{"collection":"Bible & Christianity","html_url":"https://unchartedknowledge.5gfusion.net/browse/bib/vul/mic003.htm","path":"bib/vul/mic003.htm","source_url":"https://sacred-texts.com/bib/vul/mic003.htm","text":"1\u00a0[Et dixi: Audite, princeps Jacob,\n et duces domus Isra\u00ebl:\n numquid non vestrum est scire judicium,\n2\u00a0qui odio habetis bonum, et diligitis malum;\n qui violenter tollitis pelles eorum desuper eis,\n et carnem eorum desuper ossibus eorum;\n3\u00a0qui comederunt carnem populi mei,\n et pellem eorum desuper excoriaverunt,\n et ossa eorum confregerunt,\n et conciderunt sicut in lebete,\n et quasi carnem in medio oll\u00e6?\n4\u00a0Tunc clamabunt ad Dominum, et non exaudiet eos,\n et abscondet faciem suam ab eis in tempore illo,\n sicut nequiter egerunt in adinventionibus suis.\n5\u00a0H\u00e6c dicit Dominus super prophetas,\n qui seducunt populum meum:\n qui mordent dentibus suis,\n et pr\u00e6dicant pacem;\n et si quis non dederit in ore eorum quippiam,\n sanctificant super eum pr\u00e6lium.\n6\u00a0Propterea nox vobis pro visione erit,\n et tenebr\u00e6 vobis pro divinatione;\n et occumbet sol super prophetas,\n et obtenebrabitur super eos dies.\n7\u00a0Et confundentur qui vident visiones,\n et confundentur divini;\n et operient omnes vultos suos,\n quia non est responsum Dei.\n8\u00a0Verumtamen ego repletus sum fortitudine spiritus Domini,\n judicio, et virtute,\n ut annuntiem Jacob scelus suum,\n et Isra\u00ebl peccatum suum.\n9\u00a0Audite hoc, principes domus Jacob,\n et judices domus Isra\u00ebl,\n qui abominamini judicium,\n et omnia recta pervertitis:\n10\u00a0qui \u00e6dificatis Sion in sanguinibus,\n et Jerusalem in iniquitate.\n11\u00a0Principes ejus in muneribus judicabant,\n et sacerdotes ejus in mercede docebant,\n et prophet\u00e6 ejus in pecunia divinabant:\n et super Dominum requiescebant, dicentes:\n Numquid non Dominus in medio nostrum?\n non venient super nos mala.\n12\u00a0Propter hoc, causa vestri, Sion quasi ager arabitur,\n et Jerusalem quasi acervus lapidum erit,\n et mons templi in excelsa silvarum.]","title":"Vulgate: Micah: Micah Chapter 3","type":"page"}