{"collection":"Bible & Christianity","html_url":"https://unchartedknowledge.5gfusion.net/browse/bib/vul/mic006.htm","path":"bib/vul/mic006.htm","source_url":"https://sacred-texts.com/bib/vul/mic006.htm","text":"1\u00a0[Audite qu\u00e6 Dominus loquitur:\n Surge, contende judicio adversum montes,\n et audiant colles vocem tuam.\n2\u00a0Audiant montes judicium Domini,\n et fortia fundamenta terr\u00e6;\n quia judicium Domini cum populo suo,\n et cum Isra\u00ebl dijudicabitur.\n3\u00a0Popule meus, quid feci tibi?\n aut quid molestus fui tibi? Responde mihi.\n4\u00a0Quia eduxi te de terra \u00c6gypti,\n et de domo servientium liberavi te,\n et misi ante faciem tuam Moysen, et Aaron, et Mariam.\n5\u00a0Popule meus, memento, qu\u00e6so,\n quid cogitaverit Balach, rex Moab,\n et quid responderit ei Balaam, filius Beor,\n de Setim usque ad Galgalam,\n ut cognosceres justitias Domini.\n6\u00a0Quid dignum offeram Domino?\n curvabo genu Deo excelso?\n Numquid offeram ei holocautomata et vitulos anniculos?\n7\u00a0numquid placari potest Dominus in millibus arietum,\n aut in multis millibus hircorum pinguium?\n numquid dabo primogenitum meum pro scelere meo,\n fructum ventris mei pro peccato anim\u00e6 me\u00e6?\n8\u00a0Indicabo tibi, o homo, quid sit bonum,\n et quid Dominus requirat a te:\n utique facere judicium,\n et diligere misericordiam,\n et sollicitum ambulare cum Deo tuo.\n9\u00a0Vox Domini ad civitatem clamat,\n et salus erit timentibus nomen tuum:\n audite, tribus, et quis approbabit illud?\n10\u00a0Adhuc ignis in domo impii thesauri iniquitatis,\n et mensura minor ir\u00e6 plena.\n11\u00a0Numquid justificabo stateram impiam,\n et saccelli pondera dolosa?\n12\u00a0In quibus divites ejus repleti sunt iniquitate,\n et habitantes in ea loquebantur mendacium,\n et lingua eorum fraudulenta in ore eorum.\n13\u00a0Et ego ergo c\u0153pi percutere te perditione super peccatis tuis.\n14\u00a0Tu comedes, et non saturaberis,\n et humiliatio tua in medio tui:\n et apprehendes, et non salvabis,\n et quos salvaveris, in gladium dabo.\n15\u00a0Tu seminabis, et non metes:\n tu calcabis olivam, et non ungeris oleo;\n et mustum, et non bibes vinum.\n16\u00a0Et custodisti pr\u00e6cepta Amri,\n et omne opus domus Achab,\n et ambulasti in voluntatibus eorum:\n ut darem te in perditionem,\n et habitantes in ea in sibilum,\n et opprobrium populi mei portabitis.]","title":"Vulgate: Micah: Micah Chapter 6","type":"page"}