{"collection":"Bible & Christianity","html_url":"https://unchartedknowledge.5gfusion.net/browse/bib/vul/mar001.htm","path":"bib/vul/mar001.htm","source_url":"https://sacred-texts.com/bib/vul/mar001.htm","text":"1 Initium Evangelii Jesu Christi, Filii Dei.\n2\u00a0Sicut scriptum est in Isaia propheta: [Ecce ego mitto angelum meum ante faciem tuam,\n qui pr\u00e6parabit viam tuam ante te.\n3\u00a0Vox clamantis in deserto:\n Parate viam Domini, rectas facite semitas ejus.]\n4 Fuit Joannes in deserto baptizans, et pr\u00e6dicans baptismum p\u0153nitenti\u00e6 in remissionem peccatorum.\n5 Et egrediebatur ad eum omnis Jud\u00e6\u00e6 regio, et Jerosolymit\u00e6 universi, et baptizabantur ab illo in Jordanis flumine, confitentes peccata sua.\n6 Et erat Joannes vestitus pilis cameli, et zona pellicea circa lumbos ejus, et locustas et mel silvestre edebat.\n7 Et pr\u00e6dicabat dicens: Venit fortior post me, cujus non sum dignus procumbens solvere corrigiam calceamentorum ejus.\n8\u00a0Ego baptizavi vos aqua, ille vero baptizabit vos Spiritu Sancto.\n \n9 Et factum est: in diebus illis venit Jesus a Nazareth Galil\u00e6\u00e6: et baptizatus est a Joanne in Jordane.\n10 Et statim ascendens de aqua, vidit c\u00e6los apertos, et Spiritum tamquam columbam descendentem, et manentem in ipso.\n11\u00a0Et vox facta est de c\u00e6lis: Tu es Filius meus dilectus, in te complacui.\n \n12 Et statim Spiritus expulit eum in desertum.\n13\u00a0Et erat in deserto quadraginta diebus, et quadraginta noctibus: et tentabatur a Satana: eratque cum bestiis, et angeli ministrabant illi.\n \n14 Postquam autem traditus est Joannes, venit Jesus in Galil\u00e6am, pr\u00e6dicans Evangelium regni Dei,\n15 et dicens: Quoniam impletum est tempus, et appropinquavit regnum Dei: p\u0153nitemini, et credite Evangelio.\n16 Et pr\u00e6teriens secus mare Galil\u00e6\u00e6, vidit Simonem, et Andream fratrem ejus, mittentes retia in mare (erant enim piscatores),\n17 et dixit eis Jesus: Venite post me, et faciam vos fieri piscatores hominum.\n18 Et protinus relictis retibus, secuti sunt eum.\n19 Et progressus inde pusillum, vidit Jacobum Zebed\u00e6i, et Joannem fratrem ejus, et ipsos componentes retia in navi:\n20\u00a0et statim vocavit illos. Et relicto patre suo Zebed\u00e6o in navi cum mercenariis, secuti sunt eum.\n \n21 Et ingrediuntur Capharnaum: et statim sabbatis ingressus in synagogam, docebat eos.\n22 Et stupebant super doctrina ejus: erat enim docens eos quasi potestatem habens, et non sicut scrib\u00e6.\n23 Et erat in synagoga eorum homo in spiritu immundo: et exclamavit,\n24 dicens: Quid nobis et tibi, Jesu Nazarene? venisti perdere nos? scio qui sis, Sanctus Dei.\n25 Et comminatus est ei Jesus, dicens: Obmutesce, et exi de homine.\n26 Et discerpens eum spiritus immundus, et exclamans voce magna, exiit ab eo.\n27 Et mirati sunt omnes, ita ut conquirerent inter se dicentes: Quidnam est hoc? qu\u00e6nam doctrina h\u00e6c nova? quia in potestate etiam spiritibus immundis imperat, et obediunt ei.\n28\u00a0Et processit rumor ejus statim in omnem regionem Galil\u00e6\u00e6.\n \n29 Et protinus egredientes de synagoga, venerunt in domum Simonis et Andre\u00e6, cum Jacobo et Joanne.\n30 Decumbebat autem socrus Simonis febricitans: et statim dicunt ei de illa.\n31\u00a0Et accedens elevavit eam, apprehensa manu ejus: et continuo dimisit eam febris, et ministrabat eis.\n \n32 Vespere autem facto cum occidisset sol, afferebant ad eum omnes male habentes, et d\u00e6monia habentes:\n33 et erat omnis civitas congregata ad januam.\n34\u00a0Et curavit multos, qui vexabantur variis languoribus, et d\u00e6monia multa ejiciebat, et non sinebat ea loqui, quoniam sciebant eum.\n \n35 Et diluculo valde surgens, egressus abiit in desertum locum, ibique orabat.\n36 Et prosecutus est eum Simon, et qui cum illo erant.\n37 Et cum invenissent eum, dixerunt ei: Quia omnes qu\u00e6runt te.\n38 Et ait illis: Eamus in proximos vicos, et civitates, ut et ibi pr\u00e6dicem: ad hoc enim veni.\n39\u00a0Et erat pr\u00e6dicans in synagogis eorum, et in omni Galil\u00e6a, et d\u00e6monia ejiciens.\n \n40 Et venit ad eum leprosus deprecans eum: et genu flexo dixit ei: Si vis, potes me mundare.\n41 Jesus autem misertus ejus, extendit manum suam: et tangens eum, ait illi: Volo: mundare.\n42 Et cum dixisset, statim discessit ab eo lepra, et mundatus est.\n43 Et comminatus est ei, statimque ejecit illum,\n44 et dicit ei: Vide nemini dixeris: sed vade, ostende te principi sacerdotum, et offer pro emundatione tua, qu\u00e6 pr\u00e6cepit Moyses in testimonium illis.\n45 At ille egressus c\u0153pit pr\u00e6dicare, et diffamare sermonem, ita ut jam non posset manifeste introire in civitatem, sed foris in desertis locis esset, et conveniebant ad eum undique.","title":"Vulgate: Mark: Mark Chapter 1","type":"page"}