{"collection":"Bible & Christianity","html_url":"https://unchartedknowledge.5gfusion.net/browse/bib/vul/mic002.htm","path":"bib/vul/mic002.htm","source_url":"https://sacred-texts.com/bib/vul/mic002.htm","text":"1\u00a0[V\u00e6 qui cogitatis inutile,\n et operamini malum in cubilibus vestris!\n In luce matutina faciunt illud,\n quoniam contra Deum est manus eorum.\n2\u00a0Et concupierunt agros, et violenter tulerunt:\n et rapuerunt domos,\n et calumniabantur virum, et domum ejus:\n virum, et h\u00e6reditatem ejus.\n3\u00a0Idcirco h\u00e6c dicit Dominus:\n Ecce ego cogito super familiam istam malum,\n unde non auferetis colla vestra,\n et non ambulabitis superbi:\n quoniam tempus pessimum est.\n4\u00a0In die illa sumetur super vos parabola,\n et cantabitur canticum cum suavitate, dicentium:\n Depopulatione vastati sumus;\n pars populi mei commutata est:\n quomodo recedet a me, cum revertatur,\n qui regiones nostras dividat?\n5\u00a0Propter hoc non erit tibi mittens funiculum sortis in c\u0153tu Domini.\n6\u00a0Ne loquamini loquentes;\n non stillabit super istos, non comprehendet confusio.\n7\u00a0Dicit domus Jacob:\n Numquid abbreviatus est spiritus Domini,\n aut tales sunt cogitationes ejus?\n nonne verba mea bona sunt cum eo qui recte graditur?\n8\u00a0et e contrario populus meus in adversarium consurrexit.\n Desuper tunica pallium sustulistis:\n et eos qui transibant simpliciter convertistis in bellum.\n9\u00a0Mulieres populi mei ejecistis de domo deliciarum suarum;\n a parvulis earum tulistis laudem meam in perpetuum.\n10\u00a0Surgite, et ite, quia non habetis hic requiem:\n propter immunditiam ejus corrumpetur putredine pessima.\n11\u00a0Utinam non essem vir habens spiritum,\n et mendacium potius loquerer!\n Stillabo tibi in vinum et in ebrietatem;\n et erit super quem stillatur populus iste.\n12\u00a0Congregatione congregabo, Jacob, totum te;\n in unum conducam reliquias Isra\u00ebl:\n pariter ponam illum quasi gregem in ovili,\n quasi pecus in medio caularum:\n tumultuabuntur a multitudine hominum.\n13\u00a0Ascendet enim pandens iter ante eos:\n divident, et transibunt portam,\n et ingredientur per eam:\n et transibit rex eorum coram eis,\n et Dominus in capite eorum.]","title":"Vulgate: Micah: Micah Chapter 2","type":"page"}