{"collection":"Bible & Christianity","html_url":"https://unchartedknowledge.5gfusion.net/browse/bib/vul/neh003.htm","path":"bib/vul/neh003.htm","source_url":"https://sacred-texts.com/bib/vul/neh003.htm","text":"1 Et surrexit Eliasib sacerdos magnus, et fratres ejus sacerdotes, et \u00e6dificaverunt portam gregis: ipsi sanctificaverunt eam, et statuerunt valvas ejus, et usque ad turrim centum cubitorum sanctificaverunt eam, usque ad turrim Hananeel.\n2\u00a0Et juxta eum \u00e6dificaverunt viri Jericho: et juxta eum \u00e6dificavit Zachur filius Amri.\n \n3 Portam autem piscium \u00e6dificaverunt filii Asnaa: ipsi texerunt eam, et statuerunt valvas ejus, et seras, et vectes. Et juxta eos \u00e6dificavit Marimuth filius Uri\u00e6, filii Accus.\n4 Et juxta eum \u00e6dificavit Mosollam filius Barachi\u00e6, filii Mesezebel: et juxta eos \u00e6dificavit Sadoc filius Baana.\n5\u00a0Et juxta eos \u00e6dificaverunt Thecueni: optimates autem eorum non supposuerunt colla sua in opere Domini sui.\n \n6 Et portam veterem \u00e6dificaverunt Jojada filius Phasea, et Mosollam filius Besodia: ipsi texerunt eam, et statuerunt valvas ejus, et seras, et vectes.\n7 Et juxta eos \u00e6dificaverunt Meltias Gabaonites, et Jadon Meronathites, viri de Gabaon et Maspha, pro duce qui erat in regione trans flumen.\n8 Et juxta eum \u00e6dificavit Eziel filius Araia aurifex: et juxta eum \u00e6dificavit Ananias filius pigmentarii: et dimiserunt Jerusalem usque ad murum plate\u00e6 latioris.\n9 Et juxta eum \u00e6dificavit Raphaia filius Hur, princeps vici Jerusalem.\n10 Et juxta eum \u00e6dificavit Jedaia filius Haromaph contra domum suam: et juxta eum \u00e6dificavit Hattus filius Haseboni\u00e6.\n11 Mediam partem vici \u00e6dificavit Melchias filius Herem, et Hasub filius Phahath Moab, et turrim furnorum.\n12 Et juxta eum \u00e6dificavit Sellum filius Alohes, princeps medi\u00e6 partis vici Jerusalem, ipse et fili\u00e6 ejus.\n13 Et portam vallis \u00e6dificavit Hanun, et habitatores Zano\u00eb: ipsi \u00e6dificaverunt eam, et statuerunt valvas ejus, et seras, et vectes, et mille cubitos in muro usque ad portam sterquilinii.\n14 Et portam sterquilinii \u00e6dificavit Melchias filius Rechab, princeps vici Bethacharam: ipse \u00e6dificavit eam, et statuit valvas ejus, et seras, et vectes.\n15\u00a0Et portam fontis \u00e6dificavit Sellum filius Cholhoza, princeps pagi Maspha: ipse \u00e6dificavit eam, et texit, et statuit valvas ejus, et seras, et vectes, et muros piscin\u00e6 Silo\u00eb in hortum regis, et usque ad gradus qui descendunt de civitate David.\n \n16 Post eum \u00e6dificavit Nehemias filius Azboc, princeps dimidi\u00e6 partis vici Bethsur, usque contra sepulchrum David, et usque ad piscinam qu\u00e6 grandi opere constructa est, et usque ad domum fortium.\n17 Post eum \u00e6dificaverunt Levit\u00e6, Rehum filius Benni: post eum \u00e6dificavit Hasebias princeps dimidi\u00e6 partis vici Ceil\u00e6 in vico suo.\n18 Post eum \u00e6dificaverunt fratres eorum: Bavai filius Enadad, princeps dimidi\u00e6 partis Ceil\u00e6:\n19 et \u00e6dificavit juxta eum Azer filius Josue, princeps Maspha, mensuram secundam, contra ascensum firmissimi anguli.\n20 Post eum in monte \u00e6dificavit Baruch filius Zachai mensuram secundam, ab angulo usque ad portam domus Eliasib sacerdotis magni.\n21 Post eum \u00e6dificavit Merimuth filius Uri\u00e6 filii Haccus, mensuram secundam, a porta domus Eliasib, donec extenderetur domus Eliasib.\n22 Et post eum \u00e6dificaverunt sacerdotes, viri de campestribus Jordanis.\n23 Post eum \u00e6dificavit Benjamin et Hasub contra domum suam: et post eum \u00e6dificavit Azarias filius Maasi\u00e6 filii Anani\u00e6 contra domum suam.\n24 Post eum \u00e6dificavit Bennui filius Henadad mensuram secundam, a domo Azari\u00e6 usque ad flexuram, et usque ad angulum.\n25\u00a0Phalel filius Ozi contra flexuram, et turrim qu\u00e6 eminet de domo regis excelsa, id est, in atrio carceris: post eum Phadaia filius Pharos.\n \n26 Nathin\u00e6i autem habitabant in Ophel usque contra portam aquarum ad orientem, et turrim qu\u00e6 prominebat.\n27 Post eum \u00e6dificaverunt Thecueni mensuram secundam e regione, a turre magna et eminente usque ad murum templi.\n28 Sursum autem a porta equorum \u00e6dificaverunt sacerdotes, unusquisque contra domum suam.\n29 Post eos \u00e6dificavit Sadoc filius Emmer contra domum suam. Et post eum \u00e6dificavit Semaia filius Secheni\u00e6, custos port\u00e6 orientalis.\n30 Post eum \u00e6dificavit Hanania filius Selemi\u00e6, et Hanun filius Seleph sextus, mensuram secundam: post eum \u00e6dificavit Mosollam filius Barachi\u00e6, contra gazophylacium suum. Post eum \u00e6dificavit Melchias filius aurificis usque ad domum Nathin\u00e6orum, et scruta vendentium contra portam judicialem, et usque ad c\u0153naculum anguli.\n31 Et inter c\u0153naculum anguli in porta gregis, \u00e6dificaverunt aurifices et negotiatores.","title":"Vulgate: Nehemiah: Nehemiah Chapter 3","type":"page"}