{"collection":"Bible & Christianity","html_url":"https://unchartedknowledge.5gfusion.net/browse/bib/vul/ma2001.htm","path":"bib/vul/ma2001.htm","source_url":"https://sacred-texts.com/bib/vul/ma2001.htm","text":"1 Fratribus qui sunt per \u00c6gyptum Jud\u00e6is, salutem dicunt fratres qui sunt in Jerosolymis Jud\u00e6i, et qui in regione Jud\u00e6\u00e6, et pacem bonam.\n2 Benefaciat vobis Deus, et meminerit testamenti sui, quod locutus est ad Abraham, et Isaac, et Jacob servorum suorum fidelium:\n3 et det vobis cor omnibus ut colatis eum, et faciatis ejus voluntatem, corde magno et animo volenti.\n4 Adaperiat cor vestrum in lege sua, et in pr\u00e6ceptis suis, et faciat pacem.\n5 Exaudiat orationes vestras, et reconcilietur vobis, nec vos deserat in tempore malo.\n6 Et nunc hic sumus orantes pro vobis.\n7 Regnante Demetrio, anno centesimo sexagesimo nono, nos Jud\u00e6i scripsimus vobis in tribulatione et impetu qui supervenit nobis in istis annis, ex quo recessit Jason a sancta terra, et a regno.\n8 Portam succenderunt, et effuderunt sanguinem innocentem: et oravimus ad Dominum, et exauditi sumus, et obtulimus sacrificium et similaginem, et accendimus lucernas, et proposuimus panes.\n9\u00a0Et nunc frequentate dies scenopegi\u00e6 mensis Casleu.\n \n10 Anno centesimo octogesimo octavo, populus qui est Jerosolymis et in Jud\u00e6a, senatusque et Judas, Aristobolo magistro Ptolem\u00e6i regis, qui est de genere christorum sacerdotum, et his qui in \u00c6gypto sunt Jud\u00e6is, salutem et sanitatem.\n11 De magnis periculis a Deo liberati, magnifice gratias agimus ipsi, utpote qui adversus talem regem dimicavimus.\n12 Ipse enim ebullire fecit de Perside eos qui pugnaverunt contra nos et sanctam civitatem.\n13 Nam cum in Perside esset dux ipse, et cum ipso immensus exercitus, cecidit in templo Nane\u00e6, consilio deceptus sacerdotum Nane\u00e6.\n14 Etenim cum ea habitaturus venit ad locum Antiochus et amici ejus, et ut acciperet pecunias multas dotis nomine.\n15 Cumque proposuissent eas sacerdotes Nane\u00e6, et ipse cum paucis ingressus esset intra ambitum fani, clauserunt templum,\n16 cum intrasset Antiochus: apertoque occulto aditu templi, mittentes lapides percusserunt ducem et eos qui cum eo erant: et diviserunt membratim, et capitibus amputatis foras projecerunt.\n17 Per omnia benedictus Deus, qui tradidit impios.\n18 Facturi igitur quinta et vigesima die mensis Casleu purificationem templi, necessarium duximus significare vobis: ut et vos quoque agatis diem scenopegi\u00e6, et diem ignis, qui datus est quando Nehemias \u00e6dificato templo et altari obtulit sacrificia.\n19 Nam cum in Persidem ducerentur patres nostri, sacerdotes qui tunc cultores Dei erant, acceptum ignem de altari occulte absconderunt in valle, ubi erat puteus altus et siccus, et in eo contutati sunt eum, ita ut omnibus ignotus esset locus.\n20 Cum autem pr\u00e6terissent anni multi, et placuit Deo ut mitteretur Nehemias a rege Persidis, nepotes sacerdotum illorum qui absconderant, misit ad requirendum ignem: et sicut narraverunt nobis, non invenerunt ignem, sed aquam crassam.\n21 Et jussit eos haurire, et afferre sibi: et sacrificia qu\u00e6 imposita erant, jussit sacerdos Nehemias aspergi ipsa aqua: et ligna, et qu\u00e6 erant superposita.\n22 Utque hoc factum est, et tempus affuit quo sol refulsit, qui prius erat in nubilo, accensus est ignis magnus, ita ut omnes mirarentur.\n23 Orationem autem faciebant omnes sacerdotes, dum consummaretur sacrificium, Jonatha inchoante, ceteris autem respondentibus.\n24 Et Nehemi\u00e6 erat oratio hunc habens modum: Domine Deus omnium creator, terribilis et fortis, justus et misericors, qui solus est bonus rex,\n25 solus pr\u00e6stans, solus justus et omnipotens et \u00e6ternus, qui liberas Isra\u00ebl de omni malo; qui fecisti patres electos, et sanctificasti eos:\n26 accipe sacrificium pro universo populo tuo Isra\u00ebl, et custodi partem tuam, et sanctifica.\n27 Congrega dispersionem nostram, libera eos qui serviunt gentibus, et contemptos et abominatos respice, ut sciant gentes quia tu es Deus noster.\n28 Afflige opprimentes nos, et contumeliam facientes in superbia.\n29 Constitue populum tuum in loco sancto tuo, sicut dixit Moyses.\n30 Sacerdotes autem psallebant hymnos usquequo consumptum esset sacrificium.\n31 Cum autem consumptum esset sacrificium, ex residua aqua Nehemias jussit lapides majores perfundi.\n32 Quod ut factum est, ex eis flamma accensa est: sed ex lumine quod refulsit ab altari, consumpta est.\n33 Ut vero manifestata est res, renuntiatum est regi Persarum quod in loco in quo ignem absconderent hi qui translati fuerant sacerdotes, aqua apparuit, de qua Nehemias, et qui cum eo erant, purificaverunt sacrificia.\n34 Considerans autem rex, et rem diligenter examinans, fecit ei templum, ut probaret quod factum erat:\n35 et cum probasset, sacerdotibus donavit multa bona, et alia atque alia munera: et accipiens manu sua, tribuebat eis.\n36 Appellavit autem Nehemias hunc locum Nephthar, quod interpretatur Purificatio: vocatur autem apud plures Nephi.","title":"Vulgate: 2 Macabees: 2 Macabees Chapter 1","type":"page"}