{"collection":"Bible & Christianity","html_url":"https://unchartedknowledge.5gfusion.net/browse/bib/vul/ma2002.htm","path":"bib/vul/ma2002.htm","source_url":"https://sacred-texts.com/bib/vul/ma2002.htm","text":"1 Invenitur autem in descriptionibus Jeremi\u00e6 prophet\u00e6, quod jussit eos ignem accipere qui transmigrabant, ut significatum est, et ut mandavit transmigratis.\n2 Et dedit illis legem, ne obliviscerentur pr\u00e6cepta Domini, et non exerrarent mentibus, videntes simulacra aurea et argentea, et ornamenta eorum.\n3 Et alia hujusmodi dicens, hortabatur ne legem amoverent a corde suo.\n4 Erat autem in ipsa scriptura, quomodo tabernaculum et arcam jussit propheta divino responso ad se facto comitari secum, usquequo exiit in montem in quo Moyses ascendit, et vidit Dei h\u00e6reditatem.\n5 Et veniens ibi Jeremias, invenit locum spelunc\u00e6: et tabernaculum, et arcam, et altare incensi intulit illuc, et ostium obstruxit.\n6 Et accesserunt quidam simul, qui sequebantur, ut notarent sibi locum: et non potuerunt invenire.\n7 Ut autem cognovit Jeremias, culpans illos dixit: Quod ignotus erit locus donec congreget Deus congregationem populi, et propitius fiat:\n8 et tunc Dominus ostendet h\u00e6c, et apparebit majestas Domini, et nubes erit, sicut et Moysi manifestabatur, et sicut cum Salomon petiit ut locus sanctificaretur magno Deo, manifestabat h\u00e6c.\n9 Magnifice etenim sapientiam tractabat: et ut sapientiam habens, obtulit sacrificium dedicationis et consummationis templi.\n10 Sicut et Moyses orabat ad Dominum, et descendit ignis de c\u00e6lo et consumpsit holocaustum, sic et Salomon oravit, et descendit ignis de c\u00e6lo et consumpsit holocaustum.\n11 Et dixit Moyses: Eo quod non sit comestum quod erat pro peccato, consumptum est.\n12\u00a0Similiter et Salomon octo diebus celebravit dedicationem.\n \n13 Inferebantur autem in descriptionibus et commentariis Nehemi\u00e6 h\u00e6c eadem: et ut construens bibliothecam congregavit de regionibus libros et prophetarum et David, et epistolas regum, et de donariis.\n14 Similiter autem et Judas ea qu\u00e6 deciderant per bellum quod nobis acciderat, congregavit omnia, et sunt apud nos.\n15 Si ergo desideratis h\u00e6c, mittite qui perferant vobis.\n16 Acturi itaque purificationem scripsimus vobis: bene ergo facietis, si egeritis hos dies.\n17 Deus autem, qui liberavit populum suum, et reddidit h\u00e6reditatem omnibus, et regnum, et sacerdotium, et sanctificationem,\n18 sicut promisit in lege, speramus quod cito nostri miserebitur, et congregavit de sub c\u00e6lo in locum sanctum.\n19\u00a0Eripuit enim nos de magnis periculis, et locum purgavit.\n \n20 De Juda vero Machab\u00e6o, et fratribus ejus, et de templi magni purificatione, et de ar\u00e6 dedicatione,\n21 sed et de pr\u00e6liis qu\u00e6 pertinent ad Antiochum Nobilem et filium ejus Eupatorem,\n22 et de illuminationibus qu\u00e6 de c\u00e6lo fact\u00e6 sunt ad eos qui pro Jud\u00e6is fortiter fecerunt, ita ut universam regionem, cum pauci essent, vindicarent, et barbaram multitudinem fugarent,\n23 et famosissimum in toto orbe templum recuperarent, et civitatem liberarent, et leges qu\u00e6 abolit\u00e6 erant, restituerentur, Domino cum omni tranquillitate propitio facto illis.\n24 Itemque ab Jasone Cyren\u00e6o quinque libris comprehensa tentavimus nos uno volumine breviare.\n25 Considerantes enim multitudinem librorum, et difficultatem volentibus aggredi narrationes historiarum propter multitudinem rerum,\n26 curavimus volentibus quidem legere, ut esset animi oblectatio: studiosis vero, ut facilius possint memori\u00e6 commendare: omnibus autem legentibus utilitas conferatur.\n27 Et nobis quidem ipsis, qui hoc opus breviandi causa suscepimus, non facilem laborem, immo vero negotium plenum vigiliarum et sudoris assumpsimus.\n28 Sicut hi qui pr\u00e6parant convivium, et qu\u00e6runt aliorum voluntati parere propter multorum gratiam, libenter laborem sustinemus.\n29 Veritatem quidem de singulis auctoribus concedentes, ipsi autem secundum datam formam brevitati studentes.\n30 Sicut enim nov\u00e6 domus architecto de universa structura curandum est; ei vero qui pingere curat, qu\u00e6 apta sunt ad ornatum exquirenda sunt: ita \u00e6stimandum est et in nobis.\n31 Etenim intellectum colligere, et ordinare sermonem, et curiosius partes singulas quasque disquirere, histori\u00e6 congruit auctori:\n32 brevitatem vero dictionis sectari, et executiones rerum vitare, brevianti concedendum est.\n33 Hinc ergo narrationem incipiemus: de pr\u00e6fatione tantum dixisse sufficiat. Stultum etenim est ante historiam effluere, in ipsa autem historia succingi.","title":"Vulgate: 2 Macabees: 2 Macabees Chapter 2","type":"page"}