{"collection":"Bible & Christianity","html_url":"https://unchartedknowledge.5gfusion.net/browse/bib/vul/mat001.htm","path":"bib/vul/mat001.htm","source_url":"https://sacred-texts.com/bib/vul/mat001.htm","text":"1 Liber generationis Jesu Christi filii David, filii Abraham.\n2 Abraham genuit Isaac. Isaac autem genuit Jacob. Jacob autem genuit Judam, et fratres ejus.\n3 Judas autem genuit Phares, et Zaram de Thamar. Phares autem genuit Esron. Esron autem genuit Aram.\n4 Aram autem genuit Aminadab. Aminadab autem genuit Naasson. Naasson autem genuit Salmon.\n5 Salmon autem genuit Booz de Rahab. Booz autem genuit Obed ex Ruth. Obed autem genuit Jesse. Jesse autem genuit David regem.\n6 David autem rex genuit Salomonem ex ea qu\u00e6 fuit Uri\u00e6.\n7 Salomon autem genuit Roboam. Roboam autem genuit Abiam. Abias autem genuit Asa.\n8 Asa autem genuit Josophat. Josophat autem genuit Joram. Joram autem genuit Oziam.\n9 Ozias autem genuit Joatham. Joatham autem genuit Achaz. Achaz autem genuit Ezechiam.\n10 Ezechias autem genuit Manassen. Manasses autem genuit Amon. Amon autem genuit Josiam.\n11 Josias autem genuit Jechoniam, et fratres ejus in transmigratione Babylonis.\n12 Et post transmigrationem Babylonis: Jechonias genuit Salathiel. Salathiel autem genuit Zorobabel.\n13 Zorobabel autem genuit Abiud. Abiud autem genuit Eliacim. Eliacim autem genuit Azor.\n14 Azor autem genuit Sadoc. Sadoc autem genuit Achim. Achim autem genuit Eliud.\n15 Eliud autem genuit Eleazar. Eleazar autem genuit Mathan. Mathan autem genuit Jacob.\n16 Jacob autem genuit Joseph virum Mari\u00e6, de qua natus est Jesus, qui vocatur Christus.\n17\u00a0Omnes itaque generationes ab Abraham usque ad David, generationes quatuordecim: et a David usque ad transmigrationem Babylonis, generationes quatuordecim: et a transmigratione Babylonis usque ad Christum, generationes quatuordecim.\n \n18 Christi autem generatio sic erat: cum esset desponsata mater ejus Maria Joseph, antequam convenirent inventa est in utero habens de Spiritu Sancto.\n19 Joseph autem vir ejus cum esset justus, et nollet eam traducere, voluit occulte dimittere eam.\n20 H\u00e6c autem eo cogitante, ecce angelus Domini apparuit in somnis ei, dicens: Joseph, fili David, noli timere accipere Mariam conjugem tuam: quod enim in ea natum est, de Spiritu Sancto est.\n21 Pariet autem filium: et vocabis nomen ejus Jesum: ipse enim salvum faciet populum suum a peccatis eorum.\n22 Hoc autem totum factum est, ut adimpleretur quod dictum est a Domino per prophetam dicentem:\n23 Ecce virgo in utero habebit, et pariet filium: et vocabunt nomen ejus Emmanuel, quod est interpretatum Nobiscum Deus.\n24 Exsurgens autem Joseph a somno, fecit sicut pr\u00e6cepit ei angelus Domini, et accepit conjugem suam.\n25 Et non cognoscebat eam donec peperit filium suum primogenitum: et vocavit nomen ejus Jesum.","title":"Vulgate: Matthew: Matthew Chapter 1","type":"page"}