{"collection":"Bible & Christianity","html_url":"https://unchartedknowledge.5gfusion.net/browse/bib/vul/mic005.htm","path":"bib/vul/mic005.htm","source_url":"https://sacred-texts.com/bib/vul/mic005.htm","text":"1\u00a0[Nunc vastaberis, filia latronis.\n Obsidionem posuerunt super nos:\n in virga percutient maxillam judicis Isra\u00ebl.]\n \n2\u00a0[Et tu, Bethlehem Ephrata,\n parvulus es in millibus Juda;\n ex te mihi egredietur qui sit dominator in Isra\u00ebl,\n et egressus ejus ab initio,\n a diebus \u00e6ternitatis.\n3\u00a0Propter hoc dabit eos usque ad tempus in quo parturiens pariet,\n et reliqui\u00e6 fratrum ejus convertentur ad filios Isra\u00ebl.\n4\u00a0Et stabit, et pascet in fortitudine Domini,\n in sublimitate nominis Domini Dei sui:\n et convertentur,\n quia nunc magnificabitur usque ad terminos terr\u00e6.\n5\u00a0Et erit iste pax:\n cum venerit Assyrius in terram nostram,\n et quando calcaverit domibus nostris,\n et suscitabimus super eum septem pastores\n et octo primates homines;\n6\u00a0et pascent terram Assur in gladio,\n et terram Nemrod in lanceis ejus,\n et liberabit ab Assur cum venerit in terram nostram,\n et cum calcaverit in finibus nostris.\n7\u00a0Et erunt reliqui\u00e6 Jacob in medio populorum multorum\n quasi ros a Domino,\n et quasi still\u00e6 super herbam,\n qu\u00e6 non exspectat virum,\n et non pr\u00e6stolatur filios hominum.\n8\u00a0Et erunt reliqui\u00e6 Jacob in gentibus,\n in medio populorum multorum,\n quasi leo in jumentis silvarum,\n et quasi catulus leonis in gregibus pecorum,\n qui cum transierit, et conculcaverit, et ceperit,\n non est qui eruat.\n9\u00a0Exaltabitur manus tua super hostes tuos,\n et omnes inimici tui interibunt.\n10\u00a0Et erit in die illa, dicit Dominus:\n auferam equos tuos de medio tui,\n et disperdam quadrigas tuas.\n11\u00a0Et perdam civitates terr\u00e6 tu\u00e6,\n et destruam omnes munitiones tuas:\n et auferam maleficia de manu tua,\n et divinationes non erunt in te:\n12\u00a0et perire faciam sculptilia tua et statuas tuas de medio tui,\n et non adorabis ultra opera manuum tuarum:\n13\u00a0et evellam lucos tuos de medio tui,\n et conteram civitates tuas.\n14\u00a0Et faciam, in furore et in indignatione, ultionem\n in omnibus gentibus qu\u00e6 non audierunt.]","title":"Vulgate: Micah: Micah Chapter 5","type":"page"}