{"collection":"Bible & Christianity","html_url":"https://unchartedknowledge.5gfusion.net/browse/bib/vul/mar004.htm","path":"bib/vul/mar004.htm","source_url":"https://sacred-texts.com/bib/vul/mar004.htm","text":"1 Et iterum c\u0153pit docere ad mare: et congregata est ad eum turba multa, ita ut navim ascendens sederet in mari, et omnis turba circa mare super terram erat:\n2 et docebat eos in parabolis multa, et dicebat illis in doctrina sua:\n3 Audite: ecce exiit seminans ad seminandum.\n4 Et dum seminat, aliud cecidit circa viam, et venerunt volucres c\u00e6li, et comederunt illud.\n5 Aliud vero cecidit super petrosa, ubi non habuit terram multam: et statim exortum est, quoniam non habebat altitudinem terr\u00e6:\n6 et quando exortus est sol, ex\u00e6stuavit: et eo quod non habebat radicem, exaruit.\n7 Et aliud cecidit in spinas: et ascenderunt spin\u00e6, et suffocaverunt illud, et fructum non dedit.\n8 Et aliud cecidit in terram bonam: et dabat fructum ascendentem et crescentem, et afferebat unum triginta, unum sexaginta, et unum centum.\n9 Et dicebat: Qui habet aures audiendi, audiat.\n10 Et cum esset singularis, interrogaverunt eum hi qui cum eo erant duodecim, parabolam.\n11 Et dicebat eis: Vobis datum est nosse mysterium regni Dei: illis autem, qui foris sunt, in parabolis omnia fiunt:\n12\u00a0ut videntes videant, et non videant: et audientes audiant, et non intelligant: nequando convertantur, et dimittantur eis peccata.\n \n13 Et ait illis: Nescitis parabolam hanc? Et quomodo omnes parabolas cognoscetis?\n14 Qui seminat, verbum seminat.\n15 Hi autem sunt, qui circa viam, ubi seminatur verbum, et cum audierint, confestim venit Satanas, et aufert verbum, quod seminatum est in cordibus eorum.\n16 Et hi sunt similiter, qui super petrosa seminantur: qui cum audierint verbum, statim cum gaudio accipiunt illud:\n17 et non habent radicem in se, sed temporales sunt: deinde orta tribulatione et persecutione propter verbum, confestim scandalizantur.\n18 Et alii sunt qui in spinas seminantur: hi sunt qui verbum audiunt,\n19 et \u00e6rumn\u00e6 s\u00e6culi, et deceptio divitiarum, et circa reliqua concupiscenti\u00e6 intro\u00ebuntes suffocant verbum, et sine fructu efficitur.\n20\u00a0Et hi sunt qui super terram bonam seminati sunt, qui audiunt verbum, et suscipiunt, et fructificant, unum triginta, unum sexaginta, et unum centum.\n \n21 Et dicebat illis: Numquid venit lucerna ut sub modo ponatur, aut sub lecto? nonne ut super candelabrum ponatur?\n22 Non est enim aliquid absconditum, quod non manifestetur: nec factum est occultum, sed ut in palam veniat.\n23 Si quis habet aures audiendi, audiat.\n24 Et dicebat illis: Videte quid audiatis. In qua mensura mensi fueritis, remetietur vobis, et adjicietur vobis.\n25\u00a0Qui enim habet, dabitur illi: et qui non habet, etiam quod habet auferetur ab eo.\n \n26 Et dicebat: Sic est regnum Dei, quemadmodum si homo jaciat sementem in terram,\n27 et dormiat, et exsurgat nocte et die, et semen germinet, et increscat dum nescit ille.\n28 Ultro enim terra fructificat, primum herbam, deinde spicam, deinde plenum frumentum in spica.\n29 Et cum produxerit fructus, statim mittit falcem, quoniam adsit messis.\n30 Et dicebat: Cui assimilabimus regnum Dei? aut cui parabol\u00e6 comparabimus illud?\n31 Sicut granum sinapis, quod cum seminatum fuerit in terra, minus est omnibus seminibus, qu\u00e6 sunt in terra:\n32 et cum seminatum fuerit, ascendit, et fit majus omnibus oleribus, et facit ramos magnos, ita ut possint sub umbra ejus aves c\u00e6li habitare.\n33 Et talibus multis parabolis loquebatur eis verbum, prout poterant audire:\n34\u00a0sine parabola autem non loquebatur eis: seorsum autem discipulis suis disserebat omnia.\n \n35 Et ait illis in illa die, cum sero esset factum: Transeamus contra.\n36 Et dimittentes turbam, assumunt eum ita ut erat in navi: et ali\u00e6 naves erant cum illo.\n37 Et facta est procella magna venti, et fluctus mittebat in navim, ita ut impleretur navis.\n38 Et erat ipse in puppi super cervical dormiens: et excitant eum, et dicunt illi: Magister, non ad te pertinet, quia perimus?\n39 Et exsurgens comminatus est vento, et dixit mari: Tace, obmutesce. Et cessavit ventus: et facta est tranquillitas magna.\n40 Et ait illis: Quid timidi estis? necdum habetis fidem? et timuerunt timore magno, et dicebant ad alterutrum: Quis, putas, est iste, quia et ventus et mare obediunt ei?","title":"Vulgate: Mark: Mark Chapter 4","type":"page"}