{"collection":"Bible & Christianity","html_url":"https://unchartedknowledge.5gfusion.net/browse/bib/vul/nah001.htm","path":"bib/vul/nah001.htm","source_url":"https://sacred-texts.com/bib/vul/nah001.htm","text":"1\u00a0Onus Ninive. Liber visionis Nahum Elces\u00e6i.\n \n2\u00a0[Deus \u00e6mulator, et ulciscens Dominus:\n ulciscens Dominus, et habens furorem:\n ulciscens Dominus in hostes suos,\n et irascens ipse inimicis suis.\n3\u00a0Dominus patiens, et magnus fortitudine,\n et mundans non faciet innocentem.\n Dominus in tempestate et turbine vi\u00e6 ejus,\n et nebul\u00e6 pulvis pedum ejus.\n4\u00a0Increpans mare, et exsiccans illud,\n et omnia flumina ad desertum deducens.\n Infirmatus est Basan et Carmelus,\n et flos Libani elanguit.\n5\u00a0Montes commoti sunt ab eo,\n et colles desolati sunt:\n et contremuit terra a facie ejus,\n et orbis, et omnes habitantes in eo.\n6\u00a0Ante faciem indignationis ejus quis stabit?\n et quis resistet in ira furoris ejus?\n Indignatio ejus effusa est ut ignis,\n et petr\u00e6 dissolut\u00e6 sunt ab eo.\n7\u00a0Bonus Dominus,\n et confortans in die tribulationis,\n et sciens sperantes in se.\n8\u00a0Et in diluvio pr\u00e6tereunte consummationem faciet loci ejus,\n et inimicos ejus persequentur tenebr\u00e6.\n9\u00a0Quid cogitatis contra Dominum?\n Consummationem ipse faciet:\n non consurget duplex tribulatio,\n10\u00a0quia sicut spin\u00e6 se invicem complectuntur,\n sic convivium eorum pariter potantium;\n consumentur quasi stipula ariditate plena.\n11\u00a0Ex te exibit cogitans contra Dominum malitiam,\n mente pertractans pr\u00e6varicationem.\n12\u00a0H\u00e6c dicit Dominus:\n Si perfecti fuerint, et ita plures,\n sic quoque attondentur, et pertransibit:\n afflixi te, et non affligam te ultra.\n13\u00a0Et nunc conteram virgam ejus de dorso tuo,\n et vincula tua disrumpam.\n14\u00a0Et pr\u00e6cipiet super te Dominus;\n non seminabitur ex nomine tuo amplius:\n de domo Dei tui interficiam sculptile, et conflatile;\n ponam sepulchrum tuum, quia inhonoratus es.\n15\u00a0Ecce super montes pedes evangelizantis,\n et annuntiantis pacem.\n Celebra, Juda, festivitates tuas,\n et redde vota tua,\n quia non adjiciet ultra ut pertranseat in te Belial:\n universus interiit.]","title":"Vulgate: Nahum: Nahum Chapter 1","type":"page"}