{"collection":"Bible & Christianity","html_url":"https://unchartedknowledge.5gfusion.net/browse/bib/vul/ma1003.htm","path":"bib/vul/ma1003.htm","source_url":"https://sacred-texts.com/bib/vul/ma1003.htm","text":"1 Et surrexit Judas, qui vocabatur Machab\u00e6us, filius ejus, pro eo:\n2 et adjuvabant eum omnes fratres ejus, et universi qui se conjunxerant patri ejus, et pr\u00e6liabantur pr\u00e6lium Isra\u00ebl cum l\u00e6titia.\n3\u00a0[Et dilatavit gloriam populo suo,\n et induit se loricam sicut gigas,\n et succinxit se arma bellica sua in pr\u00e6liis,\n et protegebat castra gladio suo.\n4\u00a0Similis factus est leoni in operibus suis,\n et sicut catulus leonis rugiens in venatione.\n5\u00a0Et persecutus est iniquos perscrutans eos:\n et qui conturbabant populum suum, eos succendit flammis:\n6\u00a0et repulsi sunt inimici ejus pr\u00e6 timore ejus,\n et omnes operarii iniquitatis conturbati sunt:\n et directa est salus in manu ejus.\n7\u00a0Et exacerbabat reges multos,\n et l\u00e6tificabat Jacob in operibus suis,\n et in s\u00e6culum memoria ejus in benedictione.\n8\u00a0Et perambulavit civitates Juda,\n et perdidit impios ex eis,\n et avertit iram ab Isra\u00ebl.\n9\u00a0Et nominatus est usque ad novissimum terr\u00e6,\n et congregavit pereuntes.]\n \n10 Et congregavit Apollonius gentes, et a Samaria virtutem multam et magnam ad bellandum contra Isra\u00ebl.\n11 Et cognovit Judas, et exiit obviam illi: et percussit, et occidit illum: et ceciderunt vulnerati multi, et reliqui fugerunt.\n12 Et accepit spolia eorum: et gladium Apollonii abstulit Judas, et erat pugnans in eo omnibus diebus.\n13 Et audivit Seron princeps exercitus Syri\u00e6, quod congregavit Judas congregationem fidelium, et ecclesiam secum,\n14 et ait: Faciam mihi nomen, et glorificabor in regno, et debellabo Judam, et eos qui cum ipso sunt, qui spernebant verbum regis.\n15 Et pr\u00e6paravit se: et ascenderunt cum eo castra impiorum fortes auxiliarii ut facerent vindictam in filios Isra\u00ebl.\n16 Et appropinquaverunt usque ad Bethoron: et exivit Judas obviam illi cum paucis.\n17 Ut autem viderunt exercitum venientem sibi obviam, dixerunt Jud\u00e6: Quomodo poterimus pauci pugnare contra multitudinem tantam, et tam fortem, et nos fatigati sumus jejunio hodie?\n18 Et ait Judas: Facile est concludi multos in manus paucorum: et non est differentia in conspectu Dei c\u00e6li liberare in multis, et in paucis:\n19 quoniam non in multitudine exercitus victoria belli, sed de c\u00e6lo fortitudo est.\n20 Ipsi veniunt ad nos in multitudine contumaci, et superbia, ut disperdant nos, et uxores nostras, et filios nostros, et ut spolient nos:\n21 nos vero pugnabimus pro animabus nostris, et legibus nostris:\n22 et ipse Dominus conteret eos ante faciem nostram: vos autem ne timueritis eos.\n23 Ut cessavit autem loqui, insiluit in eos subito: et contritus est Seron et exercitus ejus in conspectu ipsius:\n24 et persecutus est eum in descensu Bethoron usque in campum, et ceciderunt ex eis octingenti viri, reliqui autem fugerunt in terram Philisthiim.\n25 Et cecidit timor Jud\u00e6 ac fratrum ejus, et formido super omnes gentes in circuitu eorum:\n26\u00a0et pervenit ad regem nomen ejus, et de pr\u00e6liis Jud\u00e6 narrabant omnes gentes.\n \n27 Ut audivit autem rex Antiochus sermones istos, iratus est animo: et misit, et congregavit exercitum universi regni sui, castra fortia valde:\n28 et aperuit \u00e6rarium suum, et dedit stipendia exercitui in annum: et mandavit illis ut essent parati ad omnia.\n29 Et vidit quod defecit pecunia de thesauris suis, et tributa regionis modica propter dissensionem et plagam quam fecit in terra, ut tolleret legitima, qu\u00e6 erant a primis diebus:\n30 et timuit ne non haberet ut semel et bis, in sumptus et donaria, qu\u00e6 dederat ante larga manu: et abundaverat super reges qui ante eum fuerant.\n31 Et consternatus erat animo valde, et cogitavit ire in Persidem, et accipere tributa regionum, et congregare argentum multum.\n32 Et reliquit Lysiam hominem nobilem de genere regali, super negotia regia, a flumine Euphrate usque ad flumen \u00c6gypti,\n33 et ut nutriret Antiochum filium suum, donec rediret.\n34 Et tradidit ei medium exercitum, et elephantos: et mandavit ei de omnibus qu\u00e6 volebat, et de inhabitantibus Jud\u00e6am, et Jerusalem:\n35 et ut mitteret ad eos exercitum ad conterendam et extirpandam virtutem Isra\u00ebl, et reliquias Jerusalem, et auferendam memoriam eorum de loco:\n36 et ut constitueret habitatores filios alienigenas in omnibus finibus eorum, et sorte distribueret terram eorum.\n37\u00a0Et rex assumpsit partem exercitus residui, et exivit ab Antiochia civitate regni sui anno centesimo et quadragesimo septimo: et transfretavit Euphraten flumen, et perambulabat superiores regiones.\n \n38 Et elegit Lysias Ptolem\u00e6um filium Dorymini, et Nicanorem, et Gorgiam, viros potentes ex amicis regis:\n39 et misit cum eis quadraginta millia virorum, et septem millia equitum, ut venirent in terram Juda, et disperderent eam secundum verbum regis.\n40 Et processerunt cum universa virtute sua, et venerunt, et applicuerunt Emmaum in terra campestri.\n41 Et audierunt mercatores regionum nomen eorum: et acceperunt argentum, et aurum multum valde, et pueros, et venerunt in castra ut acciperent filios Isra\u00ebl in servos, et additi sunt ad eos exercitus Syri\u00e6, et terr\u00e6 alienigenarum.\n42 Et vidit Judas et fratres ejus, quia multiplicata sunt mala, et exercitus applicabant ad fines eorum: et cognoverunt verba regis, qu\u00e6 mandavit populo facere in interitum et consummationem:\n43 et dixerunt unusquisque ad proximum suum: Erigamus dejectionem populi nostri, et pugnemus pro populo nostro, et sanctis nostris.\n44 Et congregatus est conventus ut essent parati in pr\u00e6lium, et ut orarent et peterent misericordiam et miserationes.\n45\u00a0Et Jerusalem non habitabatur, sed erat sicut desertum: non erat qui ingrederetur et egrederetur de natis ejus. Et sanctum conculcabatur: et filii alienigenarum erant in arce; ibi erat habitatio gentium: et ablata est voluptas a Jacob, et defecit ibi tibia et cithara.\n \n46 Et congregati sunt, et venerunt in Maspha contra Jerusalem, quia locus orationis erat in Maspha ante in Isra\u00ebl.\n47 Et jejunaverunt illa die, et induerunt se ciliciis, et cinerem imposuerunt capiti suo, et disciderunt vestimenta sua:\n48 et expanderunt libros legis, de quibus scrutabantur gentes similitudinem simulacrorum suorum:\n49 et attulerunt ornamenta sacerdotalia, et primitias, et decimas: et suscitaverunt Nazar\u00e6os, qui impleverant dies,\n50 et clamaverunt voce magna in c\u00e6lum, dicentes: Quid faciemus istis, et quo eos ducemus?\n51 et sancta tua conculcata sunt, et contaminata sunt, et sacerdotes tui facti sunt in luctum, et in humilitatem:\n52 et ecce nationes convenerunt adversum nos ut nos disperdant: tu scis qu\u00e6 cogitant in nos.\n53 Quomodo poterimus subsistere ante faciem eorum, nisi tu, Deus, adjuves nos?\n54 Et tubis exclamaverunt voce magna.\n55 Et post h\u00e6c constituit Judas duces populi, tribunos, et centuriones, et pentacontarchos, et decuriones.\n56 Et dixit his, qui \u00e6dificabant domos, et sponsabant uxores, et plantabant vineas, et formidolosis, ut redirent unusquisque in domum suam secundum legem.\n57 Et moverunt castra, et collocaverunt ad austrum Emmaum.\n58 Et ait Judas: Accingimini, et estote filii potentes, et estote parati in mane, ut pugnetis adversus nationes has qu\u00e6 convenerunt adversus nos disperdere nos, et sancta nostra:\n59 quoniam melius est nos mori in bello, quam videre mala gentis nostr\u00e6, et sanctorum.\n60 Sicut autem fuerit voluntas in c\u00e6lo, sic fiat.","title":"Vulgate: 1 Macabees: 1 Macabees Chapter 3","type":"page"}