sperant in eum, non infirmantur.\n62 Et a verbis viri peccatoris ne timueritis, quia gloria ejus stercus et vermis est:\n63 hodie extollitur, et cras non invenietur: quia conversus est in terram suam, et cogitatio ejus periit.\n64 Vos ergo filii, confortamini, et viriliter agite in lege: quia in ipsa gloriosi eritis.\n65 Et ecce Simon frater vester, scio quod vir consilii est: ipsum audite semper, et ipse erit vobis pater.\n66 Et Judas Machab\u00e6us, fortis viribus a juventute sua, sit vobis princeps militi\u00e6, et ipse aget bellum populi.\n67 Et adducetis ad vos omnes factores legis: et vindicate vindictam populi vestri.\n68\u00a0Retribuite retributionem gentibus, et intendite in pr\u00e6ceptum legis.\n \n69 Et benedixit eos, et appositus est ad patres suos.\n70 Et defunctus est anno centesimo et quadragesimo sexto: et sepultus est a filiis suis in sepulchris patrum suorum in Modin, et planxerunt eum omnis Isra\u00ebl planctu magno.","title":"Vulgate: 1 Macabees: 1 Macabees Chapter 2","type":"page"}