{"collection":"Bible & Christianity","html_url":"https://unchartedknowledge.5gfusion.net/browse/bib/vul/neh008.htm","path":"bib/vul/neh008.htm","source_url":"https://sacred-texts.com/bib/vul/neh008.htm","text":"1 Et venerat mensis septimus: filii autem Isra\u00ebl erant in civitatibus suis. Congregatusque est omnis populus quasi vir unus ad plateam qu\u00e6 est ante portam aquarum: et dixerunt Esdr\u00e6 scrib\u00e6 ut afferret librum legis Moysi, quam pr\u00e6ceperat Dominus Isra\u00ebli.\n2 Attulit ergo Esdras sacerdos legem coram multitudine virorum et mulierum, cunctisque qui poterant intelligere, in die prima mensis septimi.\n3 Et legit in eo aperte in platea qu\u00e6 erat ante portam aquarum, de mane usque ad mediam diem, in conspectu virorum et mulierum, et sapientium: et aures omnis populi erant erect\u00e6 ad librum.\n4 Stetit autem Esdras scriba super gradum ligneum, quem fecerat ad loquendum: et steterunt juxta eum Mathathias, et Semeia, et Ania, et Uria, et Helcia, et Maasia, ad dexteram ejus: et ad sinistram, Phadaia, Misa\u00ebl, et Melchia, et Hasum, et Hasbadana, Zacharia, et Mosollam.\n5 Et aperuit Esdras librum coram omni populo: super universum quippe populum eminebat: et cum aperuisset eum, stetit omnis populus.\n6 Et benedixit Esdras Domino Deo magno: et respondit omnis populus: Amen, amen, elevans manus suas: et incurvati sunt, et adoraverunt Deum proni in terram.\n7 Porro Josue, et Bani, et Serebia, Jamin, Accub, Septhai, Odia, Maasia, Celita, Azarias, Jozabed, Hanan, Phalaia, Levit\u00e6, silentium faciebant in populo ad audiendam legem: populus autem stabat in gradu suo.\n8 Et legerunt in libro legis Dei distincte, et aperte ad intelligendum: et intellexerunt cum legeretur.\n9 Dixit autem Nehemias (ipse est Athersatha) et Esdras sacerdos et scriba, et Levit\u00e6 interpretantes universo populo: Dies sanctificatus est Domino Deo nostro: nolite lugere, et nolite flere. Flebat enim omnis populus cum audiret verba legis.\n10 Et dixit eis: Ite, comedite pinguia, et bibite mulsum, et mittite partes his qui non pr\u00e6paraverunt sibi, quia sanctus dies Domini est: et nolite contristari: gaudium etenim Domini est fortitudo nostra.\n11 Levit\u00e6 autem silentium faciebant in omni populo, dicentes: Tacete, quia dies sanctus est, et nolite dolere.\n12 Abiit itaque omnis populus ut comederet, et biberet, et mitteret partes, et faceret l\u00e6titiam magnam: quia intellexerant verba qu\u00e6 docuerat eos.\n13 Et in die secundo congregati sunt principes familiarum universi populi, sacerdotes et Levit\u00e6, ad Esdram scribam, ut interpretaretur eis verba legis.\n14 Et invenerunt scriptum in lege pr\u00e6cepisse Dominum in manu Moysi ut habitent filii Isra\u00ebl in tabernaculis in die solemni, mense septimo:\n15\u00a0et ut pr\u00e6dicent, et divulgent vocem in universis urbibus suis, et in Jerusalem, dicentes: Egredimini in montem, et afferte frondes oliv\u00e6, et frondes ligni pulcherrimi, frondes myrti, et ramos palmarum, et frondes ligni nemorosi, ut fiant tabernacula, sicut scriptum est.\n \n16 Et egressus est populus, et attulerunt. Feceruntque sibi tabernacula unusquisque in domate suo: et in atriis suis, et in atriis domus Dei, et in platea port\u00e6 aquarum, et in platea port\u00e6 Ephraim.\n17 Fecit ergo universa ecclesia eorum qui redierant de captivitate, tabernacula, et habitaverunt in tabernaculis: non enim fecerant a diebus Josue filii Nun taliter filii Isra\u00ebl usque ad diem illum. Et fuit l\u00e6titia magna nimis.\n18 Legit autem in libro legis Dei per dies singulos, a die primo usque ad diem novissimum. Et fecerunt solemnitatem septem diebus, et in die octavo collectam juxta ritum.","title":"Vulgate: Nehemiah: Nehemiah Chapter 8","type":"page"}