{"collection":"Bible & Christianity","html_url":"https://unchartedknowledge.5gfusion.net/browse/bib/vul/ma1014.htm","path":"bib/vul/ma1014.htm","source_url":"https://sacred-texts.com/bib/vul/ma1014.htm","text":"1 Anno centesimo septuagesimo secundo, congregavit rex Demetrius exercitum suum, et abiit in Mediam ad contrahenda sibi auxilia, ut expugnaret Tryphonem.\n2 Et audivit Arsaces rex Persidis et Medi\u00e6, quia intravit Demetrius confines suos: et misit unum de principibus suis ut comprehenderet eum vivum, et adduceret eum ad se.\n3 Et abiit, et percussit castra Demetrii: et comprehendit eum, et duxit eum ad Arsacem, et posuit eum in custodiam.\n4 Et siluit omnis terra Juda omnibus diebus Simonis, et qu\u00e6sivit bona genti su\u00e6: et placuit illis potestas ejus et gloria ejus omnibus diebus.\n5 Et cum omni gloria sua accepit Joppen in portum, et fecit introitum in insulis maris.\n6 Et dilatavit fines gentis su\u00e6, et obtinuit regionem.\n7 Et congregavit captivitatem multam, et dominatus est Gazar\u00e6, et Bethsur\u00e6, et arci: et abstulit immunditias ex ea, et non erat qui resisteret ei.\n8 Et unusquisque colebat terram suam cum pace: et terra Juda dabat fructus suos, et ligna camporum fructum suum.\n9 Seniores in plateis sedebant omnes, et de bonis terr\u00e6 tractabant, et juvenes induebant se gloriam, et stolas belli.\n10 Et civitatibus tribuebat alimonias, et constituebat eas ut essent vasa munitionis quoadusque nominatum est nomen glori\u00e6 ejus usque ad extremum terr\u00e6.\n11 Fecit pacem super terram, et l\u00e6tatus est Isra\u00ebl l\u00e6titia magna.\n12 Et sedit unusquisque sub vite sua, et sub ficulnea sua: et non erat qui eos terreret.\n13 Defecit impugnans eos super terram: reges contriti sunt in diebus illis.\n14 Et confirmavit omnes humiles populi sui, et legem exquisivit, et abstulit omnem iniquum et malum:\n15\u00a0sancta glorificavit, et multiplicavit vasa sanctorum.\n \n16 Et auditum est Rom\u00e6 quia defunctus esset Jonathas, et usque in Spartiatas: et contristati sunt valde.\n17 Ut audierunt autem quod Simon frater ejus factus esset summus sacerdos loco ejus, et ipse obtineret omnem regionem, et civitates in ea,\n18 scripserunt ad eum in tabulis \u00e6reis, ut renovarent amicitias et societatem quam fecerant cum Juda et cum Jonatha, fratribus ejus.\n19 Et lect\u00e6 sunt in conspectu ecclesi\u00e6 in Jerusalem. Et hoc exemplum epistolarum, quas Spartiat\u00e6 miserunt:\n20 Spartianorum principes et civitates, Simoni sacerdoti magno, et senioribus, et sacerdotibus, et reliquo populo Jud\u00e6orum, fratribus, salutem.\n21 Legati, qui missi sunt ad populum nostrum, nuntiaverunt nobis de vestra gloria, et honore, ac l\u00e6titia: et gavisi sumus in introitu eorum.\n22 Et scripsimus qu\u00e6 ab eis erant dicta in conciliis populi, sic: Numenius Antiochi, et Antipater Jasonis filius, legati Jud\u00e6orum, venerunt ad nos, renovantes nobiscum amicitiam pristinam.\n23 Et placuit populo excipere viros gloriose, et ponere exemplum sermonum eorum in segregatis populi libris, ut sit ad memoriam populo Spartiatarum. Exemplum autem horum scripsimus Simoni magno sacerdoti.\n24\u00a0Post h\u00e6c autem misit Simon Numenium Romam, habentem clypeum aureum magnum, pondo mnarum mille, ad statuendam cum eis societatem.\n Cum autem audisset populus Romanus\n25 sermones istos, dixerunt: Quam gratiarum actionem reddemus Simoni, et filiis ejus?\n26 restituit enim ipse fratres suos, et expugnavit inimicos Isra\u00ebl ab eis, et statuerunt ei libertatem, et descripserunt in tabulis \u00e6reis, et posuerunt in titulis in monte Sion.\n27 Et hoc est exemplum scriptur\u00e6: Octavadecima die mensis Elul, anno centesimo septuagesimo secundo, anno tertio sub Simone sacerdote magno in Asaramel,\n28 in conventu magno sacerdotum, et populi, et principum gentis, et seniorum regionis, nota facta sunt h\u00e6c: quoniam frequenter facta sunt pr\u00e6lia in regione nostra,\n29 Simon autem Mathathi\u00e6 filius, ex filiis Jarib, et fratres ejus, dederunt se periculo, et restiterunt adversariis gentis su\u00e6, ut starent sancta ipsorum, et lex: et gloria magna glorificaverunt gentem suam.\n30 Et congregavit Jonathas gentem suam, et factus est illis sacerdos magnus, et appositus est ad populum suum.\n31 Et voluerunt inimici eorum calcare et atterere regionem ipsorum, et extendere manus in sancta eorum.\n32 Tunc restitit Simon, et pugnavit pro gente sua, et erogavit pecunias multas, et armavit viros virtutis gentis su\u00e6, et dedit illis stipendia:\n33 et munivit civitates Jud\u00e6\u00e6, et Bethsuram, qu\u00e6 erat in finibus Jud\u00e6\u00e6, ubi erant arma hostium antea: et posuit illic pr\u00e6sidium viros Jud\u00e6os.\n34 Et Joppen munivit, qu\u00e6 erat ad mare, et Gazaram, qu\u00e6 est in finibus Azoti, in qua hostes antea habitabant: et collocavit illic Jud\u00e6os, et qu\u00e6cumque apta erant ad correptionem eorum, posuit in eis.\n35 Et vidit populus actum Simonis, et gloriam quam cogitabat facere genti su\u00e6, et posuerunt eum ducem suum, et principem sacerdotum, eo quod ipse fecerat h\u00e6c omnia, et justitiam, et fidem, quam conservavit genti su\u00e6, et exquisivit omni modo exaltare populum suum.\n36 Et in diebus ejus prosperatum est in manibus ejus, ut tollerentur gentes de regione ipsorum, et qui in civitate David erant, in Jerusalem in arce, de qua procedebant, et contaminabant omnia qu\u00e6 in circuitu sanctorum sunt, et inferebant plagam magnam castitati:\n37 et collocavit in ea viros Jud\u00e6os ad tutamentum regionis, et civitatis, et exaltavit muros Jerusalem.\n38 Et rex Demetrius statuit illi summum sacerdotium.\n39 Secundum h\u00e6c fecit eum amicum suum, et glorificavit eum gloria magna.\n40 Audivit enim quod appellati sunt Jud\u00e6i a Romanis amici, et socii, et fratres, et quia susceperunt legatos Simonis gloriose,\n41 et quia Jud\u00e6i et sacerdotes eorum consenserunt eum esse ducem suum, et summum sacerdotem in \u00e6ternum, donec surgat propheta fidelis:\n42 et ut sit super eos dux, et ut cura esset illi pro sanctis, et ut constitueret pr\u00e6positos super opera eorum, et super regionem, et super arma, et super pr\u00e6sidia:\n43 et cura sit illi de sanctis: et ut audiatur ab omnibus, et scribantur in nomine ejus omnes conscriptiones in regione: et ut operiatur purpura et auro:\n44 et ne liceat ulli ex populo et ex sacerdotibus irritum facere aliquid horum, et contradicere his qu\u00e6 ab eo dicuntur, aut convocare conventum in regione sine ipso, et vestiri purpura, et uti fibula aurea:\n45 qui autem fecerit extra h\u00e6c, aut irritum fecerit aliquid horum, reus erit.\n46 Et complacuit omni populo statuere Simonem, et facere secundum verba ista.\n47 Et suscepit Simon, et placuit ei ut summo sacerdotio fungeretur, et esset dux et princeps gentis Jud\u00e6orum, et sacerdotum, et pr\u00e6esset omnibus.\n48 Et scripturam istam dixerunt ponere in tabulis \u00e6reis, et ponere eas in peribolo sanctorum, in loco celebri:\n49 exemplum autem eorum ponere in \u00e6rario, ut habeat Simon, et filii ejus.","title":"Vulgate: 1 Macabees: 1 Macabees Chapter 14","type":"page"}