{"collection":"Bible & Christianity","html_url":"https://unchartedknowledge.5gfusion.net/browse/bib/vul/ma2013.htm","path":"bib/vul/ma2013.htm","source_url":"https://sacred-texts.com/bib/vul/ma2013.htm","text":"1 Anno centesimo quadragesimo nono, cognovit Judas Antiochum Eupatorem venire cum multitudine adversus Jud\u00e6am,\n2 et cum eo Lysiam procuratorem et pr\u00e6positum negotiorum, secum habentem peditum centum decem millia, et equitum quinque millia, et elephantos viginti duos, currus cum falcibus trecentos.\n3 Commiscuit autem se illis et Menelaus: et cum multa fallacia deprecabatur Antiochum, non pro patri\u00e6 salute, sed sperans se constitui in principatum.\n4 Sed Rex regum suscitavit animos Antiochi in peccatorem: et suggerente Lysia hunc esse causam omnium malorum, jussit (ut eis est consuetudo) apprehensum in eodem loco necari.\n5 Erat autem in eodem loco turris quinquaginta cubitorum, aggestum undique habens cineris: h\u00e6c prospectum habebat in pr\u00e6ceps.\n6 Inde in cinerem dejici jussit sacrilegum, omnibus eum propellentibus ad interitum.\n7 Et tali lege pr\u00e6varicatorem legis contigit mori, nec terr\u00e6 dari Menelaum.\n8\u00a0Et quidem satis juste: nam quia multa erga aram Dei delicta commisit, cujus ignis et cinis erat sanctus: ipse in cineris morte damnatus est.\n \n9 Sed rex mente effrenatus veniebat, nequiorem se patre suo Jud\u00e6is ostensurus.\n10 Quibus Judas cognitis, pr\u00e6cepit populo ut die ac nocte Dominum invocarent, quo, sicut semper, et nunc adjuvaret eos,\n11 quippe qui lege, et patria, sanctoque templo privari vererentur: ac populum, qui nuper paululum respirasset, ne sineret blasphemis rursus nationibus subdi.\n12 Omnibus itaque simul id facientibus, et petentibus a Domino misericordiam cum fletu et jejuniis, per triduum continuum prostratis, hortatus est eos Judas ut se pr\u00e6pararent.\n13 Ipse vero cum senioribus cogitavit priusquam rex admoveret exercitum ad Jud\u00e6am et obtineret civitatem, exire, et Domini judicio committere exitum rei.\n14 Dans itaque potestatem omnium Deo mundi creatori, et exhortatus suos ut fortiter dimicarent, et usque ad mortem pro legibus, templo, civitate, patria, et civibus starent, circa Modin exercitum constituit.\n15 Et dato signo suis Dei victori\u00e6, juvenibus fortissimis electis nocte aggressus aulam regiam, in castris interfecit viros quatuor millia, et maximum elephantorum cum his qui superpositi fuerant:\n16 summoque metu ac perturbatione hostium castra replentes, rebus prospere gestis, abierunt.\n17 Hoc autem factum est die illucescente, adjuvante eum Domini protectione.\n18 Sed rex, accepto gustu audaci\u00e6 Jud\u00e6orum, arte difficultatem locorum tentabat:\n19 et Bethsur\u00e6, qu\u00e6 erat Jud\u00e6orum pr\u00e6sidium munitum, castra admovebat: sed fugabatur, impingebat, minorabatur.\n20 His autem qui intus erant, Judas necessaria mittebat.\n21 Enuntiavit autem mysteria hostibus Rhodocus quidam de judaico exercitu, qui requisitus comprehensus est, et conclusus.\n22 Iterum rex sermonem habuit ad eos qui erant in Bethsuris: dextram dedit, accepit, abiit:\n23\u00a0commisit cum Juda, superatus est.\n Ut autem cognovit rebellasse Philippum Antiochi\u00e6, qui relictus erat super negotia, mente consternatus, Jud\u00e6os deprecans, subditusque eis, jurat de omnibus quibus justum visum est: et reconciliatus obtulit sacrificium, honoravit templum, et munera posuit.\n24 Machab\u00e6um amplexatus est, et fecit eum a Ptolemaide usque ad Gerrenos ducem et principem.\n25 Ut autem venit Ptolemaidam, graviter ferebant Ptolemenses amiciti\u00e6 conventionem, indignantes ne forte f\u0153dus irrumperent.\n26 Tunc ascendit Lysias tribunal, et exposuit rationem, et populum sedavit, regressusque est Antiochiam: et hoc modo regis profectio et reditus processit.","title":"Vulgate: 2 Macabees: 2 Macabees Chapter 13","type":"page"}