{"collection":"Bible & Christianity","html_url":"https://unchartedknowledge.5gfusion.net/browse/bib/vul/mar003.htm","path":"bib/vul/mar003.htm","source_url":"https://sacred-texts.com/bib/vul/mar003.htm","text":"1 Et introivit iterum in synagogam: et erat ibi homo habens manum aridam.\n2 Et observabant eum, si sabbatis curaret, ut accusarent illum.\n3 Et ait homini habenti manum aridam: Surge in medium.\n4 Et dicit eis: Licet sabbatis benefacere, an male? animam salvam facere, an perdere? At illi tacebant.\n5 Et circumspiciens eos cum ira, contristatus super c\u00e6citate cordis eorum, dicit homini: Extende manum tuam. Et extendit, et restituta est manus illi.\n6\u00a0Exeuntes autem pharis\u00e6i, statim cum Herodianis consilium faciebant adversus eum quomodo eum perderent.\n \n7 Jesus autem cum discipulis suis secessit ad mare: et multa turba a Galil\u00e6a et Jud\u00e6a secuta est eum,\n8 et ab Jerosolymis, et ab Idum\u00e6a, et trans Jordanem: et qui circa Tyrum et Sidonem multitudo magna, audientes qu\u00e6 faciebat, venerunt ad eum.\n9 Et dicit discipulis suis ut navicula sibi deserviret propter turbam, ne comprimerent eum:\n10 multos enim sanabat, ita ut irruerent in eum ut illum tangerent, quotquot habebant plagas.\n11 Et spiritus immundi, cum illum videbant, procidebant ei: et clamabant, dicentes:\n12\u00a0Tu es Filius Dei. Et vehementer comminabatur eis ne manifestarent illum.\n \n13 Et ascendens in montem vocavit ad se quos voluit ipse: et venerunt ad eum.\n14 Et fecit ut essent duodecim cum illo: et ut mitteret eos pr\u00e6dicare.\n15 Et dedit illis potestatem curandi infirmitates et ejiciendi d\u00e6monia.\n16 Et imposuit Simoni nomen Petrus:\n17 et Jacobum Zebed\u00e6i, et Joannem fratrem Jacobi, et imposuit eis nomina Boanerges, quod est, Filii tonitrui:\n18 et Andr\u00e6am, et Philippum, et Bartholom\u00e6um, et Matth\u00e6um, et Thomam, et Jacobum Alph\u00e6i, et Thadd\u00e6um, et Simonem Canan\u00e6um,\n19\u00a0et Judam Iscariotem, qui et tradidit illum.\n \n20 Et veniunt ad domum: et convenit iterum turba, ita ut non possent neque panem manducare.\n21 Et cum audissent sui, exierunt tenere eum: dicebant enim: Quoniam in furorem versus est.\n22\u00a0Et scrib\u00e6, qui ab Jerosolymis descenderant, dicebant: Quoniam Beelzebub habet, et quia in principe d\u00e6moniorum ejicit d\u00e6monia.\n \n23 Et convocatis eis in parabolis dicebat illis: Quomodo potest Satanas Satanam ejicere?\n24 Et si regnum in se dividatur, non potest regnum illud stare.\n25 Et si domus super semetipsam dispertiatur, non potest domus illa stare.\n26 Et si Satanas consurrexerit in semetipsum, dispertitus est, et non poterit stare, sed finem habet.\n27 Nemo potest vasa fortis ingressus in domum diripere, nisi prius fortem alliget, et tunc domum ejus diripiet.\n28 Amen dico vobis, quoniam omnia dimittentur filiis hominum peccata, et blasphemi\u00e6 quibus blasphemaverint:\n29 qui autem blasphemaverit in Spiritum Sanctum, non habebit remissionem in \u00e6ternum, sed reus erit \u00e6terni delicti.\n30\u00a0Quoniam dicebant: Spiritum immundum habet.\n \n31 Et veniunt mater ejus et fratres: et foris stantes miserunt ad eum vocantes eum,\n32 et sedebat circa eum turba: et dicunt ei: Ecce mater tua et fratres tui foris qu\u00e6runt te.\n33 Et respondens eis, ait: Qu\u00e6 est mater mea et fratres mei?\n34 Et circumspiciens eos, qui in circuitu ejus sedebant, ait: Ecce mater mea et fratres mei.\n35 Qui enim fecerit voluntatem Dei, hic frater meus, et soror mea, et mater est.","title":"Vulgate: Mark: Mark Chapter 3","type":"page"}