{"collection":"Bible & Christianity","html_url":"https://unchartedknowledge.5gfusion.net/browse/bib/vul/mic004.htm","path":"bib/vul/mic004.htm","source_url":"https://sacred-texts.com/bib/vul/mic004.htm","text":"1\u00a0[Et erit: in novissimo dierum\n erit mons domus Domini pr\u00e6paratus in vertice montium,\n et sublimis super colles:\n et fluent ad eum populi,\n2\u00a0et properabunt gentes mult\u00e6, et dicent:\n Venite, ascendamus ad montem Domini,\n et ad domum Dei Jacob:\n et docebit nos de viis suis,\n et ibimus in semitis ejus,\n quia de Sion egredietur lex,\n et verbum Domini de Jerusalem.\n3\u00a0Et judicabit inter populos multos,\n et corripiet gentes fortes usque in longinquum:\n et concident gladios suos in vomeres,\n et hastas suas in ligones:\n non sumet gens adversus gentem gladium,\n et non discent ultra belligerare.\n4\u00a0Et sedebit vir subtus vitem suam et subtus ficum suam,\n et non erit qui deterreat,\n quia os Domini exercituum locutum est.\n5\u00a0Quia omnes populi ambulabunt\n unusquisque in nomine dei sui;\n nos autem ambulabimus\n in nomine Domini Dei nostri,\n in \u00e6ternum et ultra.]\n \n6\u00a0[In die illa, dicit Dominus,\n congregabo claudicantem,\n et eam quam ejeceram colligam,\n et quam afflixeram:\n7\u00a0et ponam claudicantem in reliquias,\n et eam qu\u00e6 laboraverat, in gentem robustam:\n et regnabit Dominus super eos in monte Sion,\n ex hoc nunc et usque in \u00e6ternum.\n8\u00a0Et tu, turris gregis nebulosa fili\u00e6 Sion,\n usque ad te veniet,\n et veniet potestas prima,\n regnum fili\u00e6 Jerusalem.\n9\u00a0Nunc quare m\u0153rore contraheris?\n numquid rex non est tibi,\n aut consiliarius tuus periit,\n quia comprehendit te dolor sicut parturientem?\n10\u00a0Dole et satage, filia Sion, quasi parturiens,\n quia nunc egredieris de civitate,\n et habitabis in regione,\n et venies usque ad Babylonem:\n ibi liberaberis,\n ibi redimet te Dominus de manu inimicorum tuorum.\n11\u00a0Et nunc congregat\u00e6 sunt super te gentes mult\u00e6, qu\u00e6 dicunt:\n Lapidetur, et aspiciat in Sion oculus noster.\n12\u00a0Ipsi autem non cognoverunt cogitationes Domini,\n et non intellexerunt consilium ejus,\n quia congregavit eos quasi f\u0153num are\u00e6.\n13\u00a0Surge, et tritura, filia Sion,\n quia cornu tuum ponam ferreum,\n et ungulas tuas ponam \u00e6reas;\n et comminues populos multos,\n et interficies Domino rapinas eorum,\n et fortitudinem eorum Domino univers\u00e6 terr\u00e6.]","title":"Vulgate: Micah: Micah Chapter 4","type":"page"}