{"collection":"Bible & Christianity","html_url":"https://unchartedknowledge.5gfusion.net/browse/bib/vul/ma1004.htm","path":"bib/vul/ma1004.htm","source_url":"https://sacred-texts.com/bib/vul/ma1004.htm","text":"1 Et assumpsit Gorgias quinque millia virorum, et mille equites electos: et moverunt castra nocte,\n2 ut applicarent ad castra Jud\u00e6orum, et percuterent eos subito: et filii, qui erant ex arce, erant illis duces.\n3 Et audivit Judas, et surrexit ipse et potentes percutere virtutem exercituum regis, qui erant in Emmaum:\n4 adhuc enim dispersus erat exercitus a castris.\n5 Et venit Gorgias in castra Jud\u00e6 noctu, et neminem invenit: et qu\u00e6rebat eos in montibus, quoniam dixit: Fugiunt hi a nobis.\n6 Et cum dies factus esset, apparuit Judas in campo cum tribus millibus virorum tantum, qui tegumenta et gladios non habebant:\n7 et viderunt castra gentium valida, et loricatos et equitatus in circuitu eorum, et hi docti ad pr\u00e6lium.\n8 Et ait Judas viris, qui secum erant: Ne timueritis multitudinem eorum, et impetum eorum ne formidetis.\n9 Mementote qualiter salvi facti sunt patres nostri in mari Rubro, cum sequeretur eos Pharao cum exercitu multo.\n10 Et nunc clamemus in c\u00e6lum: et miserebitur nostri Dominus, et memor erit testamenti patrum nostrorum, et conteret exercitum istum ante faciem nostram hodie:\n11 et scient omnes gentes quia est qui redimat et liberet Isra\u00ebl.\n12 Et elevaverunt alienigen\u00e6 oculos suos, et viderunt eos venientes ex adverso.\n13 Et exierunt de castris in pr\u00e6lium, et tuba cecinerunt hi qui erant cum Juda.\n14 Et congressi sunt: et contrit\u00e6 sunt gentes, et fugerunt in campum.\n15 Novissimi autem omnes ceciderunt in gladio, et persecuti sunt eos usque Gezeron, et usque in campos Idum\u00e6\u00e6, et Azoti, et Jamni\u00e6: et ceciderunt ex illis usque ad tria millia virorum.\n16 Et reversus est Judas, et exercitus ejus sequens eum.\n17 Dixitque ad populum: Non concupiscatis spolia: quia bellum contra nos est,\n18 et Gorgias et exercitus ejus prope nos in monte: sed state nunc contra inimicos nostros, et expugnate eos, et sumetis postea spolia securi.\n19 Et adhuc loquente Juda h\u00e6c, ecce apparuit pars qu\u00e6dam prospiciens de monte.\n20 Et vidit Gorgias quod in fugam conversi sunt sui, et succenderunt castra: fumus enim, qui videbatur, declarabat quod factum est.\n21 Quibus illi conspectis timuerunt valde, aspicientes simul et Judam, et exercitum in campo paratum ad pr\u00e6lium.\n22 Et fugerunt omnes in campum alienigenarum:\n23 et Judas reversus est ad spolia castrorum, et acceperunt aurum multum, et argentum, et hyacinthinum, et purpuram marinam, et opes magnas.\n24 Et conversi, hymnum canebant, et benedicebant Deum in c\u00e6lum, quoniam bonus est, quoniam in s\u00e6culum misericordia ejus.\n25 Et facta est salus magna in Isra\u00ebl in die illa.\n26 Quicumque autem alienigenarum evaserunt, venerunt, et nuntiaverunt Lysi\u00e6 universa qu\u00e6 acciderant.\n27\u00a0Quibus ille auditis, consternatus animo deficiebat: quod non qualia voluit, talia contigerunt in Isra\u00ebl, et qualia mandavit rex.\n \n28 Et sequenti anno, congregavit Lysias virorum electorum sexaginta millia, et equitum quinque millia, ut debellaret eos.\n29 Et venerunt in Jud\u00e6am, et castra posuerunt in Bethoron, et occurrit illis Judas cum decem millibus viris.\n30 Et viderunt exercitum fortem, et oravit, et dixit: Benedictus es, salvator Isra\u00ebl, qui contrivisti impetum potentis in manu servi tui David, et tradidisti castra alienigenarum in manu Jonath\u00e6 filii Saul, et armigeri ejus.\n31 Conclude exercitum istum in manu populi tui Isra\u00ebl, et confundantur in exercitu suo et equitibus.\n32 Da illis formidinem, et tabefac audaciam virtutis eorum, et commoveantur contritione sua.\n33 Dejice illos gladio diligentium te: et collaudent te omnes, qui noverunt nomen tuum, in hymnis.\n34 Et commiserunt pr\u00e6lium: et ceciderunt de exercitu Lysi\u00e6 quinque millia virorum.\n35\u00a0Videns autem Lysias fugam suorum, et Jud\u00e6orum audaciam, et quod parati sunt aut vivere, aut mori fortiter, abiit Antiochiam, et elegit milites, ut multiplicati rursus venirent in Jud\u00e6am.\n \n36 Dixit autem Judas, et fratres ejus: Ecce contriti sunt inimici nostri: ascendamus nunc mundare sancta, et renovare.\n37 Et congregatus est omnis exercitus, et ascenderunt in montem Sion.\n38 Et viderunt sanctificationem desertam, et altare profanatum, et portas exustas, et in atriis virgulta nata sicut in saltu vel in montibus, et pastophoria diruta.\n39 Et sciderunt vestimenta sua, et planxerunt planctu magno, et imposuerunt cinerem super caput suum,\n40 et ceciderunt in faciem super terram, et exclamaverunt tubis signorum, et clamaverunt in c\u00e6lum.\n41 Tunc ordinavit Judas viros ut pugnarent adversus eos qui erant in arce, donec emundarent sancta.\n42 Et elegit sacerdotes sine macula, voluntatem habentes in lege Dei:\n43 et mundaverunt sancta, et tulerunt lapides contaminationis in locum immundum.\n44 Et cogitavit de altari holocaustorum, quod profanatum erat, quid de eo faceret.\n45 Et incidit illis consilium bonum ut destruerent illud: ne forte illis esset in opprobrium, quia contaminaverunt illud gentes, et demoliti sunt illud.\n46 Et reposuerunt lapides in monte domus in loco apto, quoadusque veniret propheta, et responderet de eis.\n47 Et acceperunt lapides integros secundum legem, et \u00e6dificaverunt altare novum secundum illud quod fuit prius:\n48 et \u00e6dificaverunt sancta, et qu\u00e6 intra domum erant intrinsecus: et \u00e6dem, et atria sanctificaverunt.\n49 Et fecerunt vasa sancta nova, et intulerunt candelabrum, et altare incensorum, et mensam, in templum.\n50 Et incensum posuerunt super altare, et accenderunt lucernas qu\u00e6 super candelabrum erant, et lucebant in templo.\n51 Et posuerunt super mensam panes, et appenderunt vela, et consummaverunt omnia opera qu\u00e6 fecerant.\n52 Et ante matutinum surrexerunt quinta et vigesima die mensis noni (hic est mensis Casleu) centesimi quadragesimi octavi anni:\n53 et obtulerunt sacrificium secundum legem super altare holocaustorum novum, quod fecerunt.\n54 Secundum tempus et secundum diem in qua contaminaverunt illud gentes, in ipsa renovatum est in canticis, et citharis, et cinyris, et in cymbalis.\n55 Et cecidit omnis populus in faciem, et adoraverunt, et benedixerunt in c\u00e6lum eum, qui prosperavit eis.\n56 Et fecerunt dedicationem altaris diebus octo, et obtulerunt holocausta cum l\u00e6titia, et sacrificium salutaris et laudis.\n57 Et ornaverunt faciem templi coronis aureis et scutulis, et dedicaverunt portas et pastophoria, et imposuerunt eis januas.\n58 Et facta est l\u00e6titia in populo magna valde, et aversum est opprobrium gentium.\n59 Et statuit Judas, et fratres ejus, et universa ecclesia Isra\u00ebl, ut agatur dies dedicationis altaris in temporibus suis ab anno in annum per dies octo a quinta et vigesima die mensis Casleu, cum l\u00e6titia et gaudio.\n60 Et \u00e6dificaverunt in tempore illo montem Sion, et per circuitum muros altos et turres firmas, nequando venirent gentes, et conculcarent eum sicut antea fecerunt.\n61 Et collocavit illic exercitum, ut servarent eum, et munivit eum ad custodiendum Bethsuram, ut haberet populus munitionem contra faciem Idum\u00e6\u00e6.","title":"Vulgate: 1 Macabees: 1 Macabees Chapter 4","type":"page"}