{"collection":"Bible & Christianity","html_url":"https://unchartedknowledge.5gfusion.net/browse/bib/vul/neh001.htm","path":"bib/vul/neh001.htm","source_url":"https://sacred-texts.com/bib/vul/neh001.htm","text":"1 Verba Nehemi\u00e6 filii Helchi\u00e6. Et factum est in mense Casleu, anno vigesimo, et ego eram in Susis castro.\n2 Et venit Hanani, unus de fratribus meis, ipse et viri ex Juda: et interrogavi eos de Jud\u00e6is qui remanserant, et supererant de captivitate, et Jerusalem.\n3 Et dixerunt mihi: Qui remanserunt, et relicti sunt de captivitate ibi in provincia, in afflictione magna sunt, et in opprobrio: et murus Jerusalem dissipatus est, et port\u00e6 ejus combust\u00e6 sunt igni.\n4 Cumque audissem verba hujuscemodi, sedi, et flevi, et luxi diebus multis: jejunabam, et orabam ante faciem Dei c\u00e6li:\n5 et dixi: Qu\u00e6so, Domine Deus c\u00e6li fortis, magne atque terribilis, qui custodis pactum et misericordiam cum his qui te diligunt, et custodiunt mandata tua:\n6 fiant aures tu\u00e6 auscultantes, et oculi tui aperti, ut audias orationem servi tui, quam ego oro coram te hodie nocte et die pro filiis Isra\u00ebl servis tuis: et confiteor pro peccatis filiorum Isra\u00ebl, quibus peccaverunt tibi: ego et domus patris mei peccavimus,\n7 vanitate seducti sumus, et non custodivimus mandatum tuum, et c\u00e6remonias, et judicia qu\u00e6 pr\u00e6cepisti Moysi famulo tuo.\n8 Memento verbi quod mandasti Moysi servo tuo, dicens: Cum transgressi fueritis, ego dispergam vos in populos:\n9 et si revertamini ad me, et custodiatis pr\u00e6cepta mea, et faciatis ea: etiamsi abducti fueritis ad extrema c\u00e6li, inde congregabo vos, et reducam in locum quem elegi ut habitaret nomen meum ibi.\n10 Et ipsi servi tui, et populus tuus, quos redemisti in fortitudine tua magna, et in manu tua valida.\n11 Obsecro, Domine, sit auris tua attendens ad orationem servi tui, et ad orationem servorum tuorum, qui volunt timere nomen tuum: et dirige servum tuum hodie, et da ei misericordiam ante virum hunc. Ego enim eram pincerna regis.","title":"Vulgate: Nehemiah: Nehemiah Chapter 1","type":"page"}