{"collection":"Bible & Christianity","html_url":"https://unchartedknowledge.5gfusion.net/browse/bib/vul/nah003.htm","path":"bib/vul/nah003.htm","source_url":"https://sacred-texts.com/bib/vul/nah003.htm","text":"1\u00a0[V\u00e6 civitas sanguinum,\n universa mendacii dilaceratione plena!\n non recedet a te rapina.\n2\u00a0Vox flagelli, et vox impetus rot\u00e6, et equi frementis,\n et quadrig\u00e6 ferventis, et equitis ascendentis,\n3\u00a0et micantis gladii, et fulgurantis hast\u00e6,\n et multitudinis interfect\u00e6, et gravis ruin\u00e6;\n nec est finis cadaverum,\n et corruent in corporibus suis.\n4\u00a0Propter multitudinem fornicationum meretricis\n specios\u00e6, et grat\u00e6, et habentis maleficia,\n qu\u00e6 vendidit gentes in fornicationibus suis,\n et familias in maleficiis suis.\n5\u00a0Ecce ego ad te, dicit Dominus exercituum,\n et revelabo pudenda tua in facie tua;\n et ostendam gentibus nuditatem tuam,\n et regnis ignominiam tuam.\n6\u00a0Et projiciam super te abominationes,\n et contumeliis te afficiam,\n et ponam te in exemplum.\n7\u00a0Et erit: omnis qui viderit te resiliet a te,\n et dicet: Vastata est Ninive.\n Quis commovebit super te caput?\n unde qu\u00e6ram consolatorem tibi?\n8\u00a0Numquid melior es Alexandria populorum,\n qu\u00e6 habitat in fluminibus?\n aqu\u00e6 in circuitu ejus;\n cujus diviti\u00e6, mare;\n aqu\u00e6, muri ejus.\n9\u00a0\u00c6thiopia fortitudo ejus, et \u00c6gyptus, et non est finis;\n Africa et Libyes fuerunt in auxilio tuo.\n10\u00a0Sed et ipsa in transmigrationem ducta est in captivitatem:\n parvuli ejus elisi sunt in capite omnium viarum,\n et super inclytos ejus miserunt sortem,\n et omnes optimates ejus confixi sunt in compedibus.\n11\u00a0Et tu ergo inebriaberis, et eris despecta:\n et tu qu\u00e6res auxilium ab inimico.\n12\u00a0Omnes munitiones tu\u00e6 sicut ficus cum grossis suis:\n si concuss\u00e6 fuerint, cadent in os comedentis.\n13\u00a0Ecce populus tuus mulieres in medio tui:\n inimicis tuis adapertione pandentur port\u00e6 terr\u00e6 tu\u00e6,\n devorabit ignis vectes tuos.\n14\u00a0Aquam propter obsidionem hauri tibi:\n exstrue munitiones tuas,\n intra in lutum, et calca,\n subigens tene laterem.\n15\u00a0Ibi comedet te ignis,\n peribis gladio, devorabit te ut bruchus:\n congregare ut bruchus,\n multiplicare ut locusta.\n16\u00a0Plures fecisti negotiationes tuas quam stell\u00e6 sint c\u00e6li;\n bruchus expansus est, et avolavit.\n17\u00a0Custodes tui quasi locust\u00e6,\n et parvuli tui quasi locust\u00e6 locustarum,\n qu\u00e6 considunt in sepibus in die frigoris:\n sol ortus est, et avolaverunt,\n et non est cognitus locus earum ubi fuerint.\n18\u00a0Dormitaverunt pastores tui, rex Assur,\n sepelientur principes tui:\n latitavit populus tuus in montibus,\n et non est qui congreget.\n19\u00a0Non est obscura contritio tua;\n pessima est plaga tua.\n Omnes qui audierunt auditionem tuam compresserunt manum super te:\n quia super quem non transiit malitia tua semper?]","title":"Vulgate: Nahum: Nahum Chapter 3","type":"page"}