{"collection":"Bible & Christianity","html_url":"https://unchartedknowledge.5gfusion.net/browse/bib/vul/mat009.htm","path":"bib/vul/mat009.htm","source_url":"https://sacred-texts.com/bib/vul/mat009.htm","text":"1 Et ascendens in naviculam, transfretavit, et venit in civitatem suam.\n2 Et ecce offerebant ei paralyticum jacentem in lecto. Et videns Jesus fidem illorum, dixit paralytico: Confide fili, remittuntur tibi peccata tua.\n3 Et ecce quidam de scribis dixerunt intra se: Hic blasphemat.\n4 Et cum vidisset Jesus cogitationes eorum, dixit: Ut quid cogitatis mala in cordibus vestris?\n5 Quid est facilius dicere: Dimittuntur tibi peccata tua: an dicere: Surge, et ambula?\n6 Ut autem sciatis, quia Filius hominis habet potestatem in terra dimittendi peccata, tunc ait paralytico: Surge, tolle lectum tuum, et vade in domum tuam.\n7 Et surrexit, et abiit in domum suam.\n8\u00a0Videntes autem turb\u00e6 timuerunt, et glorificaverunt Deum, qui dedit potestatem talem hominibus.\n \n9 Et, cum transiret inde Jesus, vidit hominem sedentem in telonio, Matth\u00e6um nomine. Et ait illi: Sequere me. Et surgens, secutus est eum.\n10 Et factum est, discumbente eo in domo, ecce multi publicani et peccatores venientes, discumbebant cum Jesu, et discipulis ejus.\n11 Et videntes pharis\u00e6i, dicebant discipulis ejus: Quare cum publicanis et peccatoribus manducat magister vester?\n12 At Jesus audiens, ait: Non est opus valentibus medicus, sed male habentibus.\n13 Euntes autem discite quid est: Misericordiam volo, et non sacrificium. Non enim veni vocare justos, sed peccatores.\n14 Tunc accesserunt ad eum discipuli Joannis, dicentes: Quare nos, et pharis\u00e6i, jejunamus frequenter: discipuli autem tui non jejunant?\n15 Et ait illis Jesus: Numquid possunt filii sponsi lugere, quamdiu cum illis est sponsus? Venient autem dies cum auferetur ab eis sponsus: et tunc jejunabunt.\n16 Nemo autem immittit commissuram panni rudis in vestimentum vetus: tollit enim plenitudinem ejus a vestimento, et pejor scissura fit.\n17\u00a0Neque mittunt vinum novum in utres veteres: alioquin rumpuntur utres, et vinum effunditur, et utres pereunt. Sed vinum novum in utres novos mittunt: et ambo conservantur.\n \n18 H\u00e6c illo loquente ad eos, ecce princeps unus accessit, et adorabat eum, dicens: Domine, filia mea modo defuncta est: sed veni, impone manum tuam super eam, et vivet.\n19 Et surgens Jesus, sequebatur eum, et discipuli ejus.\n20 Et ecce mulier, qu\u00e6 sanguinis fluxum patiebatur duodecim annis, accessit retro, et tetigit fimbriam vestimenti ejus.\n21 Dicebat enim intra se: Si tetigero tantum vestimentum ejus, salva ero.\n22\u00a0At Jesus conversus, et videns eam, dixit: Confide, filia, fides tua te salvam fecit. Et salva facta est mulier ex illa hora.\n \n23 Et cum venisset Jesus in domum principis, et vidisset tibicines et turbam tumultuantem, dicebat:\n24 Recedite: non est enim mortua puella, sed dormit. Et deridebant eum.\n25 Et cum ejecta esset turba, intravit: et tenuit manum ejus, et surrexit puella.\n26\u00a0Et exiit fama h\u00e6c in universam terram illam.\n \n27 Et transeunte inde Jesu, secuti sunt eum duo c\u00e6ci, clamantes, et dicentes: Miserere nostri, fili David.\n28 Cum autem venisset domum, accesserunt ad eum c\u00e6ci. Et dicit eis Jesus: Creditis quia hoc possum facere vobis? Dicunt ei: Utique, Domine.\n29 Tunc tetigit oculos eorum, dicens: Secundum fidem vestram, fiat vobis.\n30 Et aperti sunt oculi eorum: et comminatus est illis Jesus, dicens: Videte ne quis sciat.\n31\u00a0Illi autem exeuntes, diffamaverunt eum in tota terra illa.\n \n32 Egressis autem illis, ecce obtulerunt ei hominem mutum, d\u00e6monium habentem.\n33 Et ejecto d\u00e6monio, locutus est mutus, et mirat\u00e6 sunt turb\u00e6, dicentes: Numquam apparuit sic in Isra\u00ebl.\n34\u00a0Pharis\u00e6i autem dicebant: In principe d\u00e6moniorum ejicit d\u00e6mones.\n \n35 Et circuibat Jesus omnes civitates, et castella, docens in synagogis eorum, et pr\u00e6dicans Evangelium regni, et curans omnem languorem, et omnem infirmitatem.\n36 Videns autem turbas, misertus est eis: quia erant vexati, et jacentes sicut oves non habentes pastorem.\n37 Tunc dicit discipulis suis: Messis quidem multa, operarii autem pauci.\n38 Rogate ergo Dominum messis, ut mittat operarios in messem suam.","title":"Vulgate: Matthew: Matthew Chapter 9","type":"page"}